ಅಕ್ಕ, ಭಾವನ ದುಡ್ಡಲ್ಲೇನು ನಾನು ಬದುಕುತ್ತಿಲ್ಲ: ನಟಿ ಶಮಿತಾ ಶೆಟ್ಟಿ

ಬಾಲಿವುಡ್ ಬಳುಕುವ ಬಳ್ಳಿ ಶಿಲ್ಪಾ ಶೆಟ್ಟಿ ತಂಗಿ ಶಮಿತಾ ಶೆಟ್ಟಿ ಅಕ್ಕ ಮತ್ತು ಭಾವನ ನೆರಳಲ್ಲೇ ಬೆಳೆಯುತ್ತಿದ್ದಾರಾ? ಅವರ ದುಡ್ಡಲ್ಲೇ ಜೀವನ ನಡೆಸುತ್ತಿದ್ದಾರಾ? ಎಂಬ ಮಾತುಗಳಿಗೆ ಉತ್ತರ ನೀಡಿದ್ದಾರೆ. ಅಷ್ಟೇ ಅಲ್ಲದೆ ತಮ್ಮ ವೃತ್ತಿ ಬದುಕಿನ ಬಗ್ಗೆಯೂ ಮನದಾಳದ ಮಾತುಗಳನ್ನು ಹಂಚಿಕೊಂಡಿದ್ದಾರೆ.

ಬಾಂಬೆ ಟೈಮ್ಸ್‌ಗೆ ನೀಡಿರುವ ಸಂದರ್ಶನದಲ್ಲಿ ಶಮಿತಾ ಈ ರೀತಿ ಹೇಳಿದ್ದಾರೆ. "ನನ್ನ 27ನೇ ವರ್ಷಕ್ಕೆ ನನ್ನ ಜೀವನ ಬದಲಾಯಿತು. ವೃತ್ತಿ ಬದುಕಿನಲ್ಲಿ ಸಾಕಷ್ಟು ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದ್ದೇನೆ. ಆದರೂ ಮೇಲಕ್ಕೇರಲಿಲ್ಲ. ಈ ಬಗ್ಗೆ ನನ್ನಲ್ಲಿ ನಾನೇ ಭಾವನಾತ್ಮಕವಾಗಿ, ಅಧ್ಯಾತ್ಮಿಕವಾಗಿ ಹಲವಾರು ಪ್ರಶ್ನೆಗಳನ್ನು ಹಾಕಿಕೊಂಡೆ. ಆಗ ಕೆಲವೊಂದು ಸಂಗತಿಗಳು ನನ್ನ ಅರಿವಿಗೆ ಬಂದವು. ನನ್ನ ಶಕ್ತಿಯಲ್ಲಾ ತಪ್ಪು ದಾರಿಯಲ್ಲಿ ಪೋಲಾಗುತ್ತಿದೆ ಅನ್ನಿಸಿತು" ಎಂದಿದ್ದಾರೆ.

"ನನ್ನ ನಿಜವಾದ ಶಕ್ತಿ ಸಾಮರ್ಥ್ಯ ಅರಿಯಲು ಮೂರು ವರ್ಷ ತೆಗೆದುಕೊಂಡೆ. ಆ ಹಂತದಲ್ಲಿ ಯಾವುದೇ ಸಿನಿಮಾ ಒಪ್ಪಿಕೊಳ್ಳಲಿಲ್ಲ. ಬಂದ ಸಾಕಷ್ಟು ಅವಕಾಶಗಳನ್ನು ಒಪ್ಪಿಕೊಳ್ಳಲಿಲ್ಲ. ಬಹುಶಃ ಇವರಿಗೆ ಆಸಕ್ತಿ ಇಲ್ಲ, ಸೊಕ್ಕು ಇರಬೇಕು, ಸೆಲೆಕ್ಟೀವ್ ಇರಬೇಕು ಎಂದುಕೊಂಡರು. ನಿಜವಾದ ಕಾರಣ ಏನೆಂದರೆ ನನಗೆ ಯಾವುದೂ ಆಸಕ್ತಿದಾಯಕ ಅನ್ನಿಸಲಿಲ್ಲ" ಎಂದು ಹೇಳಿದ್ದಾರೆ.

"ಇಂದಿಗೂ ಜನ ನನ್ನನ್ನು ಶಿಲ್ಪಾ ಶೆಟ್ಟಿ ತಂಗಿ ಎಂದೇ ಗುರುತಿಸುತ್ತಾರೆ. ಈ ಬಗ್ಗೆ ನನಗೆ ಅಭ್ಯಂತರ ಏನೂ ಇಲ್ಲ. ಕೆಲವೊಂದು ಸಲ ನನ್ನನು ಶಿಲ್ಪಾ ಎಂದೇ ಕರೆಯುತ್ತಾರೆ. ಬಹುಶಃ ಸ್ವಲ್ಪ ಅವರಂತೆ ಕಾಣುವ ಕಾರಣಕ್ಕೆ ಆ ರೀತಿ ಕರೆಯುತ್ತಾರೆ. ಈ ಬಗ್ಗೆಯೂ ನನಗೇನೂ ತಕರಾರಿಲ್ಲ. ಅಕ್ಕನ ಜತೆಗೆ ಹೋಲಿಕೆ ಮಾಡಿದಾಗಲೆಲ್ಲಾ ನನಗೆ ಹೆಮ್ಮೆ ಅನ್ನಿಸುತ್ತಿತ್ತು. ಕೆಲವೊಮ್ಮೆ ಸಾಮಾಜಿಕ ಮಾಧ್ಯಮದಲ್ಲಿ ಕಾಮೆಂಟ್‌ಗಳೂ ಬರುತ್ತಿದ್ದವು. ಅಕ್ಕ ಮತ್ತು ಭಾವನ ಮರ್ಜಿಯಲ್ಲಿ ಬದುಕುತ್ತಿದ್ದೇನೆ ನಾನು ಎಂಬ ಮಾತುಗಳು ಕೇಳಿಬಂದವು. ನಾನು ಅವರ ದುಡ್ಡದಲ್ಲಿ ಬದುಕುತ್ತಿಲ್ಲ, ನನ್ನ ಜೀವನ ನಾನು ನಿಭಾಯಿಸಿಕೊಳ್ಳುತ್ತಿದ್ದೇನೆ" ಎಂದಿದ್ದಾರೆ ಶಮಿತಾ.

ಚಿತ್ರರಂಗಕ್ಕೆ ಅಡಿಯಿಡಲು ಅಕ್ಕ ಸಹಕರಿಸಿದರು. ಆಮೇಲೆ ಏನಿದ್ದರೂ ಲಕ್ ಇರಬೇಕು. ನನ್ನ ದುರಾದೃಷ್ಟ ಎಂದರೆ ಲಕ್ ನನ್ನ ಕಡೆ ಇರಲಿಲ್ಲ. ಕೆಲವೊಂದು ತಪ್ಪು ನಿರ್ಧಾರಗಳನ್ನೂ ತೆಗೆದುಕೊಂಡೆ. ಬಹಳಷ್ಟು ಹೆಣ್ಣು ಮಕ್ಕಳಿಗೆ ಚಿತ್ರೋದ್ಯಮದಲ್ಲಿ ನನಗೆ ಸಿಕ್ಕಷ್ಟು ಸಪೋರ್ಟ್ ಸಿಗಲ್ಲ. ಎಷ್ಟೆಲ್ಲಾ ಕಷ್ಟ ಇದೆ ಎಂಬುದನ್ನು ನಾನು ನೋಡಿದ್ದೇನೆ ಎಂದು ಹೇಳಿದ್ದಾರೆ ಶಮಿತಾ ಶೆಟ್ಟಿ.