65th Amazon Filmfare Awards 2020: ವೇದಿಕೆಗೆ ಟವೆಲ್‌ ಸುತ್ತಿಕೊಂಡು ಬಂದ ವರುಣ್, ವಿಕಿ

ಅಸ್ಸಾಂನ ಗುವಾಹಟಿಯ ಇಂದಿರಾಗಾಂಧಿ ಅಥ್ಲೆಟಿಕ್ ಮೈದಾನದಲ್ಲಿ ನಡೆಯುತ್ತಿರುವ 65ನೇ ಅಮೆಜಾನ್ ಫಿಲ್ಮ್‌ಫೇರ್ ಪ್ರಶಸ್ತಿ 2020 ಹಲವಾರು ಮನರಂಜನಾ ಕಾರ್ಯಕ್ರಮಗಳಿಗೆ ಸಾಕ್ಷಿ ಆಯಿತು. ವರುಣ್ ಧವನ್ ಹಾಗೂ ವಿಕಿ ಕೌಶಾಲ್‌ರ ಕೆಲವೊಂದು ತಮಾಷೆ ಪ್ರಸಂಗಗಳು ಸಭಿಕರನ್ನು ನಕ್ಕು ನಲಿಸಿದ್ದು ವಿಶೇಷವಾಗಿತ್ತು.

ನಿರೂಪಕರಲ್ಲಿ ಒಬ್ಬರಾಗಿರುವ ವಿಕಿ ಕೌಶಾಲ್ ಹಾಗೂ ನಟ ವರುಣ್ ಧವನ್ ಟವೆಲ್ ಸುತ್ತಿಕೊಂಡು ಬಂದು ತಮ್ಮದೇ ಆದ ಶೈಲಿಯಲ್ಲಿ ಡೈಲಾಗ್ ಹೇಳುತ್ತಾ ರಂಜಿಸಿದರು. ಬಳಿಕ ಮತ್ತೊಬ್ಬ ನಿರೂಪಕರಾಗಿರುವ ಕರಣ್ ಜೋಹಾರ್ ವೇದಿಕೆ ಬರುತ್ತಾ ಪ್ಯಾಂಟ್ ತಂದುಕೊಟ್ಟಿದ್ದು ಎಲ್ಲರನ್ನೂ ನಗೆಗಡಲಲ್ಲಿ ತೇಲಿಸಿತು.

ಅಸ್ಸಾಂನ ಆಹ್ಲಾದಕರ ವಾತಾವರಣ ಪ್ರಶಸ್ತಿ ಪ್ರದಾನ ಸಮಾರಂಭಕ್ಕೆ ಇನ್ನಷ್ಟು ಕಳೆಗಟ್ಟುವಂತೆ ಮಾಡಿತು. ಅಕ್ಷಯ್ ಕುಮಾರ್, ಆಯುಷ್ಮಾನ್ ಖುರಾನಾ ಹಾಗೂ ರಣವೀರ್ ಸಿಂಗ್ ವೇದಿಕೆ ಮೇಲೆ ಹೆಜ್ಜೆ ಹಾಕಿ ಎಲ್ಲರನ್ನೂ ರಂಜಿಸಿದರು.

ಈ ವರ್ಣರಂಜಿತ ಕಾರ್ಯಕ್ರಮದಲ್ಲಿ ಆಲಿಯಾ ಭಟ್, ಮಾಧುರಿ ದೀಕ್ಷಿತ್, ಕಾರ್ತಿಕ್ ಆರ್ಯನ್ ಸೇರಿದಂತೆ ಬಾಲಿವುಡ್‌ನ ಹಲವಾರು ಮಂದಿ ತಾರೆಗಳು ಆಗಮಿಸಿ ಇನ್ನಷ್ಟು ಹುರುಪು ತುಂಬಿದರು. ಈ ಸಲ ಅತ್ಯುತ್ತಮ ನಟಿ ಹೊಸ ಪರಿಚಯ ಪ್ರಶಸ್ತಿ ಅನನ್ಯಾ ಪಾಂಡೆ ಪಾಲಾಗಿದ್ದರೆ ಅತ್ಯುತ್ತಮ ನಟ - ಹೊಸ ಪರಿಚಯ ಸಿದ್ಧಾಂತ್ ಚತುರ್ವೇದಿ ಮುಡಿಗೇರಿದೆ.