ಕ್ಯಾನ್ಸರ್ ಎಂದು ಗೊತ್ತಾದ ಆ ರಾತ್ರಿಯಲ್ಲಾ ಅಳುತ್ತಲೇ ಇದ್ದೆ: ಸೋನಾಲಿ ಬೇಂದ್ರೆ

ಬಾಲಿವುಡ್‍ನ ಜನಪ್ರಿಯ ತಾರೆ ಸೋನಾಲಿ ಬೇಂದ್ರೆ ಹೈಗ್ರೇಡ್ ಕ್ಯಾನ್ಸರ್‌‌ನಿಂದ ಬಳಲುತ್ತಿರುವುದು ಗೊತ್ತೇ ಇದೆ. ಇದಕ್ಕಾಗಿ ಅವರು ಅಮೆರಿಕದಲ್ಲಿ ಕೆಲವು ದಿನಗಳ ಕಾಲ ಚಿಕಿತ್ಸೆ ಪಡೆದು ಮತ್ತೆ ಸ್ವದೇಶಕ್ಕೆ ಮರಳಿದರು. ತನಗೆ ಹೈಗ್ರೇಡ್ ಕ್ಯಾನ್ಸರ್ ಇದೆ ಎಂದು ಗೊತ್ತಾದ ದಿನದಿಂದ ಇದುವರೆಗೂ ನನ್ನ ಗಂಡ ಗೋಲ್ಡಿ ಬೆಹೆಲ್, ಮಗ ರಣವೀರ್ ಬೆನ್ನೆಲುಬಾಗಿ ನಿಂತರು ಎಂದು ಕಾರ್ಯಕ್ರಮ ಒಂದರಲ್ಲಿ ತಿಳಿಸಿದ್ದಾರೆ.

ತನ್ನ ಗೆಳತಿ, ಖ್ಯಾತ ಉದ್ಯಮಿ ಸುಸ್ಸಾನೆ ಖಾನ್ ಜತೆಗೆ ಅವರು ಶೋನಲ್ಲಿ ಪಾಲ್ಗೊಂಡಿದ್ದರು. "ನನಗೆ ಹೈಗ್ರೇಡ್ ಕ್ಯಾನ್ಸರ್ ಇದೆ ಎಂದು ಗೊತ್ತಾದ ದಿನ ಆ ರಾತ್ರಿಯಲ್ಲಾ ಅಳುತ್ತಲೇ ಇದ್ದೆ. ಆ ರಾತ್ರಿಯಲ್ಲಾ ನಿದ್ದೆ ಬರಲೇ ಇಲ್ಲ. ಪದೇಪದೇ ನನ್ನ ಗಂಡ, ಮಗ ನೆನಪಾಗುತ್ತಲೇ ಇದ್ದರು. ಅವರನ್ನೆಲ್ಲಾ ಬಿಟ್ಟು ಹೊರಟುಹೋಗುತ್ತೇನೆ ಎಂಬ ಭಯ ಕಾಡುತ್ತಿತ್ತು" ಎಂದಿದ್ದಾರೆ.

"ಆ ರಾತ್ರಿಯಲ್ಲಾ ತುಂಬಾ ಒತ್ತಡಕ್ಕೆ ಗುರಿಯಾದೆ. ಬಳಿಕ ನನಗೆ ನಾನೇ ಧೈರ್ಯ ತುಂಬಿಕೊಂಡೆ. ಇನ್ನೆಂದಿಗೂ ಅಳಬಾರದೆಂದು, ನೋವನುಭವಿಸಬಾರದು ಎಂಬ ನಿರ್ಧಾರಕ್ಕೆ ಬಂದೆ. ಅಷ್ಟೇ ಆ ಕ್ಷಣದಿಂದ ಇದುವರೆಗೂ ನಾನು ತುಂಬಾ ಆನಂದವಾಗಿ ಇದ್ದೇನೆ. ನನ್ನ ಸಂತೋಷಕ್ಕೆ ನನ್ನ ಮಗ, ಗಂಡ ಸಹ ಜತೆಯಾಗಿದ್ದಾರೆ" ಎಂದು ಹೇಳಿದ್ದಾರೆ.

"ನನ್ನ ಮಗ ರಣವೀರ್ ಕೆಲವು ಸಂಗತಿಗಳಲ್ಲಿ ನನಗೆ ಸ್ಫೂರ್ತಿಯಾಗಿದ್ದ. ತುಂಬಾ ಪ್ರಾವೀಣ್ಯ ಪಡೆದವನಂತೆ ಆಲೋಚಿಸಿದ. ನನ್ನ ಪರಿಸ್ಥಿತಿಯನ್ನು ಅರ್ಥ ಮಾಡಿಕೊಳ್ಳುವ ವಯಸ್ಸು ಅವನದಲ್ಲ. ಆದರೂ ತುಂಬಾ ಪರಿಪಕ್ವತೆ ತೋರಿದ. ಇನ್ನೆಂದಿಗೂ ಅವನನ್ನು ಅಳಿಸಬಾರದು ಎಂದು ನಗುತ್ತಲೇ ಇದ್ದೇನೆ. ಅದೇ ರೀತಿ ಇರುತ್ತೇನೆ. ನಮ್ಮ ವೈವಾಹಿಕ ಜೀವನಕ್ಕೆ 16 ವರ್ಷ. ನನ್ನ ಜೀವನದಲ್ಲಿ ನನ್ನನ್ನು ಅತ್ಯಂತ ಚೆನ್ನಾಗಿ ನೋಡಿಕೊಳ್ಳುವ ವ್ಯಕ್ತಿ ನನ್ನ ಗಂಡ" ಎಂದಿದ್ದಾರೆ ಸೋನಾಲಿ ಬೇಂದ್ರೆ.