ಕರ್ನಾಟಕದಲ್ಲಿ ಡಬ್ಬಿಂಗ್‌ ಬರಬೇಕು ಎನ್ನುವವರ ಕೂಗಿಗೆ ನಿಧಾನವಾಗಿ ಒಂದೊಂದೆ ಧ್ವನಿಗಳು ಸೇರುತ್ತಿವೆ. ಈಗಾಗಲೇ ತಮಿಳಿನ ಸತ್ಯದೇವ್‌ ಐಪಿಎಸ್‌ ಎಂಬ ಸಿನಿಮಾವನ್ನು ಕನ್ನಡಕ್ಕೆ ಡಬ್ಬಿಂಗ್‌ ಮಾಡಿ ಅದನ್ನು ಬಿಡುಗಡೆ ಮಾಡುವ ಪ್ರಯತ್ನವನ್ನು ಮಾಡಲಾಯಿತು.
ಈಗ ಫಾಸ್ಟ್‌ ಆ್ಯಂಡ್‌ ಫ್ಯೂರಿಯಸ್‌ ಸಿನಿಮಾವನ್ನು ಕನ್ನಡಕ್ಕೆ ಡಬ್ಬಿಂಗ್‌ ಆಗಿದ್ದು ಇನ್ನೇನು ತೆರೆಗೆ ಬರಲು ಎಲ್ಲ ಸಿದ್ಧತೆಯನ್ನು ನಡೆಸಿದೆ. ಈ ನಡುವೆ ಕನ್ನಡಕ್ಕೆ ಡಬ್ಬಿಂಗ್‌ ಕಂಟೆಂಟ್‌ ತರಲು ನಡೆಸಿದ ಹೋರಾಟದ ಬಗ್ಗೆ ಒಂದಷ್ಟು ಜನ ಸೇರಿಕೊಂಡು ಕಿರು ಚಿತ್ರ ಮಾಡಿದ್ದಾರೆ. ಇದಕ್ಕೆ ಆರು ವರ್ಷಗಳ ಹೋರಾಟ ಮಾಡಿ ಕನ್ನಡಕ್ಕೆ ಡಬ್ಬಿಂಗ್‌ ಬಂದಿದೆ.
ಡಬ್ಬಿಂಗ್‌ ಎಂಬುದು ಪ್ರತಿಯೊಬ್ಬ ಕನ್ನಡಿಗನ ಹಕ್ಕು, ಅವರಿಗೆ ಇಷ್ಟವಾದ ಸಿನಿಮಾ, ಇಷ್ಟವಾದ ಟಿ ವಿ ಕಾರ್ಯಕ್ರಮಗಳನ್ನು ಕನ್ನಡದಲ್ಲಿ ಬಿಟ್ಟು ಬೇರೆ ಭಾಷೆಯಲ್ಲಿ ನೋಡಬೇಕಿತ್ತು. ಇದರಿಂದ ಕನ್ನಡದ ಮಕ್ಕಳು ವಿಜ್ಞಾನ ಚಾನಲ್‌, ನ್ಯಾಷನಲ್‌ ಜಿಯಾಗ್ರಫಿಯಂತಹ ಚಾನೆಲ್‌ಗಳಲ್ಲಿ ಪ್ರಸಾರವಾಗುತ್ತಿದ್ದ ಕಾರ್ಯಕ್ರಮಗಳನ್ನು ಇಂಗ್ಲೀಷ್‌ ಭಾಷೆಯಲ್ಲಿ ನೋಡಿ ಕನ್ನಡದಿಂದ ದೂರವಾಗುತ್ತಿದ್ದರು.
ಇದನ್ನು ಗಮನಿಸಿದ ಬನವಾಸಿ ಬಳಗ 2010ರಲ್ಲಿ ಕನ್ನಡದಲ್ಲೇ ಎಲ್ಲವೂ ಸಿಗಬೇಕು ಎಂದು ಡಬ್ಬಿಂಗ್‌ ಬೇಕು ಎನ್ನುವ ಹೋರಾಟವನ್ನು ಆರಂಭಿಸಿದರು. ಕರ್ನಾಟಕದಲ್ಲಿ ಕಾನೂನು ಬಾಹಿರವಾಗಿ ಡಬ್ಬಿಂಗ್‌ ಮೇಲೆ ನಿಷೇಧ ಹೇರಿರುವುದನ್ನು ತೆರೆವು ಗೊಳಿಸಬೇಕು ಎಂದು ಮುಖ್ಯಮಂತ್ರಿಗಳಿಗೆ ಮನವಿ ಪತ್ರವನ್ನು ನೀಡಲಾಯಿತು. ಜತೆಗೆ ಈ ಡಬ್ಬಿಂಗ್‌ ಹೇಗೆ ಕನ್ನಡಪರ ಎಂಬುದರ ಬಗ್ಗೆ ಅರಿವು ಮೂಡಿಸಲು ಕಾರ್ಯಾಗಾರಗಳು, ಪುಸ್ತಕಗಳನ್ನು ಬನವಾಸಿ ಬಳಗದ ಮೂಲಕ ಹೊರ ತರಲಾಯಿತು. ಹೀಗೆ ಆರಂಭವಾದ ಹೋರಾಟಕ್ಕೆ ಸತ್ಯದೇವ್‌ ಐಪಿಎಸ್‌ ಸಿನಿಮಾ ಡಬ್‌ ಆಗಿ ರಿಲೀಸ್‌ ಆಗುವ ಮೂಲಕ ಒಂದು ರೀತಿಯಲ್ಲಿ ಜಯ ಸಿಕ್ಕಂತಾಯಿತು.
ಈ ರೀತಿಯ ಸಂಪೂರ್ಣ ಹೋರಾಟದ ಏಳು ಬೀಳುಗಳನ್ನು ಬನವಾಸಿ ಬಳಗ ಒಂದು ಕಿರು ಚಿತ್ರ ಮಾಡಿ ಸಾಮಾಜಿ ಜಾಲತಾಣದಲ್ಲಿ ಅಪ್‌ಲೋಡ್‌ ಮಾಡಿದೆ.