ರಜ್ಜೋ ಪಾತ್ರವಿಲ್ಲದ ದಬಾಂಗ್‌ ಅಪೂರ್ಣವೆಂದ ಸೋನಾಕ್ಷಿ ಸಿನ್ಹಾ

ದಬಾಂಗ್‌ ಸರಣಿ ಚಿತ್ರಗಳಲ್ಲಿರಜ್ಜೋ ಪಾತ್ರದ ಮೂಲಕ ಜನಪ್ರಿಯರಾಗಿರುವ ನಟಿ ಸೋನಾಕ್ಷಿ ಸಿನ್ಹಾ ಈ ಪಾತ್ರವಿಲ್ಲದಿದ್ದರೆ ದಬಾಂಗ್‌ ಸಿನಿಮಾವೇ ಅಪೂರ್ಣವಾಗುತ್ತದೆ ಎಂದು ಹೇಳಿದ್ದಾರೆ. ದಬಾಂಗ್‌ 3ಯಲ್ಲೂಅವರು ಚುಲ್‌ಬುಲ್‌ ಪಾಂಡೆಯ ಪತ್ನಿ ರಜ್ಜೋ ಪಾತ್ರದಲ್ಲಿನಟಿಸುತ್ತಿದ್ದಾರೆ.

ಇತ್ತೀಚೆಗೆ ಈ ಸಿನಿಮಾದಲ್ಲಿಸೋನಾಕ್ಷಿಯ ಫಸ್ಟ್‌ ಲುಕ್‌ ಪೋಸ್ಟರ್‌ ಬಿಡುಗಡೆ ಮಾಡಿದ್ದ ಸಲ್ಲು, ಇವಳೇ ನನ್ನ ಸೂಪರ್‌ ಸೆಕ್ಸಿ ರಜ್ಜೋ ಎಂದು ಪರಿಚಯಿಸಿದ್ದರು. ಇದರಲ್ಲಿತಿಳಿ ಗುಲಾಬಿ ಬಣ್ಣದ ಸೀರೆಯುಟ್ಟಿರುವ ಸೋನಾಕ್ಷಿ ಅದರ ಮೇಲೆ ಶರ್ಟ್‌ ಧರಿಸಿ ಚುಲ್‌ಬುಲ್‌ ಪಾಂಡೆಯ ಸಿಗ್ನೇಚರ್‌ ಸನ್‌ಗ್ಲಾಸ್‌ ಧರಿಸಿದ್ದಾರೆ. ದ್ವಿಚಕ್ರ ವಾಹನದಲ್ಲಿಕುಳಿತಿರುವ ಅವರು ಕೂದಲನ್ನು ಇಳಿಬಿಟ್ಟು ಗುಲಾಬಿ ಹೂವು ಮುಡಿದುಕೊಂಡಿದ್ದಾರೆ.

ಈ ಫೋಟೋವನ್ನು ಸೋಷಿಯಲ್‌ ಮೀಡಿಯಾದಲ್ಲೂಶೇರ್‌ ಮಾಡಿಕೊಂಡಿರುವ ಸಲ್ಮಾನ್‌ ಖಾನ್‌ ಅದಕ್ಕೆ ಹಿಂದೂಸ್ಥಾನದ ಸಭ್ಯತೆಯ ಮೂರ್ತಿಯಂತಿದ್ದಾಳೆ ನಮ್ಮ ಸೂಪರ್‌ ಸೆಕ್ಸಿ ರಜ್ಜೋ ಎಂದು ಬರೆದುಕೊಂಡಿದ್ದಾರೆ. ಇದೇ ಪೋಸ್ಟರನ್ನು ಸೋನಾಕ್ಷಿ ಕೂಡ ಶೇರ್‌ ಮಾಡಿಕೊಂಡು, ಚುಲ್‌ಬುಲ್‌ ಪಾಂಡೆಯ ಪತ್ನಿ ರಜ್ಜೋ ಇಲ್ಲದ ದಬಾಂಗ್‌ ಎಂದಿಗೂ ಅಪೂರ್ಣ ಎಂದು ಕ್ಯಾಪ್ಷನ್‌ ಕೊಟ್ಟಿದ್ದಾರೆ.