ತಂದೆ ಮೇಲೆ #MeToo ಆರೋಪ: ಮೌನ ಮುರಿದ ನಂದಿತಾ ದಾಸ್

ತನ್ನ ತಂದೆ, ಚಿತ್ರಕಲಾವಿದ ಜತಿನ್ ದಾಸ್ ಮೇಲಿನ ಲೈಂಗಿಕ ಕಿರುಕುಳ ಆರೋಪಗಳ ಬಗ್ಗೆ ಅವರ ಪುತ್ರಿ, ಸಿನಿಮಾ ನಿರ್ದೇಶಕಿ, ನಟಿ ನಂದಿತಾ ದಾಸ್ ಮೌನ ಮುರಿದಿದ್ದಾರೆ. #MeToo ಅಭಿಯಾನಕ್ಕೆ ತಾನು ಬೆಂಬಲ ನೀಡುತ್ತೇನೆ ಎಂದಿದ್ದಾರೆ. ನಿಷಾ ಬೋರಾ ಎಂಬ ಮಹಿಳೆ ಮಂಗಳವಾರ (ಅಕ್ಟೋಬರ್ 16) ಜತಿನ್ ವಿರುದ್ಧ ಆರೋಪಗಳನ್ನು ಮಾಡಿದ್ದಾರೆ. ತನ್ನ 14 ವರ್ಷ ವಯಸ್ಸಿನಲ್ಲಿ ಅವರು ಲೈಂಗಿಕ ದೌರ್ಜನ್ಯ ಎಸಗಿದ್ದಾಗಿ ಆರೋಪಿಸಿದ್ದಾರೆ.

ತನ್ನ ತಂದೆ ಬಗ್ಗೆ ಬಂದಿರುವ ಆರೋಪಗಳು ಹಾಗೂ 'ಮಿ ಟೂ' ಅಭಿಯಾನದ ಹಿನ್ನೆಲೆಯಲ್ಲಿ ನಂದಿತಾ ದಾಸ್ ಫೇಸ್‌ಬುಕ್‌ನಲ್ಲಿ ಪೋಸ್ಟ್ ಒಂದನ್ನು ಮಾಡಿದ್ದಾರೆ. "MeToo ಅಭಿಯಾನಕ್ಕೆ ನನ್ನ ಬೆಂಬಲ ಯಾವಾಗಲೂ ಇದ್ದೇ ಇರುತ್ತದೆ. ಆದರೆ ತನ್ನ ತಂದೆ ವಿರುದ್ಧ ಮುಜುಗರಕ್ಕೀಡಾಗುವ ಸುಳ್ಳು ಆರೋಪಗಳು ಬಂದಿವೆ. ಅವೆಲ್ಲವನ್ನೂ ಅವರು ತಳ್ಳಿಹಾಕಿದ್ದಾರೆ. ಮಹಿಳೆಯರು/ಪುರುಷರು ಮಾತನಾಡಲು ಇದೇ ಸೂಕ್ತ ಸಮಯ. ಅವರು ಹೇಳುವ ಸಂಗತಿಗಳನ್ನು ನಾವು ಕೇಳಬೇಕು. ಆದರೆ ಆರೋಪಗಳು ಮಿ ಟೂ ಅಭಿಯಾನವನ್ನು ಅಡ್ಡದಾರಿ ಹಿಡಿಸುವಂತೆ ಇರಬಾರದು" ಎಂದಿದ್ದಾರೆ ನಂದಿತಾ ದಾಸ್.


MeToo ಆರೋಪದ ಬಗ್ಗೆ ಜತಿನ್ ಪ್ರತಿಕ್ರಿಯಿಸುತ್ತಾ, "ಆಕೆ ಅಸಭ್ಯವಾಗಿ ಮಾತನಾಡುತ್ತಿದ್ದಾರೆ. ನನಗೆ ಶಾಕ್ ಆಯಿತು. ಈಗ ಇಂತಹವು ನಡೆಯುತ್ತಲೇ ಇವೆ. ಆಕೆ ಯಾರು ಎಂದು ನನಗೆ ಗೊತ್ತಿಲ್ಲ. ಅವರನ್ನು ನಾನು ಎಂದೂ ನೋಡಿಲ್ಲ. ಒಂದು ವೇಳೆ ಆಕೆಯನ್ನು ಯಾವ ಸಂದರ್ಭದಲ್ಲಾದರೂ ಭೇಟಿಯಾಗಿದ್ದರೆ ಆ ರೀತಿಯಂತೂ ನಡೆದುಕೊಂಡಿರಲ್ಲ. ಮಿ ಟೂ ಹೆಸರಿನಲ್ಲಿ ಕೆಲವರು ಆಟ ಆಡುತ್ತಿದ್ದಾರೆ. ಇನ್ನೂ ಕೆಲವರು ನಿಜ ಹೇಳುತ್ತಿದ್ದಾರೆ" ಎಂದಿದ್ದಾರೆ ಜತಿನ್.