ಸಮಾಧಿಗೆ ಕೊಂಡೊಯ್ದು 308 ಹುಡುಗಿಯರನ್ನು ಬಲೆಗೆ ಬೀಳಿಸಿದ್ದ ಸಂಜಯ್‌ ದತ್

ರಾಜ್‌ಕುಮಾರ್‌ ಹಿರಾನಿ ನಿರ್ದೇಶನದ 'ಸಂಜು' ಚಿತ್ರದ ಟ್ರೇಲರ್‌ನಲ್ಲಿ ಸಂಜಯ್‌ ದತ್‌ ಪಾತ್ರದಲ್ಲಿ ಕಾಣಿಸುತ್ತಿರುವ ರಣಬೀರ್‌ ಕಪೂರ್‌ 'ನಾನು 308 ಮಹಿಳೆಯರ ಜತೆ ಮಲಗಿದ್ದೇನೆ' ಎಂದು ಹೇಳಿರುವುದು ಎಲ್ಲರನ್ನು ಹುಬ್ಬೇರುವಂತೆ ಮಾಡಿದೆ. ಸಂಜಯ್‌ ದತ್‌ ಅಷ್ಟೊಂದು ಹುಡುಗಿಯರನ್ನು ಹೇಗೆ ಮರಳು ಮಾಡಿದರು ಎಂಬ ಕತೆಯಂತೂ ರೋಚಕವಾಗಿದೆ.

ಸಂಜಯ್‌ದತ್‌ಗೆ ಅಷ್ಟೊಂದು ಹೆಣ್ಣು ಮಕ್ಕಳು ಹೇಗೆ ಮರಳಾದರು? ಆತನ ಲುಕ್‌ಗೆ ಮರಳಾಗಿರಬಹುದು ಎಂದು ಭಾವಿಸಿದರೆ ನಿಮ್ಮ ಊಹೆ ತಪ್ಪು. ಸಂಜಯ್‌ ದತ್‌ ಹುಡುಗಿಯರನ್ನು ಸೆಳೆಯಲು ಸಿನಿಮಾ ನಟನೆಯನ್ನೂ ಮೀರಿ ನಿಜ ಜೀವನದಲ್ಲಿ ನಟಿಸುತ್ತಿದ್ದರು ಎಂದು ರಾಜ್‌ಕುಮಾರ್‌ ಹಿರಾನಿ ಇತ್ತೀಚೆಗೆ ನಡೆಸಿದ ಸಂದರ್ಶನವೊಂದರಲ್ಲಿ ಸಂಜಯ್‌ರ ಕೃಷ್ಣಲೀಲೆ ಕುರಿತು ಹೇಳಿದ್ದಾರೆ.

ಸಂಜಯ್ ಯಾವುದಾದರೂ ಹುಡುಗಿ ಜತೆ ಡೇಟಿಂಗ್‌ ಮಾಡುತ್ತಿದ್ದರೆ ಆಕೆಯನ್ನು ಸಿಂಪತಿ ಮೂಲಕ ಒಲಿಸಿಕೊಳ್ಳುತ್ತಿದ್ದರು. ಅದಕ್ಕಾಗಿ ಸಂಜಯ್ ಮಾಡುತ್ತಿದ್ದ ತಂತ್ರವೆಂದರೆ ಆಕೆಯನ್ನು ಯಾವುದಾದರೂ ಸಮಾಧಿಗೆ ಕರೆದುಕೊಂಡು ಹೋಗುತ್ತಿದ್ದರು. ಇದು ನನ್ನ ತಾಯಿಯ ಸಮಾಧಿ ಎಂದು ಹೇಳಿ, ತಾಯಿಯನ್ನು ನೆನೆದು ತುಂಬಾ ದುಃಖ ಪಡುತ್ತಿದ್ದರು, ಇದನ್ನು ನೋಡಿದ ಆ ಹುಡುಗಿಗೆ ಅಯ್ಯೋ...ಪಾಪ ಎನಿಸಿ ಸಂಜಯ್‌ನನ್ನು ಸಮಧಾನ ಮಾಡುತ್ತಿದ್ದಳು. ಅಷ್ಟಕ್ಕೆ ಆ ಹುಡುಗಿ ಸಂಜಯ್‌ ಬೀಸಿದ ಬಲೆಗೆ ಬೀಳುತ್ತಿದ್ದಳು.


ಸಂಜಯ್‌ ಬದುಕಿನ ರೋಚಕ ಕತೆ ಬಗ್ಗೆ ಹೇಳುತ್ತಾ ಮತ್ತೊಂದು ಅಂಶವನ್ನು ಹೇಳಿದ್ದಾರೆ. ಹುಡುಗಿಯರನ್ನು ಸುಳ್ಳು ಹೇಳಿ ಬಳಸಿಕೊಳ್ಳುತ್ತಿದ್ದ ಸಂಜಯ್‌, ತನಗೆ ಯಾವುದಾದರೂ ಹುಡುಗಿ ಕೈಕೊಟ್ಟರೆ ಸಹಿಸಿಕೊಳ್ಳುತ್ತಿರಲಿಲ್ಲ. ಒಮ್ಮೆ ಒಂದು ಹುಡುಗಿ ತನಗೆ ಮೋಸ ಮಾಡಿದಳು ಎಂದು ಕೋಪದಿಂದ ಕಾರು ತಗೊಂಡು ಹೋಗಿ ಆಕೆಯ ಮನೆಯ ಎದುರುಗಡೆ ನಿಲ್ಲಿಸಿದ್ದ ಕಾರಿಗೆ ಗುದ್ದಿದ್ದರು, ಆ ಕಾರು ಆಕೆಯ ಹೊಸ ಬಾಯ್‌ಫ್ರೆಂಡ್‌ದಾಗಿತ್ತು. ಇಬ್ಬರ ಕಾರು ನಜ್ಜುಗುಜ್ಜಾಯಿತು.

ಸಂಜುಗೆ ಮಹಿಳೆಯರ ಹುಚ್ಚು ಎಷ್ಟಿದೆಯೆಂದರೆ 90ರ ದಶಕದಿಂದ ಇದುವರೆಗಿನ ಅವರ ಸಿನಿಮಾದಲ್ಲಿ ನಟಿಸಿರುವ ಸಹ ನಟಿಯರೊಂದಿಗೆ ಸಂಬಂಧ ಇಟ್ಟುಕೊಳ್ಳುತ್ತಿದ್ದ ಎಂದು ಕೂಡ ಹೇಳಲಾಗುತ್ತಿದೆ.