ಡಬ್ಬಿಂಗ್‌ಗೂ ತಮಗೂ ಸಂಬಂಧ ಇಲ್ಲವೆಂದ ಜಗ್ಗೇಶ್‌

ತಮಗೂ ಡಬ್ಬಿಂಗ್‌ ವಿವಾದಕ್ಕೂ ಯಾವುದೇ ಸಂಬಂಧವಿಲ್ಲ ಎಂದು ಹಿರಿಯ ನಟ ಜಗ್ಗೇಶ್‌ ಸ್ಪಷ್ಟಪಡಿಸಿದ್ದಾರೆ.

ಈ ಬಗ್ಗೆ ಟ್ವೀಟ್‌ ಮಾಡಿರುವ ಅವರು, ಕನ್ನಡಿಗರು ತಮಗೆ ಯಾವುದು ಬೇಕೋ ಅದನ್ನು ನೋಡಲು ಅಥವಾ ಪಡೆಯಲು ಸ್ವತಂತ್ರರು. ಇನ್ನು ಮುಂದೆ ನಾನಾಯಿತು, ನನ್ನ ನಟನೆಯಾಯಿತು. ನನ್ನ ನಡತೆಯಿಂದ ಯಾರಿಗಾದರೂ ನೋವಾಗಿದ್ದರೆ ಕ್ಷಮೆ ಕೇಳುತ್ತೇನೆ ಎಂಬುದಾಗಿ ಅವರು ಬರೆದುಕೊಂಡಿದ್ದಾರೆ.

36 ವರ್ಷ ಕನ್ನಡ ಚಿತ್ರರಂಗದಲ್ಲಿ ದುಡಿದ ನಾನು ಚಿತ್ರರಂಗದ ಸಮಸ್ಯೆಗೆ ಸ್ಪಂದಿಸುವುದು ಕರ್ತವ್ಯ. ಉದ್ಯಮ ಕರೆದಿದ್ದ ಡಬ್ಬಿಂಗ್‌ ವಿರುದ್ಧದ ಸಭೆಗೆ ನಾನು ಹೋಗಿದ್ದು ನಿಜ. ಆದರೆ ಅದಷ್ಟು ಮಾಡಿದ್ದು ನಮ್ಮ ಕಲಾವಿದರು, ತಂತ್ರಜ್ಞರಿಗಾಗಿ ಮಾತ್ರವೇ ಹೊರತು ನನ್ನ ವೈಯಕ್ತಿಕ ಹಿತಾಸಕ್ತಿಗಾಗಿ ಅಲ್ಲ. ಸಂವಿಧಾನವೇ ಸರಿ ಎಂದ ಮೇಲೆ ನಮ್ಮದೇನೂ ಇಲ್ಲ. ಕನ್ನಡಿಗರಿಗೆ ಏನು ಇಷ್ಟವೋ ಅದನ್ನು ನೋಡಲು ಪಡೆಯಲು ಸ್ವತಂತ್ರರು ಎಂದು ಜಗ್ಗೇಶ್‌ ಟ್ವಿಟ್ಟರ್‌ನಲ್ಲಿ ತಿಳಿಸಿದ್ದಾರೆ.