ಗೆಸ್ಟ್ ಹೌಸ್‍ಗೆ ಬಾ ಎಂದು ಕರೆಯುತ್ತಿದ್ದರು: ನಟಿ ಆಮನಿ

ತನ್ನ ಕರಿಯರ್‌ನಲ್ಲೂ ಕಾಸ್ಟಿಂಗ್ ಕೌಚ್ ಅನುಭವ ಎದುರಾಗಿದೆ ಎಂದಿದ್ದಾರೆ ಕನ್ನಡದ 'ಅಪ್ಪಾಜಿ' ಚಿತ್ರದಲ್ಲಿ ಅಭಿನಯಿಸಿರುವ ನಟಿ ಆಮನಿ. ಹೆಚ್ಚಾಗಿ ತೆಲುಗು, ತಮಿಳು ಚಿತ್ರಗಳಲ್ಲಿ ಆಮನಿ ಅಭಿನಯಿಸಿದ್ದು ತಮ್ಮ ಕರಿಯರ್‌ಯಲ್ಲಿ ಎದುರಾದ ಕೆಟ್ಟ ಅನುಭವಗಳ ಬಗ್ಗೆ ಮೌನ ಮುರಿದಿದ್ದಾರೆ.

ಒಂದು ಹಂತದಲ್ಲಿ ಹೀರೋಯಿನ್ ಆಗಿ ಬೆಳ್ಳಿಪರದೆ ಮೇಲೆ ಬೆಳಗಿದ ಆಮನಿ ಸದ್ಯಕ್ಕೆ ಪೋಷಕ ಪಾತ್ರಗಳಿಗೆ ಸೀಮಿತವಾಗಿದ್ದಾರೆ. ತಾಯಿ, ಅತ್ತೆ ಪಾತ್ರಗಳಲ್ಲಿ ಬಿಝಿಯಾಗಿದ್ದಾರೆ. ಮದುವೆ ಬಳಿಕ ಬಣ್ಣದ ಜಗತ್ತಿನಿಂದ ಸ್ವಲ್ಪ ದೂರ ಸರಿದಿದ್ದ ಅವರು ಈಗ ಮತ್ತೆ ಟ್ರ್ಯಾಕ್‍ಗೆ ಮರಳಿದ್ದಾರೆ. ಇತ್ತೀಚೆಗೆ ಖಾಸಗಿ ಟಿವಿ ವಾಹಿನಿಯೊಂದಕ್ಕೆ ನೀಡಿರುವ ಸಂದರ್ಶನದಲ್ಲಿ ತನ್ನ ಅನುಭವಗಳನ್ನು ಹಂಚಿಕೊಂಡಿದ್ದಾರೆ.

ಕಾಸ್ಟಿಂಗ್ ಕೌಚ್‌ಗೆ ಸಂಬಂಧಿಸಿದಂತೆ ಇಷ್ಟೆಲ್ಲಾ ಚರ್ಚೆ, ಸುದ್ದಿ ಆಗ ಇರಲಿಲ್ಲ. ಆದರೆ ತನಗೂ ಆ ರೀತಿಯ ಸಮಸ್ಯೆ ಎದುರಾಗಿತ್ತು ಎಂದಿದ್ದಾರೆ. ಸಿನಿಮಾ ಮಾಡುವ ಆಸಕ್ತಿ ಇದೆ ಎಂದು ಕೆಲವರು ತಮ್ಮನ್ನು ಸಂಪರ್ಕಿಸುತ್ತಿದ್ದರು. ಎಲ್ಲವೂ ಓಕೆ ಎಂದು ಹೇಳಿದ ಬಳಿಕ ಗೆಸ್ಟ್ ಹೌಸ್‌ಗೆ ಬಂದುಬಿಡು ಎನ್ನುತ್ತಿದ್ದರು. 'ಗೆಸ್ಟ್ ಹೌಸ್' ಎಂದರೇನೇ ಅನುಮಾನ ಉಂಟಾಗುತ್ತಿತ್ತು. ಅದರಲ್ಲೂ 'ನಿಮ್ಮ ತಾಯಿಯನ್ನು ಜತೆಗೆ ಕರೆದುಕೊಂಡು ಬರಬೇಡ' ಎಂದು ಹೇಳುತ್ತಿದ್ದರು. ಆಗ ಇವರ ಒಟ್ಟಾರೆ ವ್ಯವಹಾರ ಅರ್ಥವಾಗುತ್ತಿತ್ತು ಎಂದಿದ್ದಾರೆ ಆಮನಿ.

ಹಾಗಾಗಿ ಅಂತಹವರಿಂದ ದೂರ ಸರಿಯುತ್ತಿದ್ದೆ. ಆದರೆ ದೊಡ್ಡ ನಿರ್ಮಾಣ ಸಂಸ್ಥೆಗಳಲ್ಲಿ ಆ ರೀತಿಯ ವ್ಯವಹಾರಗಳು ಇರುತ್ತಿರಲಿಲ್ಲ, ಸಣ್ಣಪುಟ್ಟ ನಿರ್ಮಾಣ ಸಂಸ್ಥೆಗಳಿಂದ ಮಾತ್ರ ಇಂತಹ 'ಆಹ್ವಾನ'ಗಳು ಬರುತ್ತಿದ್ದವು ಎಂದು ಕಾಸ್ಟಿಂಗ್ ಕೌಚ್ ಬಗ್ಗೆ ಆಮನಿ ಹೇಳಿದ್ದಾರೆ.