ಡ್ರಗ್ ಮಾಫಿಯಾ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಲ್ಮಾನ್ ಖಾನ್‌ ಸ್ಪಷ್ಟನೆ! ಏನಿದು ಹೊಸ ವಿಚಾರ?

ಬಾಲಿವುಡ್ ನಟ ಸುಶಾಂತ್ ಸಿಂಗ್‌ ರಜಪೂತ್ ಆತ್ಮಹತ್ಯೆ ತನಿಖೆ ಸಾಗಿದಂತೆಲ್ಲ ಬೇರೆಯದೇ ಆಯಾಮ ಪಡೆದುಕೊಳ್ಳುತ್ತಿದೆ. ಸುಶಾಂತ್‌ ಸಿಂಗ್ ಸಾವಿಗೂ ಡ್ರಗ್ ಮಾಫಿಯಾಗೂ ಲಿಂಕ್ ಇದೆ ಎಂಬುದು ತಿಳಿಯುತ್ತಿದ್ದಂತೆಯೇ ಎನ್‌ಸಿಬಿ ಎಂಟ್ರಿ ಕೊಟ್ಟಿತ್ತು. ಆನಂತರ ಪ್ರಕರಣ ಮತ್ತೊಂದು ಸ್ವರೂಪ ಪಡೆದುಕೊಂಡಿದೆ. ಬೃಹತ್ ಡ್ರಗ್ ಜಾಲಗಳನ್ನು ಅಧಿಕಾರಿಗಳು ಭೇದಿಸುತ್ತಿದ್ದಾರೆ. ಇದೀಗ ಈ ಪ್ರಕರಣದಲ್ಲಿ ಮುಂಬೈನ KWAN ಟ್ಯಾಲೆಂಟ್ ಮ್ಯಾನೇಜ್‌ಮೆಂಟ್ ಏಜೆನ್ಸಿಯ ಕೈವಾಡ ಇದೆ ಎಂಬ ಆರೋಪ ಕೇಳಿಬಂದಿದೆ. ಈ ಮಧ್ಯೆಯೇ KWAN ಸಂಸ್ಥೆಯಲ್ಲಿ ಸಲ್ಮಾನ್‌ ಖಾನ್ ಅವರ ಪಾಲುದಾರಿಕೆ ಇದೆ ಎಂಬ ವಿಷಯ ಹಬ್ಬಿತ್ತು. ಇದೀಗ ಆ ಬಗ್ಗೆ ಸಲ್ಮಾನ್ ಖಾನ್ ಕಡೆಯಿಂದ ಸ್ಪಷ್ಟನೆ ಸಿಕ್ಕಿದೆ.

KWANಗೂ ಸಲ್ಮಾನ್‌ಗೂ ಸಂಬಂಧವಿಲ್ಲ!
ತಮ್ಮ ವಕೀಲರ ಮೂಲಕ ಸಲ್ಮಾನ್ ಖಾನ್ ಸ್ಪಷ್ಟನೆ ನೀಡಿದ್ದಾರೆ. 'ನಮ್ಮ ಕ್ಲೈಂಟ್ ಆದ ಭಾರತೀಯ ಚಿತ್ರರಂಗದ ಜನಪ್ರಿಯ ನಟ ಸಲ್ಮಾನ್‌ ಖಾನ್‌ ಅವರು KWAN ಟ್ಯಾಲೆಂಟ್ ಮ್ಯಾನೇಜ್‌ಮೆಂಟ್‌ ಸಂಸ್ಥೆಯಲ್ಲಿ ಪಾಲುದಾರಿಕೆ ಹೊಂದಿದ್ದಾರೆ ಎಂದು ಕೆಲ ಮಾಧ್ಯಮಗಳು ತಪ್ಪಾಗಿ ವರದಿ ಮಾಡಿವೆ. ಈ ಮೂಲಕ ಸ್ಪಷ್ಟಪಡಿಸುವುದೇನೆಂದರೆ, ನಟ ಸಲ್ಮಾನ್ ಖಾನ್‌ ಅವರು ನೇರವಾಗಿ ಅಥವಾ ಪರೋಕ್ಷವಾಗಿ KWAN ಟ್ಯಾಲೆಂಟ್ ಮ್ಯಾನೇಜ್‌ಮೆಂಟ್‌ ಸಂಸ್ಥೆಯಲ್ಲಿ ಅಥವಾ ಅದರ ಬೇರಾವುದೇ ಸಂಸ್ಥೆಗಳಲ್ಲಿ ಯಾವುದೇ ಪಾಲುದಾರಿಕೆಯನ್ನು ಹೊಂದಿಲ್ಲ' ಎಂದು ತಿಳಿಸಿದ್ದಾರೆ.

ಸಲ್ಮಾನ್ ಖಾನ್‌ ಆಪ್ತ ನಿಖಿಲ್‌ ದ್ವಿವೇದಿ ಕೂಡ ಇದನ್ನು ಅಲ್ಲಗಳೆದಿದ್ದಾರೆ. 'KWAN ಟ್ಯಾಲೆಂಟ್ ಮ್ಯಾನೇಜ್‌ಮೆಂಟ್‌ ಸಂಸ್ಥೆಯಲ್ಲಿ ಸಲ್ಮಾನ್‌ ಖಾನ್ ಯಾವುದೇ ಪಾಲುದಾರಿಕೆಯನ್ನು ಹೊಂದಿಲ್ಲ' ಎಂದು ಹೇಳಿದ್ದಾರೆ.

ನಟಿ ರಿಯಾ ಚಕ್ರವರ್ತಿಯ ನ್ಯಾಯಾಂಗ ಬಂಧನ ಅವಧಿ ವಿಸ್ತರಣೆ! ಸುಶಾಂತ್‌ ಪ್ರೇಯಸಿಗೆ ಮುಂದುವರಿದ ಜೈಲು ವಾಸ!

KWAN ಟ್ಯಾಲೆಂಟ್ ಮ್ಯಾನೇಜ್‌ಮೆಂಟ್‌ ಸಂಸ್ಥೆಯು ಈ ಡ್ರಗ್ ಪ್ರಕರಣದಲ್ಲಿ ದೊಡ್ಡ ಪಾತ್ರವನ್ನು ವಹಿಸಿದೆ ಎಂಬ ಮಾಹಿತಿ ಕೇಳಿಬಂದಿದೆ. ಧ್ರುವ್‌ ಚಿಟ್ಗೋಪೆಕರ್‌ ಮಾಲೀಕತ್ವದ ಈ ಸಂಸ್ಥೆಯು ಬಾಲಿವುಡ್ ಕಲಾವಿದರಾದ ದೀಪಿಕಾ ಪಡುಕೋಣೆ, ಟೈಗರ್ ಶ್ರಾಫ್‌, ಶ್ರದ್ಧಾ ಕಪೂರ್, ಜಾಕ್ವೇಲಿನ್ ಫರ್ನಾಂಡಿಸ್‌ ಸೇರಿದಂತೆ ದೊಡ್ಡ ದೊಡ್ಡ ಸೆಲೆಬ್ರಿಟಿಗಳಿಗೆ ಟ್ಯಾಲೆಂಟ್ ಮ್ಯಾನೇಜ್‌ಮೆಂಟ್ ಕೆಲಸ ಮಾಡಿಕೊಡುತ್ತಿದೆ. ಮಂಗಳವಾರ ಧ್ರುವ್‌ ಚಿಟ್ಗೋಪೆಕರ್‌ ಮತ್ತು ಟ್ಯಾಲೆಂಟ್ ಮ್ಯಾನೇಜರ್‌ ಜಯಾ ಸಾಹ ಅವರನ್ನು ತೀವ್ರ ವಿಚಾರಣೆಗೆ ಒಳಪಡಿಸಲಾಗಿದೆ.

ಶಾಕಿಂಗ್‌...! ದೀಪಿಕಾ ಪಡುಕೋಣೆ ಡ್ರಗ್ಸ್‌ ಬೇಕು ಎಂದು ಕೇಳಿದ್ದ ವಾಟ್ಸಪ್‌ ಸಂದೇಶ ಬಹಿರಂಗ!