ಸ್ಮೋಕಿಂಗ್ ಮಾಡಿ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಿಬಿದ್ದ ಪ್ರಿಯಾಂಕಾ!

ಬಾಲಿವುಡ್ ನಟಿ ಪ್ರಿಯಾಂಕಾ ಚೋಪ್ರಾ ಅವರು ಇತ್ತೀಚೆಗೆ ಪ್ರತಿಯೊಂದಕ್ಕೂ ಟ್ರೋಲ್ ಆಗತೊಡಗಿದ್ದಾರೆ. ಮದುವೆ ಮುಗಿದಾಗಿನಿಂದ ಇಂದಿನವರೆಗೂ ಪ್ರಿಯಾಂಕಾ ಚೋಪ್ರಾ ಅದೆಷ್ಟು ಬಾರಿ ಟ್ರೋಲ್ ಆಗಿದ್ದಾರೆ ಎಂಬುದು ಬಹುಶಃ ಯಾರಿಗೂ ಲೆಕ್ಕವಿರಲಿಕ್ಕಿಲ್ಲ. ಪ್ರಿಯಾಂಕಾ ಕುಳಿತರೂ ನಿಂತರೂ ನಡೆದರೂ ಅದೊಂದು ದೊಡ್ಡ ಸುದ್ದಿಯೇ ಎಂಬಂತಾಗಿದೆ. ಆದರೆ, ಇತ್ತೀಚೆಗೆ ನಟಿ ಪ್ರಿಯಾಂಕಾ ಟ್ರೋಲ್ ಆಗಿದ್ದು ಮಾತ್ರ ವಿಪರ್ಯಾಸವೇ ಎನ್ನಬಹುದು.

ಹಾಗಾದರೆ ಆಗುತ್ತಿರುವುದೇನು? ಈ ಮೊದಲೊಮ್ಮೆ, ದೀಪಾವಳಿ ವೇಳೆ ನಟಿ ಪ್ರಿಯಾಂಕಾ ಅವರು "ದೀಪಾವಳಿ ಆಚರಣೆ ವೇಳೆ ಪಟಾಕಿ ಹಚ್ಚದಿರಿ, ಇದರಿಂದ ಅಸ್ತಮಾ ರೋಗ ಹರಡುತ್ತದೆ" ಎಂದಿದ್ದರು. ಅಷ್ಟೇ ಅಲ್ಲ, ನಟಿ ಪ್ರಿಯಾಂಕಾ ಕಳೆದ ವರ್ಷ ವಿಡಿಯೋವೊಂದರಲ್ಲಿ "ನಾನು 5 ವರ್ಷದವಳಿದ್ದಾಗ ಅಸ್ತಮಾ ರೋಗದಿಂದ ಬಳಲುತ್ತಿದ್ದೆ. ದೀಪಾವಳಿ ವೇಳೆ ಪಟಾಕಿ ಹಚ್ಚದಿರಿ, ಇದು ಅಸ್ತಮಾ ರೋಗಿಗಳಿಗೆ ತೊಂದರೆ ನೀಡುತ್ತದೆ" ಎಂದು ಬುದ್ಧಿಮಾತು ಹೇಳಿದ್ದರು.

ಆದರೆ, ಇತ್ತೀಚೆಗೆ ನಟಿ ಪ್ರಿಯಾಂಕಾ ಚೋಪ್ರಾ ತಮ್ಮ ಪತಿ ನಿಕ್‌ ಜೋನ್ಸ್‌ ಮತ್ತು ತಾಯಿ ಮಧು ಛೋಪ್ರಾ ಜತೆಗೂಡಿ ಮಿಯಾಮಿ ಯಾಚ್‌ ಬೀಚ್‌ನಲ್ಲಿ 'ಧಂ' ಹೊಡೆದ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್‌ ಆಗಿದೆ. ಈ ಫೋಟೋ ನೋಡಿದ ಸೋಷಿಯಲ್ ಮೀಡಿಯಾ ಮಂದಿ ನಟಿ ಪ್ರಿಯಾಂಕಾ ಚೋಪ್ರಾ ಅವರನ್ನು ತೀವ್ರ ತರಾಟೆಗೆ ತೆಗೆದುಕೊಂಡಿದ್ದಾರೆ. ಬೇರೆಯವರಿಗೆ ಬುದ್ಧಿ ಹೇಳಿದ್ದ ಪ್ರಿಯಾಂಕಾ ಈಗ ತಾವೇ ಸ್ಮೋಕಿಂಗ್ ಮಾಡುವ ಮೂಲಕ ವಿವಾದಕ್ಕೆ ಒಳಗಾಗಿದ್ದಾರೆ.

ಯಾಕೆ ಸೋಷಿಯಲ್ ಮೀಡಿಯಾ ಮಂದಿ ನಟಿ ಪ್ರಿಯಾಂಕಾ ವಿರುದ್ಧ ಮುಗಿಬಿದ್ದಿದ್ದಾರೆ ಎಂದರೆ, ಕಳೆದ ದೀಪಾವಳಿ ಹಬ್ಬದ ವೇಳೆ ನಟಿ ಪ್ರಿಯಾಂಕಾ "ದೀಪಾವಳಿ ವೇಳೆ ಪಟಾಕಿ ಸಿಡಿಸಿದರೆ ಪರಿಸರಕ್ಕೆ ಹಾನಿಯಾಗಿ ಉಸಿರಾಡಲು ಕಷ್ಟವಾಗುತ್ತದೆ. ಪಟಾಕಿ ಹೊಗೆ ಆರೋಗ್ಯಕ್ಕೆ ಭಾರೀ ಹಾನಿಕರ. ದೀಪಾವಳಿ ವೇಳೆ ದಯವಿಟ್ಟು ಪಟಾಕಿ ಸಿಡಿಸಬೇಡಿ" ಎಂದು ತಮ್ಮ ಸೋಷಿಯಲ್ ಮೀಡಿಯಾ ಪೇಜ್‌ನಲ್ಲಿ ಮನವಿ ಮಾಡಿಕೊಂಡಿದ್ದರು. ಆಗ ಅವರ ಮನವಿಯನ್ನು ತುಂಬಾ ಮಂದಿ ಒಪ್ಪಿ ಪ್ರಿಯಾಂಕಾ ಅವರ ಪರಿಸರ ಕಾಳಜಿಯನ್ನು ಮೆಚ್ಚಿ ಕೊಂಡಾಡಿದ್ದರು.

ಆದರೆ, ಈಗ ನೋಡಿದರೆ ಪ್ರಿಯಾಂಕಾ ಅವರು 'ಧಂ' ಎಳೆಯುತ್ತಿರುವ ಫೋಟೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಅದನ್ನು ನೋಡಿದ ಸೋಷಿಯಲ್ ಮೀಡಿಯಾ ಮಂದಿ ಪ್ರಿಯಾಂಕಾ ವಿರುದ್ಧ ಗರಂ ಆಗಿದ್ದಾರೆ. ಕಾರಣ, ಪ್ರಿಯಾಂಕಾ ಅಭಿಮಾನಿಗಳು ಅವರನ್ನು ಅದೇ ರೀತಿ ಫಾಲೋ ಮಾಡಿದರೆ ಗತಿಯೇನು? ಪಟಾಕಿ ಸಿಡಿಸಿದರೆ ಪರಿಸರಕ್ಕೆ ಹಾನಿಯಾಗುವಂತೆ ಸಿಗರೇಟ್ ಹೊಗೆ ಸಹ ಪರಿಸರಕ್ಕೆ ಹಾನಿ ಮಾಡುತ್ತದೆ. ಯಾಕೆ ಪ್ರಿಯಾಂಕಾ ಅದನ್ನು ಅರಿತಿಲ್ಲ ಎಂದು ಪ್ರಿಯಾಂಕಾ ವಿರುದ್ಧ ಕೋಪಗೊಂಡಿದ್ದಾರೆ. ಒಟ್ಟಿನಲ್ಲಿ, ಪ್ರಿಯಾಂಕಾ ಪದೇ ಪದೆ ಟ್ರೋಲ್ ಆಗುವುದು ತಪ್ಪುತ್ತಿಲ್ಲ.