ತಮ್ಮ ಬಂಗಲೆ ಹೆಸರಿನ ಸೀಕ್ರೆಟ್ ಬಹಿರಂಗಪಡಿಸಿದ ಸೋನಾಕ್ಷಿ

ಬಾಲಿವುಡ್ ನಟಿ ಸೋನಾಕ್ಷಿ ಸಿನ್ಹಾ ತಮ್ಮ ಬಂಗಲೆ ಹೆಸರಿನ ಹಿಂದಿರುವ ರಹಸ್ಯವನ್ನು ಬಹಿರಂಗಪಡಿಸಿದ್ದಾರೆ. 'ದಬಾಂಗ್' ಸಿನಿಮಾ ಮೂಲಕ ಬೆಳ್ಳಿತೆರೆಗೆ ಅಡಿಯಿಟ್ಟ ಈ ಚೆಲುವೆ ವೃತ್ತಿ ಬದುಕಿನಲ್ಲಿ ಹಲವಾರು ಏರಿಳಿತಗಳನ್ನು ಕಂಡಿದ್ದಾರೆ.

ಇತ್ತೀಚೆಗೆ ಸಿಂಗಿಂಗ್ ಶೋಗೆ ಮುಖ್ಯ ಅತಿಥಿಯಾಗಿ ಹಾಜರಾಗಿದ್ದರು ಸೋನಾಕ್ಷಿ. ಇಂದಿರಾ ದಾಸ್ ಎಂಬ ಸ್ಪರ್ಧಿಯ ಪ್ರತಿಭೆಗೆ ಮೂಕವಿಸ್ಮಿತರಾದ ಸೋನಾಕ್ಷಿ ಆಕೆಯನ್ನು ಹಾಡಿ ಹೊಗಳಿದರು. ಇದೇ ಸಂದರ್ಭದಲ್ಲಿ ಇಂದಿರಾ ದಾಸ್ ಮತ್ತು ಅವರ ತಾಯಿಯ ಜತೆಗೆ ಸ್ವಲ್ಪ ಹೊತ್ತು ಹರಟೆ ಹೊಡೆಯುವ ಅವಕಾಶವೂ ಸಿಕ್ಕಿತು.

ಆ ಸಮಯದಲ್ಲಿ 'ನಿಮ್ಮ ಬಂಗಲೆಗೆ ರಾಮಾಯಣ್ ಎಂಬ ಹೆಸರು ಯಾಕೆ ಇಡಲಾಗಿದೆ' ಎಂದು ಪ್ರಶ್ನಿಸಿದರು ಇಂದಿರಾ. "ತುಂಬಾ ವರ್ಷಗಳಿಂದ ಸಾಕಷ್ಟು ಮಂದಿ ಈ ಪ್ರಶ್ನೆಯನ್ನೂ ಕೇಳುತ್ತಲೇ ಇದ್ದಾರೆ. ಆದರೆ ಇಂದು ನಿಮಗಾಗಿ ಆ ರಹಸ್ಯವನ್ನು ಹೇಳುತ್ತೇನೆ.." ಎಂದಿದ್ದಾರೆ ಸೋನಾಕ್ಷಿ.

"ನಮ್ಮ ತಂದೆ ಹೆಸರು ನಿಮಗೆಲ್ಲರಿಗೂ ಗೊತ್ತೇ ಇದೆ. ಅವರ ತಣ್ಣತಮ್ಮಂದಿರ ಹೆಸರು ರಾಮ್, ಲಕ್ಷ್ಮಣ್, ಭರತ್. ಇನ್ನು ನನ್ನ ಅಣ್ಣತಮ್ಮಂದಿರು ಲವ್, ಕುಶ. ಆದಕಾರಣ ರಾಮಾಯಣ್ ಎಂಬ ಹೆಸರನ್ನು ನಮ್ಮ ಬಂಗಲೆಗೆ ಸೂಕ್ತ ಅನ್ನಿಸುತ್ತದೆ ಎಂದು ಕುಟುಂಬಿಕರು ಭಾವಿಸಿದರು. ಹಾಗಾಗಿ ಆ ಹೆಸರು ಇಡಲಾಗಿದೆ. ಆದರೆ ಒಮ್ಮೊಮ್ಮೆ ಮಹಾಭಾರತ ಸಂಘಟನೆಗಳು (ಯುದ್ಧ) ಸಹ ರಾಮಾಯಣದಲ್ಲಿ ಸೃಷ್ಟಿಸುವ ಸಾಮರ್ಥ್ಯ ನಮಗಿದೆ" ಎಂದು ತಮಾಷೆಗೆ ಹೇಳಿದ್ದಾರೆ.