ಸೋನಮ್‌ ಆರತಕ್ಷತೆಯಂದು ಇಡೀರಾತ್ರಿ ಡಾನ್ಸ್‌ ಮಾಡಿದ್ದರಂತೆ ಶಾರೂಖ್‌, ಸಲ್ಮಾನ್‌ & ಅನಿಲ್ ಕಪೂರ್‌

ಬಾಲಿವುಡ್‌ ನಟಿ ಸೋನಮ್‌ ಕಪೂರ್‌ ತನ್ನ ಮದುವೆ ಆರತಕ್ಷತೆಯ ಸಂಭ್ರಮವನ್ನು ನೆನಪು ಮಾಡಿಕೊಂಡಿದ್ದು, ಶಾರೂಖ್‌ ಮತ್ತು ಸಲ್ಮಾನ್‌ ಖಾನ್‌ ಇಡೀ ರಾತ್ರಿ ಡಾನ್ಸ್‌ ಮಾಡಿದ್ದನ್ನು ಸ್ಮರಿಸಿದ್ದಾರೆ.

ಪಾರ್ಟಿಯಲ್ಲಿ ಪಾಲ್ಗೊಂಡಿದ್ದ ಶಾರೂಖ್‌ ಖಾನ್‌, ಸಲ್ಮಾನ್‌ ಖಾನ್‌, ರಣವೀರ್‌ ಸಿಂಗ್‌ ಮತ್ತಿತರ ಸ್ಟಾರ್‌ಗಳು ಹಿಂದಿ ಹಾಡುಗಳಿಗೆ ಭರ್ಜರಿ ಸ್ಟೆಪ್ಸ್‌ ಹಾಕಿದ್ದರು.

ಡ್ಯಾಡಿ ಅನಿಲ್‌ ಕಪೂರ್‌, ಸಲ್ಮಾನ್‌ ಖಾನ್‌ ಮತ್ತು ಶಾರೂಖ್‌ ಖಾನ್‌ ಎಷ್ಟು ಹೊತ್ತಾದರೂ ಸ್ಟೇಜ್‌ನಿಂದ ಇಳಿಯಲು ಒಪ್ಪುತ್ತಿರಲಿಲ್ಲ ಎಂದು ಆರತಕ್ಷತೆ ಪಾರ್ಟಿ ದಿನದ ಝಲಕ್‌ಗಳನ್ನು ಸೋನಮ್‌ ಮೆಲುಕು ಹಾಕಿದ್ದಾರೆ.

ಪಾರ್ಟಿಯಲ್ಲಿ ಕುಡಿದು, ಕುಣಿದು, ಕುಪ್ಪಳಿಸುತ್ತಿದ್ದ ಸಲ್ಮಾನ್‌ ಮತ್ತು ಶಾರೂಖ್‌ ಅವರ ಡಾನ್ಸ್‌ ನೋಡುವುದೇ ಒಂದು ಮಜವಾಗಿತ್ತು ಎಂದು ಸೋನಮ್‌ ನೆನಪಿಸಿಕೊಂಡಿದ್ದಾರೆ.


ಒಂದುವರೆ ವರ್ಷದಿಂದ ಪ್ರೊಪೋಸ್‌ ಮಾಡಬೇಕು ಎಂದು ಆನಂದ್‌ ಅಹುಜಾ ಯೋಚಿಸಿದ್ದರು. ಕಳೆದ ವರ್ಷ ಅಕ್ಟೋಬರ್‌ನಲ್ಲಿ ನಾವಿಬ್ಬರು ನ್ಯೂಯಾರ್ಕ್‌ನಲ್ಲಿದ್ದ ಸಂದರ್ಭ ಆ ದಿನ ಬಂತು. ಆ ದಿನ ಸ್ವಲ್ಪ ವಿಚಲಿತಳಾಗಿದ್ದೆ. ನ್ಯೂಯಾರ್ಕ್‌ನಲ್ಲಿ ಒಳ್ಳೆಯ ಜನರಿಲ್ಲ ಎಂದು ಆನಂದ್‌ ಜತೆ ದೂರುತ್ತಿದ್ದೆ. ಆನಂದ್‌ ಬೈಕ್‌ನಲ್ಲಿ, ನಾನು ಹಾಗೇ ನಡೆಯುತ್ತ ಮಾತನಾಡುತ್ತಿದ್ದೆವು. ಇದ್ದಕ್ಕಿದ್ದಂತೆ ಬೈಕ್‌ನಿಂದ ಇಳಿದ ಆನಂದ್‌ ನನ್ನ ಮುಂದೆ ಮಂಡಿಯೂರಿ ಮದುವೆಯಾಗುತ್ತೀಯಾ? ಎಂದು ಕೇಳಿದರು ಎಂದು ಸೋನಮ್‌ ತಮಗೆ ಆನಂದ್‌ ಅಹುಜಾ ಪ್ರೊಪೋಸ್‌ ಮಾಡಿದ ಕತೆಯನ್ನು ವಿವರಿಸಿದ್ದಾರೆ.

ಕಳೆದ ಮೇ ತಿಂಗಳಲ್ಲಿ ಸೋನಮ್‌ ಕಪೂರ್‌ ಮತ್ತು ಉದ್ಯಮಿ ಆನಂದ್‌ ಅಹುಜಾ ದಾಂಪತ್ಯ ಜೀವನಕ್ಕೆ ಕಾಲಿಟ್ಟಿದ್ದರು.