ಮದುವೆಗೂ ಮುನ್ನ ಹನಿಮೂನ್‌ ಪ್ಲ್ಯಾನ್‌!

ಟಾಲಿವುಡ್‌ ಮಂದಿಯ ಕಣ್ಣು ಸದ್ಯಕ್ಕೆ ನಾಗ ಚೈತನ್ಯ- ಸಮಂತಾ ಮೇಲೆ ನೆಟ್ಟಿದೆ. ಈಗಾಗಲೇ ಇವರಿಬ್ಬರ ನಿಶ್ಚಿತಾರ್ಥ ಜನವರಿಯಲ್ಲಿ ನೆರವೇರಿದ್ದು, ಬರುವ ಅಕ್ಟೋಬರ್‌ ತಿಂಗಳಲ್ಲಿ ಹಸೆಮಣೆ ಏರುವ ಸಾಧ್ಯತೆಯಿದೆ.

ಮತ್ತೊಂದು ಇಂಟ್ರೆಸ್ಟಿಂಗ್‌ ವಿಚಾರ ಏನಪ್ಪಾ ಅಂದ್ರೆ ಇವರಿಬ್ಬರು ಈಗಾಗಲೇ ಹನಿಮೂನ್‌ಗೂ ಪ್ಲ್ಯಾನ್‌ ಮಾಡಿಕೊಂಡಿದ್ದಾರೆ. ಚೈತು-ಸಮಂತಾ ಮದುವೆ ನಂತರ ಮಧುಚಂದ್ರಕ್ಕೆ ನ್ಯೂಯಾರ್ಕ್‌ನತ್ತ ಪ್ರಯಾಣ ಬೆಳೆಸಲಿದ್ದಾರಂತೆ. ಈ ಮುದ್ದಾದ ಜೋಡಿ ಹನಿಮೂನ್‌ಗಾಗಿ ನ್ಯೂಯಾರ್ಕ್‌ನ್ನೇ ಆಯ್ಕೆ ಮಾಡಲು ಕಾರಣವಿದೆ.

ನಾಗ ಚೈತನ್ಯ-ಸಮಂತಾ ಒಟ್ಟಾಗಿ ಅಭಿನಯಿಸಿ, ಸೂಪರ್‌ ಹಿಟ್‌ ಆದ ಮೊದಲ ಚಿತ್ರ 'ಏ ಮಾಯಾ ಚೇಸಾವೆ'. ಈ ಸಿನಿಮಾದ ಬಹುತೇಕ ಚಿತ್ರೀಕರಣ ನ್ಯೂಯರ್ಕ್‌ನಲ್ಲೇ ನಡೆದಿದೆ. ಹಾಗಾಗಿ ಆ ಹಳೆಯ ಮಧುರ ಕ್ಷಣಗಳನ್ನು ಮತ್ತೊಮ್ಮೆ ಮೆಲುಕು ಹಾಕಲು ಈ ನಿರ್ಧಾರಕ್ಕೆ ಬಂದಿದ್ದಾರಂತೆ ಚೈ. ಇತ್ತೀಚೆಗೆ ಮಾಧ್ಯಮವೊಂದರ ಸಂದರ್ಶನದಲ್ಲಿ ಭಾಗವಹಿಸಿದ್ದ ನಾಗಚೈತನ್ಯ ತಮ್ಮ ಹನಿಮೂನ್‌ ಯೋಜನೆಯನ್ನು ಈ ರೀತಿಯಾಗಿ ಬಿಚ್ಚಿಟ್ಟಿದ್ದಾರೆ.

ಸದ್ಯಕ್ಕೆ ನಾಗಚೈತನ್ಯ ತಮ್ಮ ಮುಂದಿನ ಚಿತ್ರ 'ರಾರಂಡೊಯ್‌ ವೆಡುಕ ಚೂದ್ದಾಂ' ಚಿತ್ರದ ಪ್ರಮೋಶನ್‌ನಲ್ಲಿ ಬಿಝಿಯಾಗಿದ್ದಾರೆ. ಇತ್ತ ಸಮಂತಾ ಕೂಡ ಒಂದಿಷ್ಟು ಚಿತ್ರಗಳಲ್ಲಿ ತೊಡಗಿಸಿಕೊಂಡಿದ್ದು, ಅದರ ಜತೆ ತೆಲಂಗಾಣ ಕೈಮಗ್ಗದ ಪ್ರಚಾರದಲ್ಲಿಯೂ ನಿರತರಾಗಿದ್ದಾರೆ.