#Metoo ಆರೋಪದ ಬೆನ್ನಲ್ಲೇ ಟಿವಿ ಶೋದಿಂದ ಬ್ರೇಕ್ ಪಡೆದ ಅನು ಮಲಿಕ್

ಮುಂಬಯಿ: ಚಿತ್ರರಂಗದಲ್ಲಿ ಸಂಚಲನ ಎಬ್ಬಿಸಿರುವ ಮಿಟೂ ಆರೋಪ ಮತ್ತು ಪ್ರತ್ಯಾರೋಪದ ಬೆನ್ನಲ್ಲೇ ಸೋನಿ ಟಿವಿಯ ಪ್ರಸಿದ್ಧ ಇಂಡಿಯನ್ ಐಡಲ್ ಸೀಸನ್ 10ರ ಜಡ್ಜ್‌ಗಳಲ್ಲಿ ಒಬ್ಬರಾದ ಗೀತರಚನೆಕಾರ, ಗಾಯಕ ಅನು ಮಲಿಕ್ ಟಿವಿ ಶೋದಿಂದ ಹೊರನಡೆದಿದ್ದಾರೆ.

ತಮ್ಮ ಮೇಲಿನ ಆರೋಪ ಒಪ್ಪಿಕೊಳ್ಳದಿದ್ದರೂ, ಕೆಲಸ ಮತ್ತು ಟಿವಿ ಶೋದಲ್ಲಿ ಏಕಾಗ್ರತೆ ವಹಿಸಲಾಗುತ್ತಿಲ್ಲ. ಹೀಗಾಗಿ ಸದ್ಯಕ್ಕೆ ಟಿವಿ ಶೋದಿಂದ ಬ್ರೇಕ್ ಪಡೆದುಕೊಳ್ಳುತ್ತಿದ್ದೇನೆ ಎಂದು ಅನು ಮಲಿಕ್ ಹೇಳಿದ್ದಾರೆ.

ಅನು ಮಲಿಕ್ ಟಿವಿ ಶೋದಿಂದ ಹೊರನಡೆದಿರುವ ಬಗ್ಗೆ ಸೋನಿ ಎಂಟರ್‌ಟೈನ್‌ಮೆಂಟ್ ಟಿವಿ ಕೂಡ ಪ್ರಕಟಣೆ ಹೊರಡಿಸಿದೆ. ಇಂಡಿಯನ್ ಐಡಲ್‌ನ ಜ್ಯೂರಿ ಪ್ಯಾನಲ್‌ನಲ್ಲಿ ಅನು ಮಲಿಕ್ ಇರುವುದಿಲ್ಲ, ಟಿವಿ ಶೋ ನಿಗದಿಯಂತೆ ಮುಂದುವರಿಯುತ್ತದೆ. ಅನು ಮಲಿಕ್ ಸ್ಥಾನಕ್ಕೆ ಇನ್ನೋರ್ವ ತೀರ್ಪುಗಾರರು ಬರಲಿದ್ದಾರೆ ಎಂದು ಸೋನಿ ಟಿವಿ ಹೇಳಿದೆ.

ಅನು ಮಲಿಕ್ ತಮ್ಮ ಜತೆ ಅನುಚಿತವಾಗಿ ನಡೆದುಕೊಂಡಿದ್ದಾರೆ ಎಂದು ಶ್ವೇತಾ ಪಂಡಿತ್, ಸೋನಾ ಮೋಹಪಾತ್ರ ಮತ್ತಿತರರು ಆರೋಪಿಸಿದ್ದರು. ಆದರೆ ಅನು ಮಲಿಕ್ ತಮ್ಮ ಮೇಲಿನ ಆರೋಪ ನಿರಾಕರಿಸಿದ್ದಾರೆ.