ಅರ್ಬಾಝ್‌ ಖಾನ್‌ ಜತೆ ಸನ್ನಿ ಲಿಯೋನ್‌ ನಟಿಸುತ್ತಿರುವ 'ತೇರಾ ಇಂತೆಝಾರ್‌' ಸಿನಿಮಾ ಸದ್ಯದಲ್ಲೇ ಸೆಟ್ಟೇರಲಿದೆ. ಇದೊಂದು ಮ್ಯೂಸಿಕಲ್‌ ರೊಮ್ಯಾಂಟಿಕ್‌ ಸಿನಿಮಾ ಎಂದು ಹೇಳಲಾಗಿದ್ದು, ರಾಜೀವ್‌ ವಾಲಿಯಾ ನಿರ್ದೇಶಿಸಲಿದ್ದಾರೆ.
ಕಛ್‌ ಸೇರಿದಂತೆ ಜಗತ್ತಿನ ಕೆಲವು ಸುಂದರ ಪ್ರದೇಶಗಳಲ್ಲಿ ತಮ್ಮ ಸಿನಿಮಾಗೆ ಶೂಟಿಂಗ್‌ ನಡೆಯಲಿದೆ ಎಂದು ಸನ್ನಿ ಹೇಳಿಕೊಂಡಿದ್ದಾರೆ. 'ನನಗೀಗ ಕೈತುಂಬಾ ಅವಕಾಶಗಳಿವೆ. ಇದಕ್ಕಾಗಿ ನಾನು ಭಾರತೀಯ ಸಿನಿಮಾ ಪ್ರೇಕ್ಷ ಕರಿಗೆ ಅಭಿನಂದನೆ ಹೇಳುತ್ತೇನೆ. ಹಿರೋಯಿನ್‌ ಆಗಿ ಮಾತ್ರವಲ್ಲದೆ ದೊಡ್ಡ ಸಿನಿಮಾಗಳ ಐಟಂ ಹಾಡುಗಳಿಗೂ ಡಾನ್ಸ್‌ ಮಾಡುತ್ತಿರೋದು ಜನಪ್ರಿಯತೆ ಹೆಚ್ಚಿಸಲಿದೆ!' ಎನ್ನುತ್ತಾರವರು.
ಈ ವರ್ಷ ಸನ್ನಿ ಲಿಯೋನ್‌ ಅಭಿನಯದ 'ಮಸ್ತಿಝಾದೇ' ಮತ್ತು 'ಒನ್‌ ನೈಟ್‌ ಸ್ಟ್ಯಾಂಡ್‌' ಹಿಂದಿ ಸಿನಿಮಾಗಳು ತೆರೆಕಂಡಿದ್ದವು. ಚಿತ್ರೀಕರಣದಲ್ಲಿರುವ ಸನ್ನಿಯ 'ಬೀಮಾನ್‌ ಲವ್‌' ಮತ್ತು 'ಟೀನಾ ಅಂಡ್‌ ಲೋಲೋ' ಹಿಂದಿ ಚಿತ್ರಗಳು ಸದ್ಯದಲ್ಲೇ ತೆರೆಗೆ ಬರಲಿವೆ.
ಈ ಮಧ್ಯೆ 'ರಾಯೀಸ್‌' ಸಿನಿಮಾದ ಐಟಂ ಹಾಡೊಂದರಲ್ಲಿ ಅವರು ಶಾರುಖ್‌ ಖಾನ್‌ ಜತೆ ಹೆಜ್ಜೆ ಹಾಕಿದ್ದಾರೆ. ರಣಬೀರ್‌ ಕಪೂರ್‌ ಮತ್ತು ಕತ್ರಿನಾ ಕೈಫ್‌ ಅಭಿನಯದ 'ಫುಡ್ಡು' ಹಿಂದಿ ಚಿತ್ರದ ಐಟಂ ಹಾಡೊಂದರಲ್ಲಿಯೂ ತಾವು ಕುಣಿಯುತ್ತಿರುವುದಾಗಿ ಹೇಳಿಕೊಳ್ಳುತ್ತಾರೆ ಸನ್ನಿ.