ಒಂದು ಕೋಟಿ ಸಾಲ ತೀರಿಸದ ಅರ್ಜುನ್ ರಾಮ್‌ಪಾಲ್ ವಿರುದ್ಧ ಹೈಕೋರ್ಟ್‌ನಲ್ಲಿ ದಾವೆ

ಬಾಲಿವುಡ್ ನಟ ಅರ್ಜುನ್ ರಾಮ್ ಪಾಲ್ ವಿರುದ್ಧ ಬಾಂಬೆ ಹೈಕೋರ್ಟ್‌ನಲ್ಲಿ ಮೊಕದ್ದಮೆ ದಾಖಲಾಗಿದೆ. ಮೇ 2018ರಲ್ಲಿ ಅರ್ಜುನ್ ರಾಮ್‍ಪಾಲ್ ವೈಟಿ ಎಂಟರ್‌ಟೇನ್‌ಮೆಂಟ್ ಎಂಬ ಕಂಪೆನಿಯಿಂದ ಒಂದು ಕೋಟಿ ರೂ. ಸಾಲ ಪಡೆದಿದ್ದರು. ಆ ಹಣವನ್ನು 90 ದಿನಗಳ ಒಳಗೆ ಶೇ.12ರ ಬಡ್ಡಿ ಸೇರಿಸಿ ನೀಡುವುದಾಗಿಯೂ ಹೇಳಿದ್ದರು. ಗಡುವು ಮುಗಿದ ಬಳಿಕ ಬಡ್ಡಿಯೂ ಇಲ್ಲ ಅಸಲು ಕೊಟ್ಟಿಲ್ಲ ಎಂದು ಆರೋಪಿಸಿರುವ ಕಂಪೆನಿ ಹೈಕೋರ್ಟ್‌ ಮೊರೆ ಹೋಗಿದ್ದು ರಾಮ್‌ಪಾಲ್ ವಿರುದ್ಧ ಮೊಕದ್ದಮೆ ದಾಖಲಿಸಿದೆ.

ಕಂಪೆನಿಗೆ ಅರ್ಜುನ್ ರಾಮ್‌ಪಾಲ್ 1 ಕೋಟಿ ರೂ.ಗಳ ಪೋಸ್ಟ್ ಡೇಟೆಡ್ ಚೆಕ್ ನೀಡಿದ್ದರು. ಆದರೆ ಆ ಚೆಕ್ ಬೌನ್ಸ್ ಆಗಿದೆ ಎಂದು ಕಂಪೆನಿ ಪರ ವಕೀಲರಾದ ಅರುಣ್ ದಾಸ್‍ಗುಪ್ತಾ ತಿಳಿಸಿದ್ದಾರೆ. ನೆಗೋಷಿಯಬಲ್ ಇನ್‌ಸ್ಟ್ರುಮೆಂಟ್ ಆಕ್ಟ್ 1881ರ ಸೆಕ್ಷನ್ 138ರ ಪ್ರಕಾರ ಲೀಗಲ್ ನೋಟಿಸ್ ಕಳುಹಿಸಲಾಗಿದೆ. ಅಸಲಿನ ಜತೆಗೆ ಬಡ್ಡಿಯನ್ನೂ ಸೇರಿಸಿ 14 ದಿನಗಳ ಒಳಗೆ ಸಲ್ಲಿಸುವಂತೆ ಸೂಚಿಸಿರುವುದಾಗಿ ತಿಳಿಸಿದ್ದಾರೆ.

ಆದರೆ ಅಕ್ಟೋಬರ್‌ನಲ್ಲಿ ₹ 7.5 ಲಕ್ಷ ಕಂಪೆನಿಗೆ ಪಾವತಿಸಿದ್ದೇನೆ ಎಂದು ರಾಮ್‍ಪಾಲ್ ಹೇಳಿದ್ದಾರೆ. ರಾಮ್‍ಪಾಲ್‌ರ ಈ ಹೇಳಿಕೆ ಸತ್ಯಕ್ಕೆ ದೂರವಾದದ್ದು ಎಂದು ಕಂಪೆನಿ ಪರ ವಕೀಲರು ತಿಳಿಸಿದ್ದಾರೆ. ಇದುವರೆಗೆ ಅವರು ನಯಾಪೈಸೆ ಹಣವನ್ನೂ ಕಟ್ಟಿಲ್ಲ ಎಂದಿದ್ದಾರೆ.