ಮತದಾರರ ಪಟ್ಟಿಯಲ್ಲಿ ಸನ್ನಿ ಲಿಯೋನ್ ಪ್ರತ್ಯಕ್ಷ

[ ಮೂಲ ಸುದ್ದಿ: ಟೈಮ್ಸ್ ಆಫ್ ಇಂಡಿಯಾ, 22 ಆಗಸ್ಟ್ 2018 ]

ಉತ್ತರ ಪ್ರದೇಶದ ಬಲ್ಲಿಯಾ ಜಿಲ್ಲೆಯ ಮತದಾರರ ಪಟ್ಟಿಯಲ್ಲಿ ಬಾಲಿವುಡ್ ತಾರೆ ಸನ್ನಿ ಲಿಯೋನ್ ಕಾಣಿಸಿಕೊಂಡಿದ್ದಾರೆ. ವಿಶೇಷ ಎಂದರೆ ಮತದಾರರ ಪಟ್ಟಿಯಲ್ಲಿ ಬಿಕಿನಿಯಲ್ಲಿ ಕಾಣಿಸಿಕೊಂಡಿರುವುದು. ಇಷ್ಟಕ್ಕೂ ಮತದಾರರ ಪಟ್ಟಿಗೆ ಸನ್ನಿ ಲಿಯೋನ್ ಎಂಟ್ರಿ ಕೊಟ್ಟಿದ್ದಾರೂ ಹೇಗೆ?

ಇದೆಲ್ಲಾ ಹೇಗಾಯಿತು ಎಂದರೆ, ಬಲ್ಲಿಯಾ ಜಿಲ್ಲೆಯಲ್ಲಿ ಮತದಾರ ಪಟ್ಟಿ ಪರಿಷ್ಕರಣೆ ಕಾರ್ಯ ನಡೆಯುತ್ತಿದೆ. ತಾಜಾ ಪಟ್ಟಿಯಲ್ಲಿ ಆನೆ, ಪಾರಿವಾಳ, ಜಿಂಕೆಗೂ ಮತದಾನದ ಹಕ್ಕು ನೀಡಲಾಗಿದೆ. ಅಧಿಕಾರಿಗಳ ನಿರ್ಲಕ್ಷ್ಯದಿಂದಾಗಿ ಈ ರೀತಿ ನಡೆದಿದೆ. ಬಲ್ಲಿಯಾ ಮತದಾರರ ಪರಿಷ್ಕೃತ ಪಟ್ಟಿಯ ಎರಡು ಪುಟಗಳು ಮಾಧ್ಯಮಗಳಿಗೆ ಸಿಕ್ಕಿವೆ.

ವಿವೇಕಾನಂದ ಕಾಲೋನಿಯ ದುರ್ಗಾವತಿ ಸಿಂಗ್ ಎಂಬುವವರ ಫೋಟೋಗೆ ಬದಲಾಗಿ ಸನ್ನಿ ಲಿಯೋನ್ ಫೋಟೋ ಹಾಕಲಾಗಿದೆ. ಅದೇ ರೀತಿ ಮಾಜಿ ಸಂಪುಟ ಸಚಿವ ನರದ್ ರೈ ಅವರ ಫೋಟೋಗೆ ಬದಲಾಗಿ ಆನೆಯನ್ನು, ಕುನ್ವಾರ್ ಅಂಕುರ್ ಬದಲಾಗಿ ಜಿಂಕೆ ಫೋಟೋ ಹಾಕಿದ್ದಾರೆ.


ಈ ಪುಟಗಳಲ್ಲಿ ಮತದಾರ ಫೋಟೋ ಸ್ಥಳದಲ್ಲಿ ಆನೆ, ಜಿಂಕೆ, ಪಾರಿವಾಳ ಚಿತ್ರಗಳನ್ನು ಹಾಕಿರುವುದು ವಿಶೇಷ. ಅಷ್ಟೇ ಅಲ್ಲದೆ ಬಾಲಿವುಡ್ ತಾರೆ ಸನ್ನಿ ಲಿಯೋನ್‌ರ ಬಿಕಿನಿ ಫೋಟೋವನ್ನೂ ಹಾಕಿದ್ದಾರೆ. ಈಗ ಲೀಕ್ ಆಗಿರುವ ಎರಡು ಪುಟಗಳು ಸ್ಥಳೀಯ ಮಾಧ್ಯಮಗಳಲ್ಲಿ ವೈರಲ್ ಆಗಿದ್ದು ಇದೀಗ ಉನ್ನತಾಧಿಕಾರಿಗಳು ಅದನ್ನು ಸರಿಪಡಿಸಲು ಮುಂದಾಗಿದ್ದಾರೆ.

ಇನ್ನೊಂದು ವಿಶೇಷ ಎಂದರೆ ಎಲ್ಲರ ವಿಳಾಸ ಉಳಿದ ವಿವರಗಳು ಮಾತ್ರ ಸರಿಯಾಗಿರುವುದು. ಕೇವಲ ಫೋಟೋ ಮಾತ್ರ ಬದಲಾಗಿರುವ ಅಂಶ ಬೆಳಕಿಗೆ ಬಂದಿದೆ. ಘಟನೆಯ ಬಳಿಕ ಎಚ್ಚೆತ್ತುಕೊಂಡಿರುವ ಜಿಲ್ಲಾ ಚುನಾವಣಾ ಅಧಿಕಾರಿಗಳು ಇದಕ್ಕೆ ಕಾರಣವಾದ ಡಾಟಾ ಎಂಟ್ರಿ ಆಪರೇಟರ್ ವಿಷ್ಣುದೇವ್‌ ವರ್ಮಾರನ್ನು ವರ್ಗಾವಣೆ ಮಾಡುವುದರ ಜತೆಗೆ ಅವರ ವಿರುದ್ಧ ಎಫ್‍ಐಆರ್ ದಾಖಲಿಸಲಾಗಿದೆ ಎಂದಿದ್ದಾರೆ.