ಚೆನ್ನೈನಲ್ಲಿ ಬೆಂಗಳೂರು ಮೂಲದ ನಟನ ಮೇಲೆ ತಮಿಳು ನಟ ಹಲ್ಲೆ

[This story originally published in Times of India on Mar 12, 2019]

ಬೆಂಗಳೂರು ಮೂಲಕ ತೆಲುಗು ಚಿತ್ರಗಳಲ್ಲಿ ನಟಿಸಿರುವ ನಟ ಅಭಿಷೇಕ್ ವರ್ಮಾ ಮೇಲೆ ತಮಿಳು ನಟ ವೆಮಲ್ ಹಲ್ಲೆ ಮಾಡಿರುವ ಘಟನೆ ಚೆನ್ನೈನ ವಿರುಗಂಬಾಕಂನಲ್ಲಿ ಸೋಮವಾರ ನಡೆದಿದೆ. ಈ ಸಂಬಂಧ ವೆಮಲ್ ವಿರುದ್ಧ ಪೊಲೀಸರು ಪ್ರಕರಣ ದಾಖಲಾಗಿದೆ.

ಮಾರ್ಚ್ 9ರಂದು ವೆಮಲ್ ಮತ್ತು ಆತನ ಮೂರು ಮಂದಿ ಗೆಳೆಯರು ಸರ್ವೀಸ್ ಅಪಾರ್ಟ್‌ಮೆಂಟ್‌ಗೆ ತೆರಳಿದ್ದರು. ಇದೇ ಅಪಾರ್ಟ್‌ಮೆಂಟ್‌ನಲ್ಲಿ ನಟ ಅಭಿಷೇಕ್ ವರ್ಮಾ ಸಹ ಇದ್ದರು. "ಶನಿವಾರ ಇಬ್ಬರೂ ನಟರು ತಮ್ಮ ತಮ್ಮ ಗೆಳೆಯರ ಜತೆಗೆ ಕುಡಿದಿದ್ದಾರೆ. ಆಗ ಕ್ಷುಲ್ಲಕ ಕಾರಣಕ್ಕೆ ವೆಮಲ್ ಹಲ್ಲೆ ಮಾಡಿದ್ದಾನೆ".

ಈ ಘಟನೆ ಬಗ್ಗೆ ಪೊಲೀಸರು ನೀಡಿರುವ ಮಾಹಿತಿ ಈ ರೀತಿ ಇದೆ, "ಬೆಂಗಳೂರು ಮೂಲದ 33 ವರ್ಷದ ಅಭಿಷೇಕ್ ವರ್ಮಾ ಒಂದು ತಿಂಗಳ ಹಿಂದೆ ಅವನ್ ಅದು ಅವಳ್ ಚಿತ್ರೀಕರಣಕ್ಕಾಗಿ ನಗರಕ್ಕೆ ಆಗಮಿಸಿದ್ದರು. ವಿರುಗಂಬಕ್ಕಂನ ಬಾಸ್ಕರ್ ಕಾಲೋನಿಯ ಸರ್ವೀಸ್ ಅಪಾರ್ಟ್‍ಮೆಂಟ್‌ನಲ್ಲಿ ಉಳಿದುಕೊಂಡಿದ್ದರು. ಮಧ್ಯರಾತ್ರಿ ಬಳಿಕ 1.30ರ ಸುಮಾರಿಗೆ ಅದೇ ಅಪಾರ್ಟ್‌ಮೆಂಟ್‌ಗೆ ಗೆಳೆಯರ ಜತೆಗೆ ಬಂದ ವೆಮಲ್ ರೂಮಿನ ಬಗ್ಗೆ ವಿಚಾರಿಸಿದ್ದಾರೆ. ಆಗ ವರಾಂಡಲ್ಲಿ ಕುಳಿತು ಫೋನ್‌ನಲ್ಲಿ ಮಾತನಾಡುತ್ತಿದ್ದ ಅಭಿಷೇಕ್ ಪ್ರತಿಕ್ರಿಯಿಸಿಲ್ಲ. ಫೋನ್‌ನಲ್ಲಿ ಮಾತನಾಡುತ್ತಿದ್ದೇನೆ, ಸ್ವಲ್ಪ ಇರು ಎಂಬಂತೆ ಸೂಚಿಸಿದ್ದಾರೆ ಅಭಿಷೇಕ್" ಎಂದಿದ್ದಾರೆ ಚೆನ್ನೈ ಪೊಲೀಸರು.

ಅಭಿಷೇಕ್ ವರ್ತನೆಗೆ ಕುಪಿತಗೊಂಡ ವೆಮಲ್ ಮರ್ಯಾದೆ ಕೊಡುವಂತೆ ಹೇಳಿದ್ದಾರೆ. ಆದರೆ ವೆಮಲ್ ಮಾತನ್ನು ಫೋನ್ ಸಂಭಾಷಣೆಯಲ್ಲಿದ್ದ ಅಭಿಷೇಕ್ ಅಷ್ಟಾಗಿ ಗಂಭೀರವಾಗಿ ಪರಿಗಣಿಸಿಲ್ಲ. ಕುಡಿದ ಅಮಲಿನಲ್ಲಿದ್ದ ವೆಮಲ್ ಕುಪಿತಗೊಂಡು ಅಭಿಷೇಕ್ ಫೋನ್ ಕಸಿದುಕೊಂಡು ಹಲ್ಲೆ ನಡೆಸಿದ್ದಾನೆ. ಇದಕ್ಕೆ ಅವನ ಮೂವರು ಗೆಳೆಯರು ಸಾಥ್ ನೀಡಿದ್ದಾರೆ. ಈ ಘಟನೆಯಲ್ಲಿ ಅಭಿಷೇಕ್ ಗಾಯಗೊಂಡಿದ್ದಾರೆ.

ಹೋಟೆಲ್ ಸಿಬ್ಬಂದಿ ಕೂಡಲೆ ಆಗಮಿಸಿ ಈ ಜಗಳವನ್ನು ನಿಲ್ಲಿಸಿದ್ದಾರೆ. ಹಲ್ಲೆಯಿಂದಾಗಿ ಕಣ್ಣು ಮತ್ತು ಮುಖಕ್ಕೆ ಗಾಯವಾಗಿದ್ದ ಅಭಿಷೇಕ್‍ರನ್ನು ಖಾಸಗಿ ಆಸ್ಪತ್ರೆಗೆ ಕರೆದೊಯ್ಯಲಾಗಿದೆ. ಬಳಿಕ ವಿರುಗಂಬಕ್ಕಂ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ.

ಅಪಾರ್ಟ್‌ಮೆಂಟ್‌ನ ಸಿಸಿಟಿವಿ ಪರಿಶೀಲಿಸಿರುವ ಪೊಲೀಸರು ವೆಮಲ್ ವಿರುದ್ದ ಐಪಿಸಿ ಸೆಕ್ಷನ್ 323ರ ಪ್ರಕಾರ (ಸ್ವಯಂಪ್ರೇರಿತವಾಗಿ ಹಲ್ಲೆ ನಡೆಸಿರುವುದು) ಮತ್ತು ಸೆಕ್ಷನ್ 294 (b) (ಅವಾಚ್ಯ ಪದ ಬಳಕೆ) ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಹಲ್ಲೆ ಬಳಿಕ ವೆಮಲ್ ಪರಾರಿಯಾಗಲು ಯತ್ನಿಸಿದ್ದು ವಿಶೇಷ ತಂಡ ಅವರನ್ನು ಬಂಧಿಸುವಲ್ಲಿ ಯಶಸ್ವಿಯಾಗಿದೆ ಎಂದು ತನಿಖಾಧಿಕಾರಿ ತಿಳಿಸಿದ್ದಾರೆ.

ವೆಮಲ್ ಕಾಲಿವುಡ್‌ನ ಜನಪ್ರಿಯ ನಟ. ಪಸಂಗ, ಕಲಾವಾಣಿ, ವಾಗೈ ಸೋಡಾ ವಾ ಮತ್ತು ಕಲಾಲಪ್ಪು ಎಂಬ ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ಕೆಲವೊಂದು ಲೋ ಬಜೆಟ್ ಸಿನಿಮಾಗಳು ಹಾಗೂ ಸಣ್ಣಪುಟ್ಟ ಪಾತ್ರಗಳ ಮೂಲಕ ಚಿತ್ರರಂಗಕ್ಕೆ ಅಡಿಯಿಟ್ಟವರು ವೆಮಲ್.