ಪ್ರೇಮಿಗಳ ದಿನ ಬಿರುಗಾಳಿ ಎಬ್ಬಿಸಲಿರುವ 'ಎನ್‌ಜಿಕೆ' ಸೂರ್ಯ

ಸೌತ್ ಇಂಡಿಯಾದ ಜನಪ್ರಿಯ ಸ್ಟಾರ್‌ ತಮಿಳು ನಟ ಸೂರ್ಯ ಅವರ ಮುಂಬರುವ 'ಎನ್‌ಜಿಕೆ' ಚಿತ್ರದ ಶೂಟಿಂಗ್ ಮುಗಿದು ಟಿಸರ್ ಬಿಡುಗಡೆಗೆ ರೆಡಿಯಾಗಿದೆ. ಇದೇ ಫೆಬ್ರವರಿ 14, 2019ರಂದು 'ಟೀಸರ್' ಬಿಡುಗಡೆಯಾಗಲಿದ್ದು ಈಗಾಗಲೇ ಈ ಚಿತ್ರದ ನಾಯಕ ಸೂರ್ಯ ತಮ್ಮ 'ಟೀಸರ್‌'ಗೆ ಡಬ್‌ ಮಾಡಿ ಮುಗಿಸಿದ್ದಾರಂತೆ. ಈ ಬಗ್ಗೆ ಅಧಿಕೃತ ಮಾಹಿತಿ ಟ್ವೀಟರ್‌ನಲ್ಲಿ ಲಭ್ಯವಾಗಿದೆ. ಈ ಚಿತ್ರದ ನಿರ್ದೇಶಕರು ಸೆಲ್ವರಾಘವನ್.

ತಮಿಳು ನಟ ಸೂರ್ಯ ತಮಿಳು, ಇಡೀ ಸೌತ್ ಇಂಡಿಯಾ ಮಾತ್ರವಲ್ಲದೇ ಇಂಡಿಯಾ ಮೀರಿದಂತೆ ಜಗತ್ತಿನಾದ್ಯಂತ ಬಹಳಷ್ಟು ಅಭಿಮಾನಿಗಳನ್ನು ಹೊಂದಿದ್ದಾರೆ. ಸೂರ್ಯ ಅವರ ಚಿತ್ರಗಳ ಬಿಡುಗಡೆ ಎಂದರೆ ಇಂಡಿಯಾದಲ್ಲಿ ಒಂಥರಾ ಹಬ್ಬ ಎನ್ನಬಹುದು. ಹೀಗಿರುವಾಗ ಪ್ರೇಕ್ಷಕರು ಪ್ರೇಮಿಗಳ ದಿನವೇ ಬಿಡುಗಡೆಯಾಗಲಿರುವ 'ಎನ್‌ಜಿಕೆ' ಚಿತ್ರದ ಟೀಸರ್‌ ನೋಡಲು ಕಾತರದಿಂದ ಕಾಯುತ್ತಿರುವುದು ಸುಳ್ಳಲ್ಲ. ಈಗಾಗಲೇ ಈ ಚಿತ್ರದ ಶೂಟಿಂಗ್ ಕಂಪ್ಲೀಟ್ ಆಗಿದೆ ಎನ್ನಲಾಗಿದೆ.

ಸೂರ್ಯ ಅವರ ಮುಂಬರುವ 'ಎನ್‌ಜಿಕೆ' ಚಿತ್ರದಲ್ಲಿ ಸಾಯಿ ಪಲ್ಲವಿ ಮತ್ತು ರಕುಲ್ ಪ್ರೀತಿ ಸಿಂಗ್ ನಾಯಕಿಯರಾಗಿ ನಟಿಸಿದ್ದಾರೆ. ಶಂಕರ್ ಯುವನ್ ರಾಜಾ ಸಂಗೀತ ಚಿತ್ರಕ್ಕಿದೆ. ಜಗಪತಿ ಬಾಬು, ಇಳವರಸು ಹಾಗೂ ರಾಮ್‌ ಕುಮಾರ್ ಗಣೇಶ್ ಚಿತ್ರದ ಪ್ರಮುಖ ಪೋಷಕವರ್ಗದಲ್ಲಿದ್ದಾರೆ. 'ಎನ್‌ಜಿಕೆ' ಚಿತ್ರವು ಸದ್ಯದಲ್ಲಿಯೇ ಬಿಡುಗಡೆಯಾಗಲಿದೆ. ಬಹಳ ಕಾಲದಿಂದ ಸೂರ್ಯ ಅವರ ಚಿತ್ರ ನೋಡಲು ಕಾಯುತ್ತಿರುವ ಅಭಿಮಾನಿಗಳಿಗೆ ಈ ಸುದ್ದಿ ಸಂತಸ ತರಲಿದೆ.