ವಿರಾಟ್ ಕೊಹ್ಲಿ ಜತೆ 'ಹೆಜ್ಜೆ' ಹಾಕಲಿರುವ ಸಾರಾ ಅಲಿ ಖಾನ್?

ರಾಯಲ್ ಚಾಲೆಂಜರ್ಸ್ ಬೆಂಗಳೂರು ನಾಯಕ ವಿರಾಟ್ ಕೊಹ್ಲಿ ಜತೆ ಸೈಫ್ ಆಲಿ ಖಾನ್ ಮಗಳು ಸಾರಾ ಅಲಿ ಖಾನ್ ಹೆಜ್ಜೆ ಹಾಕಲು ಸಿದ್ಧವಾಗಿದ್ದಾರೆ. ಆದರೆ ಇವರು ಹೆಜ್ಜೆ ಹಾಕಲಿರುವುದು ಶೂ ಒಂದರ ಜಾಹೀರಾತಿಗಾಗಿ ಎಂಬುದು ವಿಶೇಷ.

ಸ್ಫೋರ್ಟ್ಸ್ ಬ್ರಾಂಡ್ ಒಂದು ತಮ್ಮ ಉತ್ಪನ್ನದ ಜಾಹೀರಾತಿಗಾಗಿ ಸಾರಾ ಅಲಿ ಖಾನ್‌ರನ್ನು ಆಯ್ಕೆ ಮಾಡಿದೆ ಎಂದಿವೆ ಮೂಲಗಳು. ಈ ಜಾಹೀರಾತಿನಲ್ಲಿ ವಿರಾಟ್ ಕೊಹ್ಲಿ ಸಹ ಕಾಣಿಸಲಿದ್ದಾರೆ. ಕಳೆದ ವರ್ಷ 'ಕೇದರ್‌ನಾಥ್' ಸಿನಿಮಾ ಮೂಲಕ ಬಾಲಿವುಡ್ ಬೆಳ್ಳಿ ಪರದೆಗೆ ಅಡಿಯಿಟ್ಟಿದ್ದಾರೆ ಸಾರಾ.

ಇಷ್ಟು ದಿನಗಳ ಕಾಲ ಈ ಸ್ಫೋರ್ಟ್ಸ್ ಬ್ರಾಂಡ್ ಉತ್ಪನ್ನದಲ್ಲಿ ದಿಶಾ ಪಟಾನಿ ಕಾಣಿಸಿಕೊಳ್ಳುತ್ತಿದ್ದರು. ಕಂಪೆನಿ ಜತೆಗಿನ ಒಪ್ಪಂದ ಮುಗಿದಿದ್ದು ಅವರು ಮುಂದೆ ಈ ಜಾಹೀರಾತಿನಲ್ಲಿ ಕಾಣಿಸಿಕೊಳ್ಳಲ್ಲವಂತೆ. ಹಾಗಾಗಿ ಈ ಜಾಹೀರಾತು ಸಾರಾ ಅಲಿ ಖಾನ್ ಪಾಲಾಗಿದೆ ಎಂದಿವೆ ಮೂಲಗಳು.

'ಕಾಫಿ ವಿತ್ ಕರಣ್ ಶೋ'ನಲ್ಲಿ ಸಾರಾ ಅಲಿ ಖಾನ್ ತಮ್ಮ ಫಿಟ್‌ನೆಸ್ ಬಗ್ಗೆ ಸಾಕಷ್ಟು ಮಾಹಿತಿ ಹಂಚಿಕೊಂಡಿದ್ದರು. ತಾನು ಪಾಲಿಸಿಸ್ಟಿಕ್ ಓವರಿ ಸಿಂಡ್ರೋಮ್ ಎಂಬ ಸಮಸ್ಯೆಯಿಂದ ಬಳಲುತ್ತಿರುವುದಾಗಿ ಹೇಳಿಕೊಂಡಿದ್ದರು. ಆದರೆ ಸೂಕ್ತ ಆಹಾರ, ವರ್ಕ್‌ಔಟ್ ಮೂಲಕ ಆ ಸಮಸ್ಯೆಯಿಂದ ಹೊರಬಂದಿದ್ದೆ ಎಂದಿದ್ದರು. ಫಿಟ್‌ನೆಸ್ ಬಗ್ಗೆ ಪ್ರಚಾರ ನಡೆಸುತ್ತಿರುವ ಬ್ರಾಂಡ್ ಶೀಘ್ರದಲ್ಲೇ ಸಾರಾರನ್ನು ಜಾಹೀರಾತಿನಲ್ಲಿ ತೋರಿಸಲು ಅಣಿಯಾಗುತ್ತಿದೆ.