ಬೆಂಗಳೂರು ಡಿಸಿ ಆದ ಗುಳಿಕೆನ್ನೆ ಚೆಲುವ ದಿಗಂತ್‌!

ಗುಳಿಕೆನ್ನೆ ಚೆಲುವ ದಿಗಂತ್‌ ಈಗ ಬೆಂಗಳೂರಿನ ಜಿಲ್ಲಾಧಿಕಾರಿಯಾಗಿ ಆಯ್ಕೆಯಾಗಿದ್ದಾರೆ. ಪುನೀತ್‌ ರಾಜ್‌ಕುಮಾರ್‌ ಮುಖ್ಯಭೂಮಿಕೆಯ 'ಯುವರತ್ನ' ಸಿನಿಮಾದಲ್ಲಿ ಇವರು ಡಿಸಿ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಇದೊಂದು ಅತಿಥಿ ಪಾತ್ರವಾಗಿದ್ದು, ಕಥೆಗೆ ತಿರುವು ನೀಡುವಂಥ ದೃಶ್ಯಗಳಲ್ಲಿ ದಿಗಂತ್‌ ಕಾಣಿಸಿಕೊಳ್ಳುವುದು ವಿಶೇಷ.

ಡಿಸಿ ಮುಂದೆ ಹಲವು ಸವಾಲುಗಳಿದ್ದು ಅವುಗಳನ್ನು ಅವರು ಹೇಗೆಲ್ಲ ನಿಭಾಯಿಸುತ್ತಾರೆ ಎನ್ನುವುದು ದಿಗಂತ್‌ ಮಾಡುವ ಪಾತ್ರದ ಹಿನ್ನೆಲೆಯಂತೆ. ಸಂತೋಷ್‌ ಆನಂದ್‌ರಾಮ್‌ ಮತ್ತು ಪುನೀತ್‌ ರಾಜ್‌ಕುಮಾರ್‌ ಕಾಂಬಿನೇಶನ್‌ನ ಎರಡನೇ ಸಿನಿಮಾ ಇದಾಗಿದ್ದು, ಸಿನಿಮಾದ ತಾರಾ ಬಳಗ ದಿನೇ ದಿನೇ ದೊಡ್ಡದಾಗುತ್ತಿದೆ.

'ದಿಗಂತ್‌ ನಮ್ಮ ಸಿನಿಮಾದಲ್ಲಿ ಬೆಂಗಳೂರಿನ ಜಿಲ್ಲಾಧಿಕಾರಿ. ಪುನೀತ್‌ ಅವರ ಸ್ನೇಹಿತರೂ ಕೂಡ. ತೆರೆಯ ಮೇಲೆ ದಿಗಂತ್‌ ಕನಿಷ್ಠ 45 ನಿಮಿಷಗಳ ಕಾಲ ಕಾಣಿಸಿಕೊಳ್ಳುತ್ತಾರೆ. ಪುನೀತ್‌ ಮತ್ತು ದಿಗಂತ್‌ ಕಾಂಬಿನೇಷÜನ್‌ ತುಂಬಾ ಚೆನ್ನಾಗಿದೆ'ಎನ್ನುತ್ತಾರೆ ನಿರ್ದೇಶಕರು.

'ಈಗಾಗಲೇ 45ದಿನಗಳ ಕಾಲದ ಚಿತ್ರೀಕರಣ ನಡೆದಿದೆ. ಜುಲೈ 28ರಿಂದ ಮುಂದಿನ ಹಂತದ ಶೂಟಿಂಗ್‌ಗೆ ಪ್ಲ್ಯಾನ್‌ ಮಾಡಲಾಗುತ್ತಿದೆ. ಈ ಬಾರಿಯ ಚಿತ್ರೀಕರಣದಲ್ಲಿ ಪ್ರಕಾಶ್‌ ರಾಜ್‌, ಸೋನುಗೌಡ, ಧನಂಜಯ ಸೇರಿದಂತೆ ಹಲವು ಕಲಾವಿದರು ಸೇರಿಕೊಳ್ಳಲಿದ್ದಾರೆ. ಇಲ್ಲಿಯವರೆಗೂ ಶೂಟ್‌ ಆಗಿರುವ ದೃಶ್ಯಗಳು ಸುಂದರವಾಗಿ ಮೂಡಿ ಬಂದಿವೆ. ಖಂಡಿತಾ ಪ್ರೇಕ್ಷಕರು ಖುಷಿ ಪಡಲಿದ್ದಾರೆ'ಎಂದರು ಸಂತೋಷ್‌.