Abhishek Amar Teaser: ಸ್ಯಾಂಡಲ್‌ವುಡ್ ಅಂಗಳಕ್ಕೆ ಅಭಿಷೇಕ್ 'ಅಮರ್' ಟೀಸರ್

ಇಂದು , 14 ಫೆಬ್ರವರಿ 2019ರಂದು ಕನ್ನಡದ ರೆಬಲ್ ಸ್ಟಾರ್ ಅಂಬರೀಷ್ ಅವರ ಪುತ್ರ ಅಭಿಷೇಕ್ ನಾಯಕತ್ವದ 'ಅಮರ್' ಚಿತ್ರದ ಟೀಸರ್ ಬಿಡುಗಡೆಯಾಯಿತು. ಸುಮಲತಾ ಅಂಬರೀಷ್ ಅವರು ಈ ವೇಳೆ ತಮ್ಮ ಪತಿ ಅಂಬರೀಷ್ ಅವರನ್ನು ನೆನೆದು ಭಾವುಕರಾದರು. ಸಾಮಾಜಿಕ ಜಾಲತಾಣಗಳಲ್ಲಿ ಹಾಗೂ ಸ್ಯಾಂಡಲ್‌ವುಡ್ ತಾರಾಬಳಗದಿಂದ ತಮ್ಮ ಪುತ್ರ ಅಭಿಷೇಕ್ ಅವರಿಗೆ ಬಂದ ಆತ್ಮೀಯ ಶುಭಾಶಯಗಳು ಹಾಗೂ ಆಶೀರ್ವಾದಗಳಿಗೆ ಸುಮಲತಾ ಅವರು ಧನ್ಯವಾದಗಳನ್ನು ಅರ್ಪಿಸಿದರು.

ಅಂಬರೀಷ್ ಮಗ ಅಭಿಷೇಕ್ ಅವರ ಮೊದಲ ಚಿತ್ರ 'ಅಮರ್'. ಈ ಚಿತ್ರದ ಬಗ್ಗೆ ಸ್ವತಃ ಅಂಬರೀಷ್ ಅವರಿಗೆ ತುಂಬಾ ನಿರೀಕ್ಷೆ ಇತ್ತೆಂಬುದು ಬಹಳಷ್ಟು ಸಾರಿ ರಿವೀಲ್ ಆಗಿದೆ. ಅಂಬರೀಷ್ ಅವರು ಶೂಟಿಂಗ್ ಹಂತದಲ್ಲಿದ್ದಾಗಲೇ 'ಅಮರ್' ಚಿತ್ರದ 'ವಿಸ್ಯುವಲ್ಸ್' ತರಿಸಿ ನೋಡಿ ಖುಷಿ ಪಟ್ಟಿದ್ದರು ಎಂಬುದು ಈಗ ಗುಟ್ಟಾಗಿರೋ ಸಂಗತಿಯೇನಲ್ಲ. ಇಂದು ಬಿಡುಗಡೆಯಾಗಿರುವ ಅಮರ್ ಚಿತ್ರದ ಟೀಸರ್‌ ವೇಳೆ ರೆಬಲ್ ಸ್ಟಾರ್ ಅಂಬರೀಷ್ ಅವರು ನಮ್ಮೊಂದಿಗೆ ಇಲ್ಲ. ಆದರೆ ಅವರ ಆಶೀರ್ವಾದಗಳೊಂದಿಗೆ ಟೀಸರ್ ಬಿಡುಗಡೆ ನೆರವೇರಿದೆ.

ಒಟ್ಟಿನಲ್ಲಿ, ಸ್ಯಾಂಡಲ್‌ವುಡ್ ರೆಬಲ್ ಸ್ಟಾರ್ ಅಂಬರೀಷ್ ಮಗ ಅಭಿಷೇಕ್ 'ಅಮರ್ ಚಿತ್ರದ ಮೂಲಕ ಕನ್ನಡ ಚಿತ್ರರಂಗ ಪ್ರವೇಶಿಸಿ ಆಗಿದೆ. 'ಟೀಸರ್' ಬಿಡುಗಡೆ ಕೂಡ ಸಂಭ್ರಮದಿಂದ ನಡೆದಿದೆ. ಕನ್ನಡ ಸಿನಿ ಪ್ರೇಕ್ಷಕರು ಅಭಿಷೇಕ್ ನಾಯಕತ್ವದ 'ಅಮರ್' ಚಿತ್ರಕ್ಕೆ ಯಾವ ರೀತಿಯಲ್ಲಿ ಪ್ರತಿಕ್ರಿಯೆ ಕೊಡುತ್ತಾರೆ ಎಂಬುದು ಮುಂದಿನ ದಿನಗಳಲ್ಲಿ ತಿಳಿಯಲಿದೆ. ರಾಕಿಂಗ್ ಸ್ಟಾರ್ ಯಶ್, ಕಿಚ್ಚ ಸುದೀಪ್, ದರ್ಶನ್ ತೂಗುದೀಪ ಹೀಗೆ ಬಹಳಷ್ಟು ಜನ ಚಿತ್ರರಂಗದ ತಾರೆಗಳು ಅಭಿಷೇಕ್ ಅವರಿಗೆ ವಿಶ್ ಮಾಡಿ ಹರಸಿ ಹಾರೈಸಿದ್ದಾರೆ.