ವೈರಲ್‌ ಆಗ್ತಿದೆ ಬ್ಲೂವೇಲ್‌ ಕನ್ನಡ ಕಿರುಚಿತ್ರ!

ಬ್ಲೂವೇಲ್‌ ಚಾಲೆಂಜ್‌ ಎಂಬ ಆನ್‌ಲೈನ್‌ ಗೇಮ್‌ಗೆ ಸಾಕಷ್ಟು ಮುಗ್ಧ ಜೀವಗಳು ಬಲಿಯಾಗುತ್ತಿವೆ. ಇದನ್ನೇ ತಮ್ಮ ಕಥಾವಸ್ತುವನಾಗಿಟ್ಟುಕೊಂಡು 8 ಜನರ ತಂಡವೊಂದು ಕಿರುಚಿತ್ರ ನಿರ್ಮಿಸಿದೆ.

8 ನಿಮಿಷದ ಈ ಕಿರುಚಿತ್ರಕ್ಕೆ 'ಬ್ಲೂವೇಲ್‌'ಎಂದೇ ಹೆಸರಿಟ್ಟಿದ್ದಾರೆ. ಮ್ಯಾಡ್‌ ಫಾರ್‌ ಮೂವೀಸ್‌ ಬ್ಯಾನರ್‌ ಅಡಿಯಲ್ಲಿ ಈ ಕಿರುಚಿತ್ರ ನಿರ್ಮಾಣವಾಗಿದ್ದು, ಪಮ್ಮು ಕೂರ್ಗ್‌, ಸುದೀಪ್‌ ಮತ್ತು ವಿಶ್ವಾ ಹೆಗಡೆ ನಿರ್ದೇಶಿಸಿದ್ದಾರೆ. ಇನ್ನು ಈ ಕಿರುಚಿತ್ರಕ್ಕೆ ಕಥೆ ಹೆಣೆದು ಚಿತ್ರಕಥೆ ಬರೆದಿರುವುದು ನಿಖಿಲ್‌ ಸ್ವಾಮಿ.

ಈಗಾಗಲೇ ಬ್ಲೂವೇಲ್‌ ಕುರಿತಾದ ಕಿರುಚಿತ್ರಗಳು ಇತರ ಭಾಷೆಗಳಲ್ಲಿ ನಿರ್ಮಾಣಗೊಂಡಿವೆ. ಆದರೆ ಕನ್ನಡದಲ್ಲಿ ಇಂತಹ ಪ್ರಯತ್ನ ಇದೇ ಮೊದಲು. ಬ್ಲೂವೇಲ್‌ ಚಾಲೆಂಜ್‌ ಆಡುವ ಹುಡುಗನೊಬ್ಬನ ಮಾನಸಿಕ ಸ್ಥಿತಿ ಯಾವ ರೀತಿಯಾಗಿರುತ್ತದೆ ಮತ್ತು ಅದರಿಂದ ಹೊರಬರಲು ಅನುಸರಿಸಬೇಕಾದ ಮಾರ್ಗಗಳ ಬಗ್ಗೆ ಈ ಕಿರುಚಿತ್ರ ತಿಳಿಸುತ್ತದೆ.



ಶೂನ್ಯ ವೆಚ್ಚದಲ್ಲಿ ನಿರ್ಮಾಣವಾಗಿರುವ ಈ ಕಿರುಚಿತ್ರದಲ್ಲಿ ಎಲ್ಲರೂ ಹೊಸಬರೇ ಅಭಿನಯಿಸಿದ್ದಾರೆ. ಸದ್ಯಕ್ಕೆ ವೈರಲ್‌ ಆಗುತ್ತಿರುವ ಈ ಕಿರುಚಿತ್ರವನ್ನು ನೀವೊಮ್ಮೆ ನೋಡಿ.