ತನ್ನ ಗುರು ಸರೋಜ್ ಖಾನ್‌ ನಿಧನಕ್ಕೆ ಕಂಬನಿ ಮಿಡಿದ ನಟಿ ಮಾಧುರಿ ದೀಕ್ಷಿತ್

ಬಾಲಿವುಡ್‌ಗೆ ಶುಕ್ರವಾರ ಮತ್ತೊಂದು ಆಘಾತ ಎದುರಾಗಿದೆ. ಇರ್ಫಾನ್‌ ಖಾನ್‌, ರಿಷಿ ಕಪೂರ್‌, ಸುಶಾಂತ್ ಸಿಂಗ್ ರಜಪೂತ್ ಮುಂತಾದವರನ್ನು ಕಳೆದುಕೊಂಡು ಬಡವಾಗಿರುವ ಬಾಲಿವುಡ್‌ ಈಗ ಖ್ಯಾತ ನೃತ್ಯ ಸಂಯೋಜಕಿ ಸರೋಜ್ ಖಾನ್ ಅವರನ್ನು ಕಳೆದುಕೊಂಡಿದೆ. 5 ದಶಕಗಳ ಕಾಲ ನೃತ್ಯ ನಿರ್ದೇಶಕಿಯಾಗಿ, ಹಾಡುಗಳಿಗೆ ಅದ್ಭುತವಾಗಿ ನೃತ್ಯ ಸಂಯೋಜನೆ ಮಾಡುತ್ತಿದ್ದ ಸರೋಜ್ ಜುಲೈ 3ರಂದು ಹೃದಯಾಘಾತದಿಂದ ಸಾವನ್ನಪ್ಪಿದ್ದಾರೆ. ಅಂದಹಾಗೆ, ಸರೋಜ್ ಮತ್ತು ನಟಿ ಮಾಧುರಿ ದೀಕ್ಷಿತ್ ಅವರದ್ದು ಬಾಲಿವುಡ್‌ನಲ್ಲಿ ಅಪ್ರತಿಮ ಜೋಡಿ. ಅವರಿಬ್ಬರ ಕಾಂಬಿನೇಷನ್‌ನಲ್ಲಿ ಮೂಡಿಬಂದ ಅನೇಕ ಹಾಡುಗಳು ಸೂಪರ್ ಹಿಟ್ ಎನಿಸಿಕೊಂಡಿವೆ. ಇದೀಗ ತನ್ನ ಸ್ನೇಹಿತೆ, ಗುರುವಂತೆ ಇದ್ದ ಸರೋಜ್ ಅವರನ್ನು ಕಳೆದುಕೊಂಡು ಮಾಧುರಿ ತೀವ್ರ ದುಃಖದಲ್ಲಿದ್ದಾರೆ.

ಸರೋಜ್ ಅವರ ನಿಧನದ ಕುರಿತು ಟ್ವೀಟ್ ಮಾಡಿರುವ ಮಾಧುರಿ, 'ನನ್ನ ಸ್ನೇಹಿತೆ, ನನ್ನ ಗುರು ಸರೋಜ್ ಅವರನ್ನು ಕಳೆದುಕೊಂಡು ನಾನು ತೀವ್ರ ದುಃಖದಲ್ಲಿದ್ದೇನೆ. ನಾನು ಉತ್ತಮ ನೃತ್ಯಪಟುವಾಗುವುದರಲ್ಲಿ ಅವರ ಸಹಾಯ ಅಮೋಘವಾದದ್ದು. ಅದ್ಭುತ ಪ್ರತಿಭೆಯೊಂದನ್ನು ಈ ಜಗತ್ತು ಕಳೆದುಕೊಂಡಿದೆ. ನಾನು ಅವರನ್ನು ತುಂಬ ಮಿಸ್ ಮಾಡಿಕೊಳ್ಳುತ್ತೇನೆ' ಎಂದು ಹೇಳಿದ್ದಾರೆ. ಸರೋಜ್‌-ಮಾಧುರಿ ಕಾಂಬಿನೇಷನ್‌ನಲ್ಲಿ 'ದಖ್‌ ದಖ್‌ ಕರ್ನೇ ಲಗಾ..', 'ಮೇರಾ ಪಿಯಾ ಘರ್ ಆಯಾ..', 'ಚಾನೆ ಕೆ ಖೇಟ್‌ ಮೇ..', 'ಚೋಲಿ ಕೇ ಪೀಚೆ ಕ್ಯಾ ಯೇ..' ಸೇರಿದಂತೆ ಅನೇಕ ಹಾಡುಗಳನ್ನು ಜೊತೆಯಾಗಿ ಮಾಡಿದ್ದಾರೆ.

ಇನ್ನು, ಈ ಹಿಂದೆ ಸರೋಜ್ ಖಾನ್ ನೀಡಿದ ಸಂದರ್ಶನವೊಂದರಲ್ಲಿ ಮಾಧುರಿ ಬಗ್ಗೆ ಅಪಾರ ಪ್ರೀತಿ ವ್ಯಕ್ತಡಿಸಿದ್ದರು. 'ಮಾಧುರಿ ಸುಲಭವಾಗಿ ಡ್ಯಾನ್ಸ್ ಸ್ಟೆಪ್‌ಗಳನ್ನು ಕಲಿಯುತ್ತಾರೆ. 12 ವರ್ಷಗಳಿಂದ ಕಥಕ್‌ ನೃತ್ಯವನ್ನು ಅವರು ಕಲಿತಿದ್ದಾರೆ. ಸುಭಾಷ್ ಘೈ ಅವರ 'ಉತ್ತರ್ ದಕ್ಷಿಣ್' ಸಿನಿಮಾದ ಮೂಲಕ ನಮ್ಮಿಬ್ಬರ ಕಾಂಬಿನೇಷನ್‌ ಶುರುವಾಯಿತು. ಆರಂಭದಲ್ಲಿ ಮಾಧುರಿ ಸ್ವಲ್ಪ ಸ್ಲೋ ಇದ್ದರು. ಆಗ ನನ್ನನ್ನು ನಕಲು ಮಾಡಲು ಅವರು ಪ್ರಯತ್ನಿಸುತ್ತಿದ್ದರು. ಮಾಧುರಿ ನಟಿಸಿದ ಹಾಡುಗಳಲ್ಲಿ 'ಏಕ್ ಧೋ ತೀನ್‌..' ಉತ್ತಮವಾದದ್ದು. ಅವರೊಳಗಿನ ನೃತ್ಯಪಟುವನ್ನು ಪರಿಚಯಿಸಿದ ಹಾಡು ಅದು. ಮಾಧುರಿ ನನ್ನ ಸಾರ್ವಕಾಲಿಕ ಬೆಸ್ಟ್‌ ಸ್ಟುಡೆಂಟ್‌' ಎಂದು ಅವರು ಹೇಳಿದ್ದರು.

ಸರೋಜ್ ಖಾನ್ ಕನ್ನಡದ ಯಾವ ಸಿನೆಮಾಕ್ಕೆ ನೃತ್ಯ ನಿರ್ದೇಶನ ಮಾಡಿದ್ದರು?

ಜೊತೆಗೆ ಮಾಧುರಿ ಸ್ಮೈಲ್ ಬಗ್ಗೆ ಮೆಚ್ಚುಗೆ ಮಾತುಗಳನ್ನಾಡಿದ್ದ ಸರೋಜ್‌, 'ಮಾಧುರಿ ಸುಂದರವಾದ ನಗುವನ್ನು ಹೊಂದಿದ್ದರು. ಆದರೆ, ಅವರು ಅನಗತ್ಯವಾಗಿ ನಗುತ್ತಿದ್ದರು. ಆಗ ನಾನು, 'ಎಲ್ಲಿ ಅವಶ್ಯಕತೆ ಇದೆಯೋ, ಅಲ್ಲಿ ಮಾತ್ರ ನಗು. ಇಲ್ಲವಾದಲ್ಲಿ ನಿನ್ನ ಚಾರ್ಮ್‌ ಅನ್ನು ಕಳೆದುಕೊಳ್ಳುತ್ತೀಯಾ ಎಂದು ಹೇಳಿದ್ದೆ. 'ಏಕ್ ಧೋ ತೀನ್‌..' ಹಾಡಿಗೆ ಮಾಧುರಿ 17 ದಿನ ಪ್ರಾಕ್ಟೀಸ್ ಮಾಡಿದ್ದರು. 10ನೇ ದಿನದೊತ್ತಿಗೆ ಅವರು ಪರ್ಫೆಕ್ಟ್ ಆಗಿ ಮಾಡುತ್ತಿದ್ದರು. ನಾನು ಸಾಕು ಎಂದರೂ, ಅವರು ಇನ್ನೂ ಹೆಚ್ಚು ಪ್ರಾಕ್ಟೀಸ್ ಮಾಡಿದರು' ಎಂದು ಮಾಧುರಿ ದೀಕ್ಷಿತ್‌ ಬದ್ಧತೆ ಬಗ್ಗೆ ಮೆಚ್ಚುಗೆಯ ಮಾತುಗಳನ್ನಾಡಿದ್ದರು ಸರೋಜ್‌. ಕಾಕತಾಳೀಯವೆಂದರೆ, ಮಾಧುರಿ ನಟಿಸಿದ್ದ 'ಕಳಂಕ್‌' ಚಿತ್ರವೇ ಸರೋಜ್ ಕೊನೆಯದಾಗಿ ನೃತ್ಯ ಸಂಯೋಜನೆ ಮಾಡಿದ ಸಿನಿಮಾ.

ಬಾಲಿವುಡ್ ಖ್ಯಾತ ನೃತ್ಯ ಸಂಯೋಜಕಿ ಸರೋಜ್ ಖಾನ್ ಇನ್ನಿಲ್ಲ!