ಕನ್ನಡತಿ ಶ್ರೀನಿಧಿ ಮುಂದೆ ಪಿಗ್ಗಿ ಔಟ್‌!

ಮಂಗಳೂರು ಬೆಡಗಿ ಶ್ರೀನಿಧಿ ಶೆಟ್ಟಿ ಬಾಲಿವುಡ್‌ ಮತ್ತು ಹಾಲಿವುಡ್‌ಗಳಲ್ಲಿ ಮಿಂಚುತ್ತಿರುವ ಪ್ರಿಯಾಂಕಾ ಚೋಪ್ರಾ ಅವರನ್ನು ಹಿಂದಿಕ್ಕೆ ದೇಶದ 'ಮೋಸ್ಟ್‌ ಡಿಸೈರೆಬಲ್‌ ವುಮೆನ್‌ -2016' ಪಟ್ಟಿಯಲ್ಲಿ ಅಗ್ರ ಸ್ಥಾನ ಪಡೆದುಕೊಂಡಿದ್ದಾರೆ.

ಜಾಗತಿಕ ಸೌಂದರ್ಯ ಸ್ಪರ್ಧೆಗಳಲ್ಲಿ ಒಂದಾದ ಮಿಸ್‌ ಸುಪ್ರಾ ನ್ಯಾಷನಲ್‌ ಸೌಂದರ್ಯ ಸ್ಪರ್ಧೆಯಲ್ಲಿ ಶ್ರೀನಿಧಿ ಶೆಟ್ಟಿ 'ಮಿಸ್‌ ಸುಪ್ರಾ ನ್ಯಾಷನಲ್‌-2106' ಎಂಬ ಕಿರೀಟವನ್ನು ತಮ್ಮದಾಗಿಸಿಕೊಂಡಿದ್ದರು. ಇತ್ತೀಚೆಗೆ ಟೈಮ್ಸ್‌ ಗ್ರೂಪ್‌ ನಡೆಸಿದ '50 ಮೋಸ್ಟ್‌ ಡಿಸೈರೆಬಲ್‌ ವುಮೆನ್‌-2016' ಸಮೀಕ್ಷೆಯಲ್ಲಿ ದಿಗ್ಗಜರನ್ನೇ ಹಿಂದಿಕ್ಕಿರುವ ಶ್ರೀನಿಧಿ, ಮೊದಲ ಸ್ಥಾನವನ್ನು ಅಲಂಕರಿಸಿದ್ದಾರೆ.

ಶ್ರೀನಿಧಿಯ ಸೌಂದರ್ಯ, ಸ್ಟೈಲ್‌ ಮತ್ತು ಬುದ್ಧಿವಂತಿಕೆಯನ್ನು ಜನರು ಮೆಚ್ಚಿಕೊಂಡಿರುವುದೇ ಇದಕ್ಕೆ ಸಾಕ್ಷಿ ಎಂದು ಹೇಳಬಹುದು. ಈ ಪಟ್ಟಿಯ ಎರಡನೇ ಸ್ಥಾನ ಬಾಲಿವುಡ್‌ ಬ್ಯೂಟಿ ಜಾಕ್ವೆಲಿನ್‌ ಫರ್ನಾಂಡಿಸ್‌ ಪಾಲಾಗಿದೆ. ವಿಚಿತ್ರ ಸಂಗತಿ ಎಂದರೆ ಈಗಾಗಲೇ ಬಾಲಿವುಡ್‌ ಮತ್ತು ಹಾಲಿವುಡ್‌ ಚಿತ್ರರಂಗಗಳಲ್ಲಿ ತಮ್ಮ ಛಾಪು ಮೂಡಿಸಿರುವ ಪ್ರಿಯಾಂಕಾ ಚೋಪ್ರಾ ಮೂರನೇ ಸ್ಥಾನದಲ್ಲಿದ್ದಾರೆ.

ಇನ್ನು ನಾಲ್ಕನೇ ಸ್ಥಾನ ಕನ್ನಡತಿ ದೀಪಿಕಾ ಪಡುಕೋಣೆ ಪಾಲಾಗಿದೆ. 5ನೇ ಸ್ಥಾನದಲ್ಲಿ ಬಾಲಿವುಡ್‌ ಬಾರ್ಬಿ ಡಾಲ್‌ ಕತ್ರಿನಾ ಕೈಫ್‌ ಇದ್ದಾರೆ. ಸದ್ಯಕ್ಕೆ ಶ್ರೀನಿಧಿ ಶೆಟ್ಟಿ, ಯಶ್‌ ಅಭಿನಯದ 'ಕೆಜಿಎಫ್‌' ಚಿತ್ರದಲ್ಲಿ ನಟಿಸುತ್ತಿರುವುದು ನಿಮಗೆಲ್ಲ ಗೊತ್ತೇ ಇದೆ.