ಪುರಿ ಜಗನ್ನಾಥ್‌ ಜೊತೆ ಬಿಟೌನ್‌ ಪಯಣ
ಖ್ಯಾತ ನಿರ್ದೇಶಕ ಪುರಿ ಜಗನ್ನಾಥ್‌ ಮತ್ತು ವಿಜಯ್‌ ದೇವರಕೊಂಡ ಜೊತೆಯಾಗಿ ಸಿನಿಮಾ ಮಾಡುತ್ತಾರೆ ಎಂಬ ಸುದ್ದಿ ಕೆಲವು ದಿನಗಳ ಹಿಂದೆಯೇ ಹಬ್ಬಿತ್ತು. ಈ ಚಿತ್ರಕ್ಕೆ ಫೈಟರ್‌ ಎಂದು ಶೀರ್ಷಿಕೆ ಇಡಲಾಗಿದೆ ಎಂಬ ಮಾತು ಕೇಳಿಬರುತ್ತಿದ್ದರೂ ಆ ಟೈಟಲ್‌ ಇನ್ನೂ ಅಧಿಕೃತವಾಗಿಲ್ಲ. ಈ ಸಿನಿಮಾ ತೆಲುಗಿನಲ್ಲಿ ಮೂಡಿಬರಲಿದೆ ಎಂದೇ ಎಲ್ಲರೂ ತಿಳಿದುಕೊಂಡಿದ್ದರು. ಆದರೆ ಈಗೊಂದು ಬ್ರೇಕಿಂಗ್‌ ನ್ಯೂಸ್‌ ಹೊರಬಂದಿದೆ. ಮೊದಲು ಹಿಂದಿಯಲ್ಲಿ ಚಿತ್ರೀಕರಣಗೊಂಡು, ಬಳಿಕ ದಕ್ಷಿಣದ ಇತರೆ ಭಾಷೆಗಳಿಗೆ ಈ ಸಿನಿಮಾ ಡಬ್‌ ಆಗಲಿದೆಯಂತೆ.
ನಿರ್ಮಾಣದಲ್ಲಿ ಕೈ ಜೋಡಿಸಿದ ಕರಣ್‌ ಜೋಹರ್‌
ಹೊಸ ಪ್ರತಿಭೆಗಳನ್ನು ಬಾಲಿವುಡ್‌ಗೆ ಕರೆತರುವಲ್ಲಿ ಕರಣ್‌ ಜೋಹರ್‌ ಸದಾ ಮುಂದಿರುತ್ತಾರೆ. ವಿಜಯ್‌ ದೇವರಕೊಂಡ ವಿಚಾರದಲ್ಲೂ ಅದು ಸಾಬೀತಾಗುತ್ತಿದೆ. ಅವರು ನಟಿಸಲಿರುವ ಮೊದಲ ಬಾಲಿವುಡ್ ಚಿತ್ರಕ್ಕೆ ಕರಣ್‌ ಜೋಹರ್‌ ಬಂಡವಾಳ ಹೂಡಲಿದ್ದಾರೆ. ಕರಣ್‌ ಒಡೆತನದ ಧರ್ಮ ಪ್ರೊಡಕ್ಷನ್ಸ್‌ ಸಂಸ್ಥೆಯು ಪುರಿ ಜಗನ್ನಾಥ್‌ ಟೂರಿಂಗ್‌ ಟಾಕೀಸ್‌ ಜೊತೆ ಕೈ ಜೋಡಿಸುತ್ತಿದೆ. ಇತ್ತೀಚೆಗಷ್ಟೇ ಈ ಚಿತ್ರದ ಮುಹೂರ್ತ ಸಮಾರಂಭ ನೆರವೇರಿದೆ. ಅಚ್ಚರಿ ಎಂದರೆ, ಹಿಂದಿ ಚಿತ್ರರಂಗದ ಕೇಂದ್ರವಾದ ಮುಂಬೈನಲ್ಲೇ ಮುಹೂರ್ತ ಮಾಡಲಾಗಿದೆ.
ವಿಜಯ್‌ಗೆ ನಾಯಕಿಯಾಗಿ ಬಾಲಿವುಡ್ ಬೆಡಗಿ
ವಿಜಯ್‌ ದೇವರಕೊಂಡ ನಟನೆಯ ಸಿನಿಮಾ ಎಂದರೆ, ನಾಯಕಿ ಯಾರಾಗಬಹುದು ಎಂಬ ಕುತೂಹಲ ಅಭಿಮಾನಿಗಳಿಗೆ ಇದ್ದೇ ಇರುತ್ತದೆ. ಮೂಲಗಳ ಪ್ರಕಾರ ಈ ಚಿತ್ರಕ್ಕೆ ನಾಯಕಿಯಾಗಿ ಬಾಲಿವುಡ್ ಬೆಡಗಿ ಅನನ್ಯಾ ಪಾಂಡೆ ಆಯ್ಕೆ ಆಗಿದ್ದಾರೆ. 'ಸ್ಟೂಡೆಂಟ್‌ ಆಫ್‌ ದ ಇಯರ್‌ 2' ಹಾಗೂ 'ಪತಿ ಪತ್ನಿ ಔರ್‌ ವೋ' ಸಿನಿಮಾಗಳ ಮೂಲಕ ಬಾಲಿವುಡ್‌ನಲ್ಲಿ ಹೆಸರು ಮಾಡಿರುವ ನಟಿ ಅನನ್ಯಾ ಪಾಂಡೆ 'ಫೈಟರ್‌' ಚಿತ್ರದಲ್ಲಿ ವಿಜಯ್‌ ದೇವರಕೊಂಡಗೆ ಜೋಡಿ ಆಗಲಿದ್ದಾರೆ ಎನ್ನಲಾಗಿದೆ. ಈ ಬಗ್ಗೆ ಚಿತ್ರತಂಡ ಇನ್ನಷ್ಟೇ ಅಧಿಕೃತ ಮಾಹಿತಿ ಬಹಿರಂಗಪಡಿಸಬೇಕಿದೆ.
ಮೊದಲ ದೃಶ್ಯಕ್ಕೆ ಕ್ಲ್ಯಾಪ್‌ ಮಾಡಿದ ಚಾರ್ಮಿ ಕೌರ್‌
ಪುರಿ ಜಗನ್ನಾಥ್‌ ಜೊತೆಯಲ್ಲಿ ಒಡನಾಟ ಹೆಚ್ಚಿಸಿಕೊಂಡಿರುವ ನಟಿ ಚಾರ್ಮಿ ಕೌರ್‌ 'ಫೈಟರ್‌' ಚಿತ್ರದ ಮೊದಲ ದೃಶ್ಯಕ್ಕೆ ಕ್ಲ್ಯಾಪ್‌ ಮಾಡುವ ಮೂಲಕ ಶುಭ ಹಾರೈಸಿದ್ದಾರೆ. ಈ ಹಿಂದೆ ಪುರಿ ನಿರ್ದೇಶನ ಮಾಡಿದ 'ಇಸ್ಮಾರ್ಟ್‌ ಶಂಕರ್‌' ಚಿತ್ರಕ್ಕೆ ಚಾರ್ಮಿ ಕಾರ್ಯಕಾರಿ ನಿರ್ಮಾಪಕಿಯಾಗಿ ಕೆಲಸ ಮಾಡಿದ್ದರು. ಈಗ 'ಫೈಟರ್‌' ಮುಹೂರ್ತದ ವೇಳೆಯೂ ಪುರಿ, ವಿಜಯ್‌ ಮತ್ತು ಚಾರ್ಮಿ ಜತೆಯಾಗಿ ಫೋಟೋಗೆ ಪೋಸ್‌ ನೀಡಿದ್ದು, ಸಾಮಾಜಿಕ ಜಾಲತಾಣದಲ್ಲಿ ಗಮನ ಸೆಳೆಯುತ್ತಿದೆ.
ಹೊಸ ಅವತಾರದಲ್ಲಿ ವಿಜಯ್‌ ದೇವರಕೊಂಡ
ಪ್ರತಿ ಸಿನಿಮಾದಲ್ಲೂ ವಿಜಯ್‌ ದೇವರಕೊಂಡು ವಿಭಿನ್ನ ಗೆಟಪ್‌ ಪ್ರಯತ್ನಿಸುತ್ತಾರೆ. ಇನ್ನು ತಮ್ಮ ಸಿನಿಮಾದ ನಾಯಕನನ್ನು ಹೊಸ ರೀತಿಯಲ್ಲಿ ತೋರಿಸುವ ಕಲೆ ಪುರಿ ಜಗನ್ನಾಥ್‌ ಅವರಿಗೂ ಸಿದ್ಧಿಸಿದೆ. ಇವರಿಬ್ಬರ ಕಾಂಬಿನೇಷನ್‌ನಲ್ಲಿ 'ಫೈಟರ್‌' ಮೂಡಿಬರುತ್ತಿದ್ದು, ವಿಜಯ್‌ ಗೆಟಪ್‌ ಹೇಗಿರಲಿದೆ ಎಂಬ ಕುತೂಹಲ ಮೂಡಿದೆ. ಈ ಪಾತ್ರಕ್ಕಾಗಿ ಅವರು ಥಾಯ್ಲೆಂಡ್‌ಗೆ ತೆರಳಿ ಮಾರ್ಷಲ್‌ ಆರ್ಟ್ಸ್ ಕಲಿತು ಬಂದಿದ್ದಾರಂತೆ. ಸಾಹಸ ಪ್ರಧಾನ ಕಥೆಯನ್ನು ಈ ಚಿತ್ರ ಒಳಗೊಂಡಿರಲಿದೆ.