ಬಾಲಿವುಡ್‌ನ ಸೆಕ್ಸೀ ತಾರೆ ಸನ್ನಿ ಲಿಯೋನ್‌ ತಮ್ಮ ಹೊಸ ಚಿತ್ರಕ್ಕಾಗಿ ಮೇಕ್‌ಓವರ್‌ ಮಾಡಿಕೊಂಡಿದ್ದಾರೆ. ಪ್ರಮುಖವಾಗಿ ಹೇರ್‌ಸ್ಟೈಲ್‌ನಲ್ಲಿ ಮಾರ್ಪಾಟು ಮಾಡಿಕೊಂಡಿದ್ದು, ಇದು ಯಾವ ಪಾತ್ರಕ್ಕೆ ಎನ್ನುವುದನ್ನು ಅವರು ಗೌಪ್ಯವಾಗಿಟ್ಟಿದ್ದಾರೆ. ಇತ್ತೀಚೆಗೆ ತೆರೆಕಂಡ ಅವರ 'ಮಸ್ತಿಝಾದೇ', 'ಒನ್‌ ನೈಟ್‌ ಸ್ಟ್ಯಾಂಡ್‌' ಹಿಂದಿ ಸಿನಿಮಾಗಳು ಬಾಕ್ಸ್‌ ಆಫೀಸ್‌ನಲ್ಲಿ ಉತ್ತಮ ವಹಿವಾಟು ನಡೆಸಿದ್ದವು. ಈ ಯಶಸ್ಸಿನ ಹಿನ್ನೆಲೆಯಲ್ಲಿ ಅವರಿಗೆ ಡಿಮಾಂಡ್‌ ಹೆಚ್ಚಾಗಿದೆ. ಪ್ರಸ್ತುತ ಎರಡು ಚಿತ್ರಗಳಲ್ಲಿ ನಟಿಸುತ್ತಿರುವ ಸನ್ನಿ ಮತ್ತೆರೆಡು ಹಿಂದಿ ಸಿನಿಮಾಗಳಿಗೆ ಸಹಿ ಹಾಕಿದ್ದಾರಂತೆ. ಈ ಚಿತ್ರಗಳ ಹೀರೋಗಳಾಗಿ ಹೊಸ ಯುವಕರು ನಟಿಸಲಿದ್ದು, ನಿರ್ಮಾಪಕರು ಸನ್ನಿ ನಾಮಬಲವನ್ನೇ ನೆಚ್ಚಿಕೊಂಡಿದ್ದಾರೆ.
ಬಾಲಿವುಡ್‌ ಮೂಲಗಳ ಪ್ರಕಾರ ಚಿತ್ರೀಕರಣದಲ್ಲಿರುವ 'ಟೀನಾ ಅಂಡ್‌ ಲೋಲೋ' ಹಿಂದಿ ಚಿತ್ರಕ್ಕಾಗಿ ಸನ್ನಿ ಇಂಥದ್ದೊಂದು ಮೇಕ್‌ಓವರ್‌ಗೆ ಒಳಗಾಗಿದ್ದಾರಂತೆ. ದೇವಾಂಗ್‌ ಧೊಲಾಕಿಯಾ ನಿರ್ದೇಶನದಲ್ಲಿ ತಯಾರಾಗುತ್ತಿರುವ ರೋಚಕ ಥ್ರಿಲ್ಲರ್‌ ಕಥಾನಕವಿದು. ಚಿತ್ರದ ಮತ್ತೊಬ್ಬ ನಾಯಕಿಯಾಗಿ ಕರಿಷ್ಮಾ ತನ್ನಾ ಇದ್ದಾರೆ. ತಮ್ಮ ಹೊಸ ಲುಕ್‌ ಅನ್ನು ಅಂತರ್ಜಾಲಕ್ಕೆ ಹಾಕಿರುವ ಸನ್ನಿ, ಅಭಿಮಾನಿಗಳ ಅಭಿಪ್ರಾಯ ಅಪೇಕ್ಷಿಸುತ್ತಿದ್ದಾರೆ. ಸನ್ನಿ ಲುಕ್‌ಗೆ ಬೌಲ್ಡ್‌ ಆಗಿರುವ ಪಡ್ಡೆ ಯುವಕರು ವಿವಿಧ ರೀತಿಯ ಕಾಮೆಂಟ್‌ಗಳೊಂದಿಗೆ ತಮ್ಮ ನೆಚ್ಚಿನ ತಾರೆಯನ್ನು ಕೊಂಡಾಡುತ್ತಿದ್ದಾರೆ.
**
ದುಬಾರಿ ಸಂಭಾವನೆಗೆ ಬೇಡಿಕೆ
ಕಂಗನಾ ರನಾವತ್‌ ದುಬಾರಿ ಸಂಭಾವನೆ ಕೇಳುತ್ತಿದ್ದಾರೆ ಎನ್ನುವ ಸುದ್ದಿ ಬಾಲಿವುಡ್‌ನಲ್ಲಿ ಹರಡಿದೆ. ಸದ್ಯ ವಿಶಾಲ್‌ ಭಾರದ್ವಾಜ್‌ ನಿರ್ದೇಶನದ 'ರಂಗೂನ್‌' ಚಿತ್ರೀಕರಣದಲ್ಲಿರುವ ಕಂಗನಾ ಇದೇ ಕಾರಣಕ್ಕೆ ಕೋಪ ಮಾಡಿಕೊಂಡಿದ್ದಾರೆ ಎನ್ನಲಾಗುತ್ತಿದೆ. ಈ ಚಿತ್ರಕ್ಕಾಗಿ ಅವರಿಗೆ ಮೂರು ಕೋಟಿ ರೂಪಾಯಿ ಸಂಭಾವನೆ ಕೊಡಲಾಗಿದೆಯಂತೆ. ಇದು ತೀರಾ ಕಡಿಮೆ ಮೊತ್ತ ಎಂದು ಕಂಗನಾ ಶೂಟಿಂಗ್‌ನಲ್ಲಿ ಭಾಗವಹಿಸದಿರಲು ನಿರ್ಧರಿಸಿದ್ದಾರೆ. ಈ ಬಗ್ಗೆ ಆಕೆ ಪ್ರತಿಕ್ರಿಯಿಸುತ್ತಾ, 'ನಾನು ಹೆಚ್ಚೇನೂ ಡಿಮಾಂಡ್‌ ಮಾಡುತ್ತಿಲ್ಲ. ಮಾರುಕಟ್ಟೆಯಲ್ಲಿ ನನ್ನ ಬೆಲೆ ಏನಿದೆಯೋ ಅದನ್ನೇ ಕೇಳುತ್ತಿದ್ದೇನೆ' ಎಂದಿದ್ದಾರೆ.
ಬಾಲಿವುಡ್‌ ಮೂಲಗಳು ಹೇಳುವಂತೆ 'ತನು ವೆಡ್ಸ್‌ ಮನು ರಿಟರ್ನ್ಸ್‌' ಚಿತ್ರಕ್ಕಾಗಿ ಕಂಗನಾ ಬರೋಬ್ಬರಿ 11 ಕೋಟಿ ರೂಪಾಯಿ ಸಂಭಾವನೆ ಪಡೆದಿದ್ದರಂತೆ! ತಾವು ಮುಖ್ಯಭೂಮಿಕೆಯಲ್ಲಿ ನಟಿಸಿದ್ದ 'ಕ್ವೀನ್‌' ಚಿತ್ರದ ದೊಡ್ಡ ಯಶಸ್ಸಿನ ನಂತರ ಕಂಗನಾ ಸಂಭಾವನೆ ಹೆಚ್ಚಿಸಿಕೊಂಡಿದ್ದಾರೆ. ತಮ್ಮ ಹೆಸರಿನಿಂದಾಗಿ ಸಿನಿಮಾ ನೂರು ಕೋಟಿ ವಹಿವಾಟು ನಡಿಸಿದೆ ಎನ್ನುವುದು ಅವರ ವಾದ. ಇದೀಗ ಸಹಿ ಹಾಕಿರುವ 'ಸಿಮ್ರಾನ್‌' ಚಿತ್ರಕ್ಕೂ ಕಂಗನಾ ಹತ್ತು ಕೋಟಿಗೂ ಹೆಚ್ಚು ಸಂಭಾವನೆ ಡಿಮಾಂಡ್‌ ಮಾಡುತ್ತಿದ್ದಾರೆ. ತಾವು ಕೇಳಿದಷ್ಟು ಹಣ ಕೊಡದಿದ್ದರೆ ಚಿತ್ರತಂಡದಿಂದ ಹೊರನಡೆಯುವುದಾಗಿ ಖಡಾಖಂಡಿತವಾಗಿ ಹೇಳಿದ್ದಾರೆ ಎನ್ನುವ ಮಾಹಿತಿ ಸಿಕ್ಕಿದೆ.
--
ಫೋಟೋ : ಸನ್ನಿ ಲಿಯೋನ್‌
------------------------------
ಸೈಂಟಿಫಿಕ್‌ ಫಿಕ್ಷ ನ್‌
ರಾಮ್‌ ಚರಣ್‌ ತೇಜಾ ಅಭಿನಯದ ನೂತನ ತೆಲುಗು ಸಿನಿಮಾಗೆ 'ಫಾರ್ಮುಲಾ ಎಕ್ಸ್‌' ಎಂದು ನಾಮಕರಣವಾಗಿದೆ. 'ನೇನೊಕ್ಕಡಿನೆ' ತೆಲುಗು ಸಿನಿಮಾದಲ್ಲಿ ವಿಶಿಷ್ಟ ನಿರೂಪಣೆಯ ಮೂಲಕ ಗಮನ ಸೆಳೆದಿದ್ದ ಸುಕುಮಾರ್‌ ಈ ಚಿತ್ರ ನಿರ್ದೇಶಿಸಲಿದ್ದಾರೆ. ಹೊಸ ಜನರೇಷನ್‌ ವೀಕ್ಷ ಕರಿಗಾಗಿ ಕತೆ ಹೆಣೆದಿದ್ದು, ಇದೊಂದು ಸೈಂಟಿಫಿಕ್‌ ಫಿಕ್ಷ ನ್‌ ಎನ್ನಲಾಗಿದೆ. ರಾಮ್‌ ಚರಣ್‌ ಇದೇ ಮೊದಲ ಬಾರಿಗೆ ಇಂಥದ್ದೊಂದು ಕಥಾವಸ್ತು ಇರುವ ಚಿತ್ರದಲ್ಲಿ ನಟಿಸುತ್ತಿದ್ದು, ಪಾತ್ರಕ್ಕಾಗಿ ಸಾಕಷ್ಟು ತಯಾರಿ ನಡೆಸಿದ್ದಾರಂತೆ. ಚಿತ್ರಕಥೆ ಸಿದ್ಧವಾಗುತ್ತಿದ್ದು, ಅತಿ ಶೀಘ್ರದಲ್ಲೇ ಚಿತ್ರಕ್ಕೆ ಚಾಲನೆ ಸಿಗಲಿದೆ. ದೇವಿಶ್ರೀ ಪ್ರಸಾದ್‌ ಚಿತ್ರಕ್ಕೆ ಸಂಗೀತ ಸಂಯೋಜಿಸುತ್ತಿದ್ದು, ನಾಯಕಿಗಾಗಿ ತಲಾಶೆ ನಡೆದಿದೆ.
**
ವಿವಾದದ ಸುಳಿಯಲ್ಲಿ ಶಿವಾಯ್‌ ಪೋಸ್ಟರ್‌
ಅಜಯ್‌ ದೇವಗನ್‌ ಅಭಿನಯದ ಬಹು ನಿರೀಕ್ಷಿತ ಸಿನಿಮಾ 'ಶಿವಾಯ್‌' ಬಿಡುಗಡೆಯ ಮುನ್ನವೇ ವಿವಾದಕ್ಕೆ ಸಿಲುಕಿದೆ. ಈ ಚಿತ್ರದ ಟ್ರೈಲರ್‌ ಕೂಡ ಇನ್ನೂ ಬಿಡುಗೆಯಾಗಿಲ್ಲ. ಆದರೆ ವಿವಾದಾತ್ಮಕ ಪೋಸ್ಟರ್‌ ಮೂಲಕ ಅದು ಸುದ್ದಿಯಲ್ಲಿದೆ. ಈ ಸಿನಿಮಾದ ಪೋಸ್ಟರ್‌ನಲ್ಲಿ ಅಜಯ್‌ ದೇವಗನ್‌ ಶೂ ಧರಿಸಿಕೊಂಡೇ ಶಿವನ ವಿಗ್ರಹವೇರುವ ಚಿತ್ರವಿದೆ. ಹಾಗೂ ಅವರು ಶಿವನ ತಲೆ ಮೇಲೆ ಮಂಜಿನ ತ್ರಿಶೂಲವೊಂದನ್ನು ಹಿಡಿದುಕೊಂಡಿದ್ದಾರೆ ಎನ್ನುವ ಕಾರಣಕ್ಕೆ ಪೋಸ್ಟರ್‌ಗೆ ಆಕ್ಷೇಪಗಳು ವ್ಯಕ್ತವಾಗುತ್ತಿವೆ. ಈ ಪೋಸ್ಟರ್‌ ಒಂದು ವರ್ಗದವರ ಧಾರ್ಮಿಕ ಭಾವನೆಗಳಿಗೆ ಧಕ್ಕೆಯುಂಟುಮಾಡುತ್ತಿದೆ ಎನ್ನುವ ಕೂಗು ಎದ್ದಿದೆ.
ಅಧಿಕೃತ ಮೂಲಗಳ ಪ್ರಕಾರ ದೆಹಲಿಯಲ್ಲಿ ವಕೀಲರೊಬ್ಬರು ಈ ಸಿನಿಮಾ ಪೋಸ್ಟರ್‌ ಮತ್ತು ಚಿತ್ರತಂಡದ ವಿರುದ್ಧ ಈಗಾಗಲೇ ಕೇಸು ದಾಖಲಿಸಿದ್ದಾರೆ. ಈ ನೀಲಿ ಬಣ್ಣದ ಪೋಸ್ಟರನ್ನು ಹತ್ತಿರದಿಂದ ನೋಡಿದರೆ ಅದರಲ್ಲಿ ಅಜಯ್‌ ದೇವಗನ್‌ ಹಗ್ಗವೊಂದನ್ನು ಹಿಡಿದು ತೂಗಾಡುತ್ತಾ ಯುದ್ಧಕ್ಕೆ ಸನ್ನದ್ಧರಾಗುವಂತೆ ಭಾಸವಾಗುತ್ತದೆ. ಈ ಪೋಸ್ಟರ್‌ ವಿವಾದವೀಗ ಎಲ್ಲಿಗೆ ಬಂದು ಮುಟ್ಟುತ್ತದೆ ಎಂದು ಗೊತ್ತಿಲ್ಲ. ಆದರೆ 'ಶಿವಾಯ್‌' ಸಿನಿಮಾ ಬಿಡುಗಡೆಯ ಮುನ್ನವೇ ಸದ್ದು ಮಾಡುತ್ತಿರುವುದಂತು ನಿಜ.
**
ಯಾಮಿಗೆ ಕಾಬಿಲ್‌ ಸಿನಿಮಾ ಸಿಕ್ಕಿದ್ದು ಹೇಗೆ?
ಹೃತಿಕ್‌ ರೋಷನ್‌ ಅಭಿನಯದ 'ಕಾಬಿಲ್‌' ಸಿನಿಮಾದಲ್ಲಿ ಯಾಮಿ ಗೌತಮಿ ನಾಯಕಿಯಾಗಿ ನಟಿಸುತ್ತಿರುವುದು ಸರಿಯಷ್ಟೆ. ಆದರೆ ಈ ಅವಕಾಶ ಅವರಿಗೆ ಸಿಕ್ಕಿದ್ದಾದರೂ ಹೇಗೆ? ಇದಕ್ಕೆ ಏನಾದರೂ ವಿಶೇಷ ಕಾರಣವಿದೆಯೇ ಎಂಬ ಪ್ರಶ್ನೆ ಎಲ್ಲರನ್ನೂ ಕಾಡುತ್ತಿದೆ. ಅವರ ಅಭೂತಪೂರ್ವ ಸೌಂದರ್ಯ ಮತ್ತು ಸಹಜ ನಟನೆಗಳೇ ಇದಕ್ಕೆ ಕಾರಣವಿರಲಾರದು. ಬೇರೆ ಏನಾದರೂ ಕಾರಣವಿರಬಹುದು ಎನ್ನುವ ಸಿನಿಪ್ರಿಯರ ಸಂದೇಹಕ್ಕೆ ಈಗ ಉತ್ತರ ಸಿಕ್ಕಿದೆ. ಚಿತ್ರಕ್ಕೆ ಯಾಮಿ ಆಯ್ಕೆಯಾಗಲು ಮುಖ್ಯ ಕಾರಣ ಅವರ ಸುಂದರವಾದ ಕಣ್ಣುಗಳಂತೆ!
'ಕಾಬಿಲ್‌' ಸಿನಿಮಾ ತಂಡವು ಉತ್ತಮ ನಟನಾ ಚಾತುರ್ಯದ ಜೊತೆಗೆ ನೈಸರ್ಗಿಕವಾಗಿಯೇ ಸುಂದರವಾದ ಕಣ್ಣುಗಳ ಒಡತಿಯಾಗಿರುವ ನಟಿಯೊಬ್ಬರನ್ನು ಹುಡುಕುತ್ತಿತ್ತು. ಆಗ ಅವರ ಕಣ್ಣಿಗೆ ಬಿದ್ದವರೇ ಯಾಮಿ. ಆಕೆಯಲ್ಲಿ ಇವೆರಡೂ ಗುಣಗಳಿದ್ದವು. ಇದರಲ್ಲಿ ಯಾಮಿಯವರದು ಅಂಧ ಯುವತಿಯ ಪಾತ್ರ. ಆ ಪಾತ್ರ ಸಹಜವಾಗಿ ಮೂಡಿಬರಲು ಅವರು ಸಾಕಷ್ಟು ಪರಿಶ್ರಮ ಮಾಡುತ್ತಿದ್ದಾರೆ. ಆದರೆ ಅಂಧ ಯುವತಿಯ ಪಾತ್ರ ನಿರ್ವಹಿಸಲು ಆ ಚಿತ್ರತಂಡಕ್ಕೆ ಸುಂದರ ಕಣ್ಣುಗಳಿರುವ ನಟಿಯೇ ಯಾಕೆ ಬೇಕಿತ್ತು ಎಂಬ ಅಂಶವೂ ಸಾಕಷ್ಟು ಕುತೂಹಲ ಕೆರಳಿಸಿದೆ. ಯಾಮಿಯವರಿಗೆ ಅವರ ಕಣ್ಣುಗಳು ಅದೃಷ್ಟ ತಂದುಕೊಡಬಲ್ಲವೆ ಎಂಬುದನ್ನು ಕಾದು ನೋಡಬೇಕು.