ಬಾಲಿವುಡ್‌ ಸೆಕ್ಸೀ ಹಿರೋಯಿನ್‌ ಸನ್ನಿ ಲಿಯೋನ್‌ ವರ್ಷದ ನಂತರ ಟಾಲಿವುಡ್‌ಗೆ ಮರಳಿದ್ದಾರೆ. 'ಅಂದಾಲ ರಾಕ್ಷ ಸಿ' ಸಿನಿಮಾ ಖ್ಯಾತಿಯ ನವೀನ್‌ ಚಂದ್ರ ಅಭಿನಯದ 'ಬುರ್ರಾ ಕಥಾ' ತೆಲುಗು ಚಿತ್ರದ ವಿಶೇಷ ಹಾಡೊಂದರಲ್ಲಿ ಸನ್ನಿ ಡಾನ್ಸ್‌ ಮಾಡಲಿದ್ದಾರಂತೆ. ಹಾಡಿಗೆ ಹೆಜ್ಜೆ ಹಾಕಲಿರುವ ಆಕೆ ಚಿತ್ರದ ಎರಡು ಸನ್ನಿವೇಶಗಳಲ್ಲಿಯೂ ಕಾಣಿಸಿಕೊಳ್ಳಲಿದ್ದಾರೆ ಎಂದು ಚಿತ್ರತಂಡದ ಮೂಲಗಳು ಹೇಳುತ್ತವೆ. ಸಂಜೀವ್‌ ನಿರ್ದೇಶನದ 'ಬುರ್ರಾ ಕಥಾ' ಸಿನಿಮಾಗೆ ಬಿರುಸಿನಿಂದ ಚಿತ್ರೀಕರಣ ನಡೆದಿದ್ದು, ಮುಂದಿನ ತಿಂಗಳಲ್ಲಿ ಸನ್ನಿ ಲಿಯೋನ್‌ ಚಿತ್ರಕ್ಕೆ ಡೇಟ್ಸ್‌ ಕೊಟ್ಟಿದ್ದಾರೆ. ಕಳೆದ ವರ್ಷ ಸನ್ನಿ ಲಿಯೋನ್‌ 'ಕರೆಂಟ್‌ ತೀಗಾ' ತೆಲುಗು ಚಿತ್ರದಲ್ಲಿ ಕಾಣಿಸಿಕೊಂಡಿದ್ದರು. ಮಂಚು ಮನೋಜ್‌ ನಟಿಸಿದ್ದ ಚಿತ್ರದಲ್ಲಿನ ಅವರ ಪಾತ್ರ ಟಾಲಿವುಡ್‌ನಲ್ಲಿ ಸಂಚಲನ ಸೃಷ್ಟಿಸಿತ್ತು. ಇದೀಗ 'ಬುರ್ರಾ ಕಥಾ' ಬಗ್ಗೆ ಚರ್ಚೆಯಾಗುತ್ತಿದ್ದು, ಸನ್ನಿ ಪಾತ್ರದ ಬಗ್ಗೆ ಕುತೂಹಲವಿದೆ.
**
ಪುರಿ ನಿರ್ದೇಶನದಲ್ಲಿ ವೆಂಕಟೇಶ್‌
ಟಾಲಿವುಡ್‌ನ ಖ್ಯಾತ ನಿರ್ದೇಶಕ ಪುರಿ ಜಗನ್ನಾಥ್‌ ನಿರ್ದೇಶನದಲ್ಲಿ ವೆಂಕಟೇಶ್‌ ಹೀರೋ ಆಗಿ ನಟಿಸಲಿರುವ ದುಬಾರಿ ಬಜೆಟ್‌ನ ತೆಲುಗು ಚಿತ್ರವೊಂದು ತಯಾರಾಗಲಿರುವ ಸೂಚನೆ ಸಿಕ್ಕಿದೆ. ಈಗಾಗಲೇ ಚಿತ್ರಕತೆ ಸಿದ್ಧವಾಗುತ್ತಿದ್ದು, ವೆಂಕಟೇಶ್‌ ಮತ್ತು ಪುರಿ ಜಗನ್ನಾಥ್‌ ಹಲವು ಸುತ್ತಿನ ಮಾತುಕತೆ ನಡೆಸಿದ್ದಾರೆ. ವೆಂಕಟೇಶ್‌ ಸಿನಿಮಾ ಬದುಕಿನಲ್ಲಿ ಇದೊಂದು ಮಹತ್ವದ ಚಿತ್ರವಾಗಲಿದೆ ಎಂದೇ ಅವರ ಆತ್ಮೀಯರು ಅಭಿಪ್ರಾಯಪಡುತ್ತಿದ್ದಾರೆ. ವೃತ್ತಿ ಬದುಕಿನ ಈ ಹಂತದಲ್ಲಿ ಹೀರೋ ವೆಂಕಟೇಶ್‌ಗೆ ಇಂತಹ ದೊಡ್ಡ ನಿರ್ದೇಶಕರು ಸಿಗುತ್ತಿರುವುದು, ಅವರ ಅದೃಷ್ಟ ಎಂದೇ ಹೇಳಲಾಗುತ್ತಿದೆ. ಪುರಿ ಜಗನ್ನಾಥ್‌ ತೆಲುಗಿನ ದೊಡ್ಡ ಹೀರೋಗಳೊಂದಿಗೆ ಕಾರ್ಯನಿರ್ವಹಿಸಿರುವ ಅನುಭವಿ. ಮಹೇಶ್‌ಬಾಬುಗೆ ಅವರಿಗೆ ಜಗನ್ನಾಥ್‌ 'ಜನಗಣಮನ' ನಿರ್ದೇಶಿಸಲಿದ್ದಾರೆ. ಜ್ಯೂನಿಯರ್‌ ಎನ್‌ಟಿಆರ್‌ಗೂ ಅವರು ಚಿತ್ರವೊಂದನ್ನು ನಿರ್ದೇಶಿಸಲಿದ್ದಾರೆ. ಈ ಎರಡು ಚಿತ್ರಕ್ಕೂ ಮುನ್ನ ವೆಂಕಟೇಶ್‌ ಚಿತ್ರ ಸೆಟ್ಟೇರಲಿದೆಯಂತೆ.
**
ಹಾಲಿವುಡ್‌ ಮಾದರಿ ಬ್ಯಾಂಗ್‌ ಬ್ಯಾಂಗ್‌ ಸರಣಿ
ಸೂಪರ್‌ಹಿಟ್‌ 'ಬ್ಯಾಂಗ್‌ ಬ್ಯಾಂಗ್‌' ಹಿಂದಿ ಸಿನಿಮಾ ಸರಣಿ ಸಂಪೂರ್ಣ ಹಾಲಿವುಡ್‌ ಮಾದರಿಯಲ್ಲಿ ತಯಾರಾಗಲಿದೆ ಎನ್ನಲಾಗಿದೆ. ಮೊನ್ನೆಯಷ್ಟೇ ಸದ್ದಿಲ್ಲದೆ ಶೂಟಿಂಗ್‌ಗೆ ಚಾಲನೆ ಸಿಕ್ಕಿದ್ದು, ಸಿದ್ದಾರ್ಥ್‌ ಮಲ್ಹೋತ್ರಾ ಮತ್ತು ಜಾಕ್ವಲಿನ್‌ ಫರ್ನಾಂಡಿಸ್‌ ಮುಖ್ಯಭೂಮಿಕೆಯಲ್ಲಿ ನಟಿಸುತ್ತಿದ್ದಾರೆ. ಚಿತ್ರದ ಕುರಿತಾದ ಇತರೆ ಮಾಹಿತಿಯನ್ನು ಚಿತ್ರತಂಡ ಗೌಪ್ಯವಾಗಿಟ್ಟಿದ್ದು, ಬಾಲಿವುಡ್‌ನವರಿಗೆ ಇದು ಸೋಜಿಗ ಉಂಟುಮಾಡಿದೆ. ಹಾಲಿವುಡ್‌ ಆ್ಯಕ್ಷ ನ್‌ ಚಿತ್ರವೊಂದರ ರಿಮೇಕ್‌ ಎನ್ನುವ ವದಂತಿಯೂ ಹರಡಿದ್ದು, ನಿರ್ದೇಶಕದ್ವಯರಾದ ರಾಜ್‌ ಮತ್ತು ಕೃಷ್ಣ ಗುಟ್ಟು ಬಿಟ್ಟುಕೊಡುತ್ತಿಲ್ಲ.
ಎರಡು ವರ್ಷದ ಹಿಂದೆ ತೆರೆಕಂಡ 'ಬ್ಯಾಂಗ್‌ ಬ್ಯಾಂಗ್‌' ಹಿಂದಿ ಸಿನಿಮಾದಲ್ಲಿ ಹೃತಿಕ್‌ ರೋಷನ್‌ ಮತ್ತು ಕತ್ರಿನಾ ಕೈಫ್‌ ನಟಿಸಿದ್ದರು. ಇದು ಟಾಮ್‌ ಕ್ರ್ಯೂಸ್‌ ಮತ್ತು ಕೆಮರಾನ್‌ ಡಿಯಾಜ್‌ ನಟಿಸಿದ್ದ 'ನೈಟ್‌ ಅಂಡ್‌ ಡೇ' ಇಂಗ್ಲಿಷ್‌ ಚಿತ್ರದ ಹಿಂದಿ ಅವತರಣಿಕೆ. 'ಮೂಲ ಚಿತ್ರದಂತೆ ನಮ್ಮ ಚಿತ್ರಕ್ಕೆ ಹಾಲಿವುಡ್‌ ಸಿನಿಮಾದ ಪ್ರೇರಣೆಯಿಲ್ಲ. ಸರಣಿಗೆ ನಾವು ಕತೆ, ಚಿತ್ರಕತೆ ಹೆಣೆದಿದ್ದೇವೆ. ಹಾಲಿವುಡ್‌ ಸಿನಿಮಾದ ಗುಣಮಟ್ಟ ಇಲ್ಲಿರುತ್ತದೆ. ಆಕಸ್ಮಾತಾಗಿ ಯಾವುದಾದರೂ ಹಾಲಿವುಡ್‌ ಸಿನಿಮಾದಂತೆ ಇದು ಕಾಣಿಸಿದರೆ ಅದು ಕಾಕತಾಳೀಯವಷ್ಟೆ' ಎನ್ನುತ್ತಾರೆ ನಿರ್ದೇಶಕದ್ವಯರು. ಚಿತ್ರವನ್ನು ಸದ್ಯ 'ಬ್ಯಾಂಗ್‌ ಬ್ಯಾಂಗ್‌ 2' ಎಂದು ಕರೆಯಲಾಗುತ್ತಿದ್ದು, ಮುಂದೆ ಶೀರ್ಷಿಕೆ ಬದಲಾಗಲಿದೆಯಂತೆ.