ಕೊಹ್ಲಿ ಜತೆಗಿನ ಡೇಟಿಂಗ್ ಬಗ್ಗೆ ಮೌನ ಮುರಿದ ತಮನ್ನಾ

ಕ್ರಿಕೆಟಿಗ ವಿರಾಟ್ ಕೊಹ್ಲಿ ಜತೆಗೆ ಮಿಲ್ಕಿ ಬ್ಯೂಟಿ ತಮನ್ನಾ ಭಾಟಿಯಾ 2012ರಲ್ಲಿ ಡೇಟಿಂಗ್ ಮಾಡುತ್ತಿದ್ದರು ಎಂಬ ವದಂತಿ ಇತ್ತು. ಆದರೆ ಈ ಗಾಸಿಪ್ ಬಗ್ಗೆ ಇಬ್ಬರೂ ಆಗ ಪ್ರತಿಕ್ರಿಯಿಸಿರಲಿಲ್ಲ. ಈಗ ತಮನ್ನಾ ಭಾಟಿಯಾ ಈ ಬಗ್ಗೆ ಮೌನ ಮುರಿದಿದ್ದಾರೆ.

ಸಂದರ್ಶನವೊಂದರಲ್ಲಿ ಮಾತನಾಡುತ್ತಿದ್ದ ಅವರು, ಜಾಹೀರಾತುವೊಂದರ ಶೂಟಿಂಗ್‌ನಲ್ಲಿ ನಾನು ವಿರಾಟ್‌ರೊಂದಿಗೆ ನಾಲ್ಕು ಶಬ್ದವಷ್ಟೇ ಮಾತನಾಡಿದ್ದೆ. ಅದನ್ನು ಬಿಟ್ಟರೆ ನಾನು ಅವರನ್ನು ಮತ್ತೆ ಭೇಟಿಯಾಗಿಯೂ ಇಲ್ಲ ಮತ್ತು ಮಾತನಾಡಿಯೂ ಇಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.

ತಾವು ಕೆಲಸ ಮಾಡಿದ ಬಹುತೇಕ ನಟರಿಗಿಂತ ಕ್ರಿಕೆಟಿಗ ವಿರಾಟ್‌ ಕೊಹ್ಲಿ ಜತೆಗಿನ ಕೆಲಸ ಉತ್ತಮ ಅನುಭವ ನೀಡಿದೆ ಎಂದು ಹೇಳಿರುವ ತಮನ್ನಾ, ನಮ್ಮಿಬ್ಬರ ನಡುವಿದ್ದ ಡೇಟಿಂಗ್‌ ವದಂತಿ ಸಂಪೂರ್ಣ ಸುಳ್ಳು ಎಂದು ಹೇಳಿದ್ದಾರೆ. ಅವರು ಸದ್ಯಕ್ಕೆ ದಟ್‌ ಇಸ್‌ ಮಹಾಲಕ್ಷ್ಮಿ, ದೇವಿ 2, ಸೈರಾ ನರಸಿಂಹ ರೆಡ್ಡಿ ಮತ್ತು ಖಾಮೋಶಿ ಸಿನಿಮಾಗಳಲ್ಲಿ ಬಿಝಿಯಾಗಿದ್ದಾರೆ.

ಬಾಕ್ಸ್ ಆಫೀಸಲ್ಲಿ ಭಾರಿ ಸದ್ದು ಮಾಡಿರುವ ಕೆಜಿಎಫ್ ಚಾಪ್ಟರ್ 1 ಸಿನಿಮಾದಲಿ ಜೋಕೆ ನಾನು ಬಳ್ಳಿಯ ಮಿಂಚು ಎಂದು ಸೊಂಟ ಬಳುಕಿಸಿದ್ದರು. ಇದೀಗ ಪುನೀತ್‌ ರಾಜ್‌ಕುಮಾರ್‌ ನಟನೆಯ ಯುವರತ್ನ ಚಿತ್ರದಲ್ಲಿ ನಟಿಸುವರೆಂಬ ಸುದ್ದಿ ಜೋರಾಗಿ ಹಬ್ಬಿದೆ.

ಆದರೆ, ಈ ಸುದ್ದಿಯನ್ನು ಆದಷ್ಟು ರಹಸ್ಯವಾಗಿಡಲು ಚಿತ್ರತಂಡ ಉದ್ದೇಶಿಸಿದ್ದು, ಪುನೀತ್‌ಗೆ ಜೋಡಿಯಾಗಿ ತಮನ್ನಾ ಬರುತ್ತಾರಾ ಅಥವಾ ಇನ್ನೊಬ್ಬ ನಟಿ ಬರುತ್ತಾರಾ ಎಂಬುದು ಕುತೂಹಲ ಕೆರಳಿಸಿರುವ ಸಂಗತಿಯಾಗಿದೆ.