ನಟಿ ಶ್ರೀದೇವಿ ನಿದ್ದೆಗೆಡಿಸಿದ್ದ ಖುಷಿ ಸೊಂಟದ ಮೇಲಿನ ಟ್ಯಾಟೂ!

ಮರೆಯಾದ ಮೋಹಕ ತಾರೆ ಶ್ರೀದೇವಿ ಕಿರಿ ಮಗಳು ಖುಷಿ ಕಪೂರ್‌ಗೆ ಟ್ಯಾಟೂಗಳೆಂದರೆ ತುಂಬಾ ಇಷ್ಟ. ಇದುವರೆಗೂ ತನ್ನ ದೇಹದ ನಾನಾ ಕಡೆ ಹಚ್ಚೆ ಹಾಕಿಸಿಕೊಂಡಿದ್ದರೂ ಏನೂ ಸಮಸ್ಯೆಯಾಗಲಿಲ್ಲವಂತೆ. ಆದರೆ ಮೊದಲ ಟ್ಯಾಟೂನಿಂದಾಗಿ ತುಂಬಾ ತೊಂದರೆ ಅನುಭವಿಸಬೇಕಾಯಿತು ಎಂದಿದ್ದಾರೆ ಖುಷಿ ಕಪೂರ್.

ತನ್ನ ತಾಯಿ ಶ್ರೀದೇವಿ ಆ ಟ್ಯಾಟೂ ವಿಚಾರದಲ್ಲಿ ತುಂಬಾ ಆತಂಕಕ್ಕೊಳಗಾಗಿದ್ದರು ಎಂಬ ಸಂಗತಿಯನ್ನು ಹೇಳಿದ್ದಾರೆ. ನೇಹಾ ಧೂಪಿಯಾ ನಡೆಸಿಕೊಡುವ ಟಿವಿ ಕಾರ್ಯಕ್ರಮವೊಂದರಲ್ಲಿ ಜಾನ್ವಿ ಕಪೂರ್, ಖುಷಿ ಕಪೂರ್ ಪಾಲ್ಗೊಂಡಿದ್ದರು. ಆ ಶೋನಲ್ಲಿ ತನ್ನ ಮೊದಲ ಟ್ಯಾಟೂ ಕುರಿತ ಹಲವಾರು ಆಸಕ್ತಿಕರ ಸಂಗತಿಗಳನ್ನು ನೆನಪಿಸಿಕೊಂಡಿದ್ದಾರೆ.

"ಟ್ಯಾಟೂ ಹಾಕಿಸಿಕೊಂಡಿದ್ದ ಸಂಗತಿ ಅಪ್ಪ ಅಮ್ಮನಿಗೆ ಗೊತ್ತಿರಲಿಲ್ಲ. ಲೋ ಕಟ್ ಟೀಶರ್ಟ್‌ನಲ್ಲಿ ನನ್ನ ಗೆಳತಿ, ನಾನು ಇರುವ ಫೋಟೋವನ್ನು ಇನ್‍ಸ್ಟಾಗ್ರಾಮ್‌ನಲ್ಲಿ ಹಾಕಿದ್ದೆ. ಅದನ್ನು ಅಮ್ಮ ನೋಡಿದ್ದಾರೆ. ಆ ಫೋಟೋದಲ್ಲಿ ನನ್ನ ಸೊಂಟದ ಮೇಲ್ಭಾಗದಲ್ಲಿ ಇರುವ ಟ್ಯಾಟೂ ಅಮ್ಮನ ಕಣ್ಣಿಗೆ ಬಿದ್ದಿದೆ..."

"ಖುಷಿ ಟ್ಯಾಟೂ ಹಾಕಿಸಿಕೊಂಡಿದ್ದೀಯಾ?" ಎಂದು ಕೇಳಿದರು. ಆಗ ಹೇಳದೆ ವಿಧಿಯಿರಲಿಲ್ಲ. "ನಿನ್ನ, ಅಪ್ಪನ, ಅಕ್ಕನ ಹುಟ್ಟುಹಬ್ಬದ ಸಂಖ್ಯೆಗಳನ್ನು ಟ್ಯಾಟೂ ಆಗಿ ಹಾಕಿಸಿಕೊಂಡಿದ್ದೇನೆ" ಎಂದು ಹೇಳಿದೆ. ಆದರೆ ಅಮ್ಮನಿಗೆ ನಂಬಿಕೆ ಬರಲಿಲ್ಲ. ಜಾನ್ವಿಯನ್ನು ಕೇಳಿದ್ದಳು ಎಂದು ತನ್ನ ಮೊದಲ ಟ್ಯಾಟೂ ಬಗೆಗಿನ ಕುತೂಹಲಕಾರಿ ಸಂಗತಿಗಳನ್ನು ಹಂಚಿಕೊಂಡಿದ್ದಾರೆ.

"ಟ್ಯಾಟೂ ವಿಚಾರವಾಗಿ ಅಮ್ಮ ನನ್ನನ್ನು ಕೇಳಿದಳು. ಖುಷಿ ಹೇಳುತ್ತಿರುವುದು ನಿಜವೇ? ಇಲ್ಲದಿದ್ದರೆ ಯಾರಾದರೂ ಬಾಯ್‍ಫ್ರೆಂಡ್ ಹೆಸರೋ, ಅವನು ಹುಟ್ಟಿದ ದಿನಾಂಕವನ್ನೂ ಟ್ಯಾಟೂ ಆಗಿ ಹಾಕಿಸಿಕೊಂಡಿದ್ದಾಳಾ?" ಎಂದು ಕಂಗಾಲಾಗಿ ಕೇಳಿದಳು. "ಅಂತಹದ್ದೇನು ಇಲ್ಲ ಅಮ್ಮ" ಎಂದಿದ್ದೆ. ನೀನು ಹೇಳುತ್ತಿರುವುದು ಶೇ.100ರಷ್ಟು ನಿಜ ಅಲ್ಲವೇ.." ಎಂದು ಅಮ್ಮ ಸ್ವಲ್ಪ ಸಮಾಧಾನ ಮಾಡಿಕೊಂಡಿದ್ದರು ಎಂದು ಜಾನ್ವಿ ಕಪೂರ್ ಹೇಳಿದ್ದಾರೆ.