ಸದ್ಯಕ್ಕಿಲ್ಲ ಬಾಲಿವುಡ್‌ ಪ್ರವೇಶ ಎಂದ ಟಾಲಿವುಡ್ ಪ್ರಿನ್ಸ್ ಮಹೇಶ್‌ ಬಾಬು

ಬಾಲಿವುಡ್‌ ಸಿನಿಮಾ ಪ್ರವೇಶವನ್ನು ತೆಲುಗು ಸೂಪರ್‌ಸ್ಟಾರ್‌ ಮಹೇಶ್‌ ಬಾಬು ಪರೋಕ್ಷವಾಗಿ ಅಲ್ಲಗಳೆದಿದ್ದಾರೆ. ಇತ್ತೀಚೆಗೆ ನೀಡಿದ ಸಂದರ್ಶನವೊಂದರಲ್ಲಿ ಈ ವಿಷಯ ತಿಳಿಸಿದ್ದಾರೆ. ಬಾಹುಬಲಿ ಖ್ಯಾತಿಯ ಪ್ರಭಾಸ್‌ ಇದೀಗ 'ಸಾಹೋ' ಚಿತ್ರದ ಮೂಲಕ ಬಾಲಿವುಡ್‌ ಪ್ರವೇಶ ಮಾಡುತ್ತಿರುವ ಬೆನ್ನಲ್ಲೇ ನೀವು ಕೂಡ ಹಿಂದಿ ಚಿತ್ರರಂಗ ಪ್ರವೇಶಿಸುತ್ತೀರಿ ಎಂಬ ಮಾತು ಕೇಳಿ ಬರುತ್ತಿದೆ. ಈ ಬಗ್ಗೆ ಏನು ಹೇಳುತ್ತೀರಿ ಎಂದು ಕೇಳಿದ ಪ್ರಶ್ನೆಗೆ ಉತ್ತರಿಸಿರುವ ಅವರು, 'ನನ್ನ ಪ್ಲೇಟ್‌ ತುಂಬಿಹೋಗಿದೆ. ಹೀಗಾಗಿ ಈಗಲೇ ಬಾಲಿವುಡ್‌ ಪ್ರವೇಶದ ಬಗ್ಗೆ ಹೇಳಲು ಸಾಧ್ಯವಿಲ್ಲ' ಎಂದವರು ತಿಳಿಸಿದ್ದಾರೆ.

ಬಾಲಿವುಡ್‌ನಲ್ಲಿ ಎಲ್ಲಾ ನಿರ್ದೇಶಕರೂ ಪ್ರತಿಭಾವಂತರು. ಕಾಲ ಕೂಡಿ ಬಂದರೆ ಯಾರ ಜತೆಗೂ ಕೆಲಸ ಮಾಡಬಹುದು. ಅದೇ ರೀತಿ ಹಿಂದಿ ಚಿತ್ರರಂಗದಲ್ಲಿರುವ ನಟಿಯರು ಕೂಡ ಪ್ರತಿಭಾವಂತರು ಎಂದಷ್ಟೇ ಮಹೇಶ್‌ ಹೇಳಿದ್ದಾರೆ.

ಮಹರ್ಷಿ ಸಿನಿಮಾದ ಅಭೂತಪೂರ್ವ ಯಶಸ್ಸು ಮತ್ತು ಮಗ ನೋಡುತ್ತಿರುವ ಮೊದಲನೇ ವಿಶ್ವಕಪ್‌ ಕ್ರಿಕೆಟ್‌ ಪಂದ್ಯದಿಂದಾಗಿ ಈ ಬಾರಿಯ ರಜಾ ಕಾಲ ನನಗೆ ತುಂಬಾ ಮಹತ್ವದ್ದಾಗಿದೆ ಎಂದಿರುವ ಅವರು, ಮುಂದಿನ ಸಿನಿಮಾ 'ಸರಿಲೇರು ನೀಕೆವ್ವರು' ಚಿತ್ರೀಕರಣ ಜುಲೈನಲ್ಲಿ ಆರಂಭವಾಗಲಿದೆ ಎಂದಿದ್ದಾರೆ.