ಸೊಸೆಗೆ 20 ಕ್ಯಾರೆಟ್‌ ಡೈಮಂಡ್‌ ರಿಂಗ್‌ ನೀಡಲಿರುವ ನಟಿ ಶಿಲ್ಪಾ ಶೆಟ್ಟಿ! ಆದರೆ ಒಂದು ಕಂಡೀಷನ್‌; ಏನದು?

ಬಾಲಿವುಡ್‌ನ ಬಳುಕುವ ಬಳ್ಳಿ ಶಿಲ್ಪಾ ಶೆಟ್ಟಿ ಸಿನಿಮಾಗಳಿಂದ ದೂರ ಉಳಿದುಕೊಂಡಿದ್ದರೂ ಕೂಡ ಸೋಶಿಯಲ್‌ ಮೀಡಿಯಾ ಮೂಲಕ ಅಭಿಮಾನಿಗಳ ಜೊತೆ ಸದಾ ಸಂಪರ್ಕದಲ್ಲಿ ಇರುತ್ತಾರೆ. ಅವರು ಇತ್ತೀಚೆಗೆ ನೀಡಿದ ಒಂದು ಸಂದರ್ಶನದಲ್ಲಿ ತಮ್ಮ ಭಾವಿ ಸೊಸೆಯ ಬಗ್ಗೆ ಮಾತನಾಡಿದ್ದಾರೆ! ಆ ವಿಚಾರ ಈಗ ಎಲ್ಲೆಡೆ ವೈರಲ್‌ ಆಗಿದೆ. ತಮ್ಮ ಸೊಸೆಗೆ ದುಬಾರಿ ಗಿಫ್ಟ್‌ ನೀಡುವುದಾಗಿ ಅವರು ಹೇಳಿದ್ದಾರೆ.

ಶಿಲ್ಪಾ ಶೆಟ್ಟಿ ಪುತ್ರ ವಿಯಾನ್‌ ಇನ್ನೂ ಚಿಕ್ಕವನು. ಆತನಿಗೆ ಈಗ 8 ವರ್ಷ ವಯಸ್ಸು. ಅಷ್ಟರಲ್ಲಾಗಲೇ ಆತನ ಭಾವಿ ಪತ್ನಿ ಬಗ್ಗೆ ಶಿಲ್ಪಾ ಶೆಟ್ಟಿ ಮಾತನಾಡಿದ್ದಾರೆ. 'ನಾನು ಅವಳಿಗೆ ನನ್ನ ಬಳಿ ಇರುವ 20 ಕ್ಯಾರೆಟ್‌ ಡೈಮಂಡ್‌ ರಿಂಗ್‌ ಉಡುಗೊರೆಯಾಗಿ ನೀಡುತ್ತೇನೆ. ಆದರೆ ಒಂದು ಕಂಡೀಷನ್‌ ಇದೆ' ಎಂದು ಶಿಲ್ಪಾ ಹೇಳಿದ್ದಾರೆ. ಹಾಗಾದರೆ ಆ ಕಂಡಿಷನ್‌ ಏನು? ಸಿಂಪಲ್‌; ತಮ್ಮ ಜೊತೆ ಆಕೆ ಚೆನ್ನಾಗಿ ಹೊಂದಿಕೊಂಡು ಇರಬೇಕಂತೆ!

ಶಿಲ್ಪಾ ಶೆಟ್ಟಿಗೆ ಆಭರಣಗಳೆಂದರೆ ತುಂಬ ಇಷ್ಟ. ಸಂದರ್ಭ ಒದಗಿಬಂದಾಗಲೆಲ್ಲ ಅವರು ಬಗೆಬಗೆಯ ಆಭರಣಗಳನ್ನು ಖರೀದಿಸುತ್ತಿರುತ್ತಾರೆ. ಮುಂದೊಂದು ದಿನ ಅವು ತುಂಬ ಬೆಲೆ ಬಾಳುವ ವಸ್ತುಗಳಾಗಿರುತ್ತವೆ ಎಂಬ ಕಾರಣಕ್ಕೆ ಅವರು ಆಭರಣದ ಬಗ್ಗೆ ವಿಶೇಷ ಆಸಕ್ತಿ ತೋರಿಸುತ್ತಾರೆ. ಶಿಲ್ಪಾ ಶೆಟ್ಟಿಗೆ ಅವರ ಪತಿ ರಾಜ್‌ ಕುಂದ್ರಾ ಪ್ರಪೋಸ್‌ ಮಾಡಿದ್ದು ಕೂಡ 5 ಕ್ಯಾರೆಟ್‌ನ ಡೈಮಂಡ್‌ ರಿಂಗ್ ನೀಡುವ ಮೂಲಕ ಎಂಬುದು ವಿಶೇಷ.

also read: ಅಂದು 5 ಕ್ಯಾರೆಟ್ ಡೈಮಂಡ್ ರಿಂಗ್ ಹಾಕಿ ಪ್ರಪೋಸ್ ಮಾಡಿದ್ದರೂ ಶಿಲ್ಪಾ ಶೆಟ್ಟಿಗೆ ಸಮಾಧಾನವಾಗಿರಲಿಲ್ಲ!

ಸಿನಿಮಾಗಳಿಗಿಂತಲೂ ಮಕ್ಕಳ ಬಗ್ಗೆ ಹೆಚ್ಚು ಗಮನ ನೀಡುತ್ತಿದ್ದಾರೆ ಶಿಲ್ಪಾ ಶೆಟ್ಟಿ. ಆ ಬಗ್ಗೆಯೂ ಅವರು ಹೇಳಿಕೊಂಡಿದ್ದಾರೆ. 'ನೀವು ನನ್ನ ಇನ್‌ಸ್ಟಾಗ್ರಾಮ್‌ ಖಾತೆಯನ್ನು ಗಮನಿಸಬಹುದು. ಅದರಲ್ಲಿ Mom ಎಂದು ಮೊದಲು ಬರೆದುಕೊಂಡಿದ್ದೇನೆ. ನಂತರ ಹೆಂಡತಿ, ನಟಿ, ಉದ್ಯಮಿ ಎಲ್ಲ. ಮಕ್ಕಳೇ ನನ್ನ ಮೊದಲ ಆದ್ಯತೆ' ಎಂದು ಅವರು ಹೇಳಿದ್ದಾರೆ. 2020ರ ಆರಂಭದಲ್ಲಿ ಬಾಡಿಗೆ ತಾಯಿ ಮೂಲಕ ಅವರು ಹೆಣ್ಣು ಮಗು ಪಡೆದಿದ್ದಾರೆ. ಅದಕ್ಕೆ ಸಮೀಶಾ ಎಂದು ಹೆಸರು ಇಟ್ಟಿದ್ದಾರೆ.

also read: ಮಂಗಳೂರಿನ ಸುಂದರಿ ನಟಿ ಶಿಲ್ಪಾ ಶೆಟ್ಟಿ ದಂಪತಿ ಮೇಲೆ ದೊಡ್ಡ ವಂಚನೆ ಆರೋಪ!