ಮದುವೆ ಆದ ಮೇಲೆ ನನಗೆ ಆಫರ್ಸ್‌ ಜಾಸ್ತಿಯಾದವು

-ಹರೀಶ್‌ ಬಸವರಾಜ್‌

*99 ಸಿನಿಮಾ ನಿಮಗೆ ಆಫರ್‌ ಬಂದಾಗ ನಿಮ್ಮ ಮೊದಲ ಪ್ರತಿಕ್ರಿಯೆ ಏನು?

ನಾನು ತಮಿಳು ಚಿತ್ರದ ಬಗ್ಗೆ ಕೇಳಿದ್ದೆ ನೋಡಿರಲಿಲ್ಲ. ಪ್ರೀತಂ ನನಗೆ ಇದನ್ನು ಆಫರ್‌ ಮಾಡಿದಾಗ ತಕ್ಷಣ 96 ಚಿತ್ರವನ್ನು ನೋಡಿದೆ. ಏಕೆಂದರೆ ನಾನು ರಿಮೇಕ್‌ ಸಿನಿಮಾಗಳನ್ನು ಅಷ್ಟಾಗಿ ಒಪ್ಪಿಕೊಳ್ಳುವುದಿಲ್ಲ. ಆದರೆ ಈ ಚಿತ್ರ ನೋಡಿದ ತಕ್ಷಣ ನನಗೆ ಇದನ್ನು ನಾನು ಮಾಡಬೇಕು ಅನ್ನಿಸ್ತು ಹಾಗಾಗಿ ಒಪ್ಪಿಕೊಂಡೆ.

*ರಿಮೇಕ್‌ ಸಿನಿಮಾಗಳನ್ನು ಯಾಕೆ ಒಪ್ಪಿಕೊಳ್ಳುವುದಿಲ್ಲ?

ಇಲ್ಲ. ನನಗೆ ರಿಮೇಕ್‌ ಸಿನಿಮಾಗಳಲ್ಲಿ ನಟಿಸುವುದು ಅಷ್ಟೋಂದು ಇಷ್ಟವಿಲ್ಲ. ಏಕೆಂದರೆ ಈಗಾಗಲೇ ಒಬ್ಬರು ನಟಿಸಿದ್ದನ್ನು ಮತ್ತೆ ನಟಿಸಲು ಇಷ್ಟಪಡುವುದಿಲ್ಲ. ಅದು ಒಂದು ರೀತಿಯಲ್ಲಿ ಕಾಪಿ ಮಾಡಿದಂತೆ ಅನಿಸುತ್ತದೆ. ನನ್ನ ಇಷ್ಟು ದಿನದ ಕರಿಯರ್‌ನಲ್ಲಿ ಇದು ನನ್ನ ಎರಡನೇ ರಿಮೇಕ್‌ ಸಿನಿಮಾವಾಗಿದೆ. ಆದರೆ 99 ಮಾತ್ರ ತುಂಬಾ ಫ್ರೆಶ್‌ ಫಿಲಿಂಗ್‌ ಇರುವ ಸಿನಿಮಾ ಅನ್ನಿಸ್ತು. ಜತೆಗೆ ನಿರ್ದೇಶಕರು, ನಾಯಕ ನಟ, ನಿರ್ಮಾಪಕರು ಎಲ್ಲವನ್ನು ನೋಡಿದಾಗ ಇದೊಂದು ಒಳ್ಳೆ ಪ್ರಾಜೆಕ್ಟ್ ಅನ್ನಿಸ್ತು ನನಗೆ.

*99 ಸಿನಿಮಾದ ಪಾತ್ರ ನಿಮಗೆ ತುಂಬಾ ಸುಲಭವಾಗಿ ದಕ್ಕಿತಾ?

-ಸುಲಭವಾಗಿ ದಕ್ಕಿತು ಎನ್ನುವುದಕ್ಕಿಂತ, ಇದು ನನಗೆ ಹೊಸ ಅನುಭವ. ಏಕೆಂದರೆ ಇದು ನಾನು ಸಾಮಾನ್ಯಾಗಿ ತರಲೆ, ತುಂಟ ಹುಡುಗಿಯ ಪಾತ್ರದಲ್ಲಿ ನಟಿಸುತ್ತೇನೆ ಆದರೆ ಇದರಲ್ಲಿ, ಸ್ವಲ್ಪ ಸೀರಿಯಸ್‌, ಮೆಚುರ್ಡ್‌ ಆ್ಯಕ್ಟಿಂಗ್‌ ಎಲ್ಲವೂ ಇದೆ. ಜತೆಗೆ ಹಳೇ ಸ್ನೇಹಿತರನ್ನು ನೋಡಲು ಬರುವುದು ಜತೆಗೆ ಒಂದು ಮಗುವಿನ ತಾಯಿಯ ಪಾತ್ರ ಹೀಗೆ ಹತ್ತು ಹಲವು ವಿಶೇಷತೆಗಳು ಈ ಸಿನಿಮಾದ ಪಾತ್ರದಲ್ಲಿದೆ.

*ಮದುವೆ ಆದ ಮೇಲೆ ಮೆಚುರ್ಡ್‌ ಪಾತ್ರಗಳನ್ನು ಒಪ್ಪಿಕೊಳ್ಳುತ್ತಿದ್ದೀರಾ?

-ಇಲ್ಲ ಹಾಗೇನು ಇಲ್ಲ, ಈ ಪ್ರಾಜೆಕ್ಟ್ ನನಗೆ ಇಷ್ಟವಾಯಿತು ಒಪ್ಪಿಕೊಂಡೆ ಅಷ್ಟೇ. ನನ್ನ ಬಳಿ ಕಥೆ ಹೇಳಲು ಬಂದಾಗ ಕಥೆ ಕೇಳುತ್ತೇನೆ. ಇಷ್ಟವಾದರೆ ಒಪ್ಪಿಕೊಳ್ಳುತ್ತೇನೆ ಅಷ್ಟೇ ಅದರಲ್ಲಿ ಮೆಚುರ್ಡ್‌ ಆ್ಯಕ್ಟಿಂಗ್‌, ಬಬ್ಲಿ ಎಂಬುದನ್ನು ನೋಡಲು ಹೋಗುವುದಿಲ್ಲ.

*ಗಣೇಶ್‌ ಅವರ ಜತೆ ಎರಡನೇ ಬಾರಿ ನಟಿಸುತ್ತಿದ್ದೀರಾ?

-ಗಣೇಶ್‌ ಜತೆ ರೋಮಿಯೋ ಮಾಡುವಾಗ, ಅವರು ತುಂಬಾ ಸೈಲೆಂಟ್‌ ಬರುತ್ತಿದ್ದರು ವಿಷ್‌ ಮಾಡುತ್ತಿದ್ದರು ಶೂಟಿಂಗ್‌ ಮಾಡುತ್ತಿದ್ದೇವು ಹೋಗುತ್ತಿದ್ದರು. ಆದರೆ ಈ ಸಿನಿಮಾದಲ್ಲಿ ನಾನು ಬೇರೆ ಗಣೇಶ್‌ ಅವರನ್ನು ನೋಡಿದೆ. ಅವರೊಂದಿಗೆ ಕೆಲಸ ಮಾಡಲು ತುಂಬಾ ಖುಷಿಯಾಗುತ್ತದೆ. ಅವರ ಜತೆ ಮತ್ತು ಪ್ರೀತಂ ಅವರ ಜತೆ ಕೆಲಸ ಮಾಡುವುದು ಬಹಳ ಖುಷಿಯ ವಿಚಾರ ಇಬ್ಬರು ಫನ್‌ ಮಾಡಿಕೊಂಡು ಶೂಟಿಂಗ್‌ ಮಾಡಿದ್ದೇವೆ.

*ಮದುವೆ ಆದ ಮೇಲೆ ಸಿನಿಮಾಗಳ ಆಫರ್‌ ಕಡಿಮೆಯಾಗಿದೆಯಾ?

ಅಯ್ಯೋ ಇಲ್ಲ, ಮದುವೆಗೆ ಮುಂಚೆ ಎಷ್ಟು ಆಫರ್‌ ಬರುತ್ತಿತ್ತೋ, ಅದಕ್ಕಿಂತ ಒಂದಷ್ಟು ಜಾಸ್ತಿಯೇ ಬರುತ್ತಿವೆ. ಆದರೆ ನಾನೇ ಒಳ್ಳೊಳ್ಳೆ ಪಾತ್ರಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದೇನೆ. ಸಾಕಷ್ಟು ಜನ ಮದುವೆ ಆದ ಮೇಲೆ ನಟನೆಯನ್ನು ಬಿಟ್ಟು ಬಿಡುತ್ತಾರೆ. ನನ್ನ ವಿಚಾರದಲ್ಲಿ ಅದು ಸುಳ್ಳಾಗಿದೆ. ಮದುವೆ ಆದ ಮೇಲೆ ಒಂದಷ್ಟು ಸಿನಿಮಾಗಳಲ್ಲಿ ನಾನು ಬಿಝಿಯಾಗಿದ್ದೇನೆ.

*ನಿಮ್ಮ ಪತಿ ನವೀನ್‌ ನಿರ್ಮಾಪಕರು, ಇಬ್ಬರು ಸೇರಿ ಸಿನಿಮಾ ಮಾಡುವ ಐಡಿಯಾ ಏನಾದ್ರೂ ಇದೆಯಾ?

-ಸಧ್ಯಕ್ಕೆ ಅವರು ಬಿಝಿನೆಸ್‌ ಕಡೆ ಗಮನ ಕೊಟ್ಟಿದ್ದಾರೆ. ಸಿನಿಮಾ ಮಾಡುವ ಐಡಿಯಾ ಇಲ್ಲ, ಆದರೆ ಭವಿಷ್ಯದಲ್ಲಿ ಆದರೂ ಆಗಬಹುದು.

---

99 ಒಂದು ಪ್ಯೂರ್‌ ಲವ್‌ ಮತ್ತು ಎಮೋಷನ್ಸ್‌ ಇರುವ ಸಿನಿಮಾ. ಈ ಸಿನಿಮಾವನ್ನು ಪ್ರತಿಯೊಬ್ಬ ಕನ್ನಡಿಗನೂ ಕನೆಕ್ಟ್ ಮಾಡಿಕೊಳ್ಳುತ್ತಾನೆ.

-ಭಾವನಾ ಮೆನನ್‌, ನಟಿ