ಕೋಟೆವಾಲಿ ಬದುಕಿನ ಸಿನಿಮಾ ನಿರ್ಮಾಣಕ್ಕೆ ಸಜ್ಜಾದ ಭನ್ಸಾಲಿ

ಐತಿಹಾಸಿಕ ಪದ್ಮಾವತ್‌ ಸಿನಿಮಾದ ನಂತರ ಸ್ವಲ್ಪ ಬ್ರೇಕ್‌ ತೆಗೆದುಕೊಂಡಿದ್ದ ಸಿನಿಮಾ ನಿರ್ಮಾಪಕ ಸಂಜಯ್‌ ಲೀಲಾ ಭನ್ಸಾಲಿ ಈಗ ಹೀರಾ ಮಂಡಿ ಹೆಸರಿನ ಸಿನಿಮಾ ನಿರ್ಮಾಣಕ್ಕೆ ಮುಂದಾಗಿದ್ದಾರೆ. ಮುಂಬಯಿಯ ಕುಖ್ಯಾತ ಮಹಿಳಾ ಗ್ಯಾಂಗ್‌ಸ್ಟರ್‌ ಗಂಗೂಬಾಯಿ ಕೋಟೆವಾಲಿಯವರ ಜೀವನ ಆಧರಿಸಿದ ಈ ಸಿನಿಮಾವೂ ಭನ್ಸಾಲಿಯವರ ಅತ್ಯಂತ ಮಹತ್ವದ ಸಿನಿಮಾ ಎಂದೆನಿಸಿಕೊಳ್ಳಲಿದೆ.

ಈ ಸಿನಿಮಾದ ಮುಖ್ಯ ಭೂಮಿಕೆಗೆ ಪ್ರಿಯಾಂಕ ಚೋಪ್ರಾರನ್ನು ಕರೆತರುವ ಯೋಚನೆಯನ್ನು ಭನ್ಸಾಲಿ ಮಾಡಿದ್ದಾರಂತೆ. ಗಂಗೂಭಾಯಿ ಕೋಟೆವಾಲಿ ಎಂಬ ಹೆಸರು ಮುಂಬಯಿಯಲ್ಲಿ ಎಷ್ಟೊಂದು ಕುಖ್ಯಾತವಾಗಿದೆ ಎಂದರೆ ಆಕೆ ಗತಿಸಿ ಎಷ್ಟೋ ವರ್ಷಗಳಾದ ನಂತರವೂ ಆಕೆಯ ಪ್ರತಿಮೆಗಳು ಕಾಮಾಟಿಪುರ ಪ್ರದೇಶದಲ್ಲಿವೆ. ಕಾಮಾಟಿಪುರದ ಮೇಡಂ ಎಂದೇ ಕರೆಯಲ್ಪಡುತ್ತಿದ್ದ ಅವರು ಮುಂಬಯಿಯಲ್ಲಿ ಹಲವು ವೇಶ್ಯವಾಟಿಕೆಗಳನ್ನು ನಡೆಸುತ್ತಿದ್ದರು. ಭನ್ಸಾಲಿ ಈ ಸಿನಿಮಾಗಾಗಿ ಈಗಾಗಲೇ ಸಾಕಷ್ಟು ಅಧ್ಯಯನ ಮಾಡುತ್ತಿದ್ದಾರೆ.