ಯೋಗರಾಜ್ ಭಟ್ 'ಗಾಳಿಪಟ 2' ಹಾರಿಸಲು ಸಜ್ಜಾದ ಅದಿತಿ ಪ್ರಭುದೇವ

ಮುಂಗಾರು ಮಳೆ ಖ್ಯಾತಿಯ ನಿರ್ದೇಶಕ ಯೋಗರಾಜ್ ಭಟ್ ಅವರು ಮತ್ತೆ 'ಗಾಳಿಪಟ' ಹಾರಿಸಲು ಸಜ್ಜಾಗಿರುವುದು ಗೊತ್ತೇ ಇದೆ. 'ಗಾಳಿಪಟ 2' ಚಿತ್ರವನ್ನು ಕೈಗೆತ್ತಿಕೊಂಡಿರುವ ಯೋಗರಾಜ್ ಭಟ್ಟರು ಮೂವರು ನಾಯಕರು ಮತ್ತು ಮೂವರು ನಾಯಕಿಯರನ್ನಿಟ್ಟುಕೊಂಡು ಹೊಸ ಚಿತ್ರಕ್ಕೆ ಸಜ್ಜಾಗಿದ್ದಾರೆ. ಇಷ್ಟರವರೆಗೆ ಮೂವರು ನಾಯಕರು ಹಾಗೂ ಎರಡು ನಾಯಕಿಯರು ಫೈನಲ್ ಆಗಿದ್ದರು. ಇದೀಗ 3ನೇ ನಾಯಕಿ ಸಹ ಫೈನಲ್ ಆಗಿದ್ದಾರೆ. ಅವರು ಅದಿತಿ ಪ್ರಭುದೇವ.

ಹೌದು, ಯೋಗರಾಜ್ ಭಟ್ ಅವರ ಮುಂಬರುವ 'ಗಾಳಿಪಟ 2' ಚಿತ್ರಕ್ಕೆ ನಾಯಕರಾಗಿ ಪವನ್ ಕುಮಾರ್, ರಿಷಿ ಮತ್ತು ಶರಣ್ ಆಯ್ಕೆಯಾಗಿದ್ದಾರೆ. ನಾಯಕಿಯರಾಗಿ ಶರ್ಮಿಳಾ ಮಾಂಡ್ರೆ, ಸೋನಾಲ್ ಮೊಂಥೆರೋ ಮತ್ತು ಅದಿತಿ ಪ್ರಭುದೇವ ಆಯ್ಕೆಯಾಗಿದ್ದಾರೆ. ಆದರೆ ಯಾರಿಗೆ ಯಾರು ಜೋಡಿ ಎಂಬುದು ಸದ್ಯಕ್ಕೆ ಸಸ್ಪೆನ್ಸ್. ಈ ವರ್ಷ ಬಿಡುಗಡೆ ಕಂಡಿದ್ದ 'ಪಂಚತಂತ್ರ' ಸಿನಿಮಾದ ಬಳಿಕ ಯೋಗರಾಜ್ ಭಟ್ಟರು 'ಗಾಳಿಪಟ 2' ಸಿನಿಮಾದ ಕೆಲಸದಲ್ಲಿ ತೊಡಗಿದ್ದಾರೆ.

ನಟಿ ಅದಿತಿ ಪ್ರಭುದೇವ ಸದ್ಯಕ್ಕೆ ಸಾಕಷ್ಟು ಡಿಮ್ಯಾಂಡ್ ಸಂಪಾದಿಸಿಕೊಂಡಿರಿವ ನಟಿ. ಬಹಳಷ್ಟು ಚಿತ್ರಗಳು ನಟಿ ಅದಿತಿ ಪ್ರಭುದೇವ ಕೈ ನಲ್ಲಿವೆ. 'ಬ್ರಹ್ಮಾಚಾರಿ', 'ರಂಗನಾಯಕಿ', 'ತೋತಾಪುರಿ', 'ಸಿಂಗ', 'ಕುಸ್ತಿ', 'ಆಪರೇಷನ್ ನಕ್ಷತ್ರ' ಈ ಎಲ್ಲ ಅವಕಾಶಗಳ ಜತೆಗೆ ಇದೀಗ ಗಾಳಿಪಟ 2 ಚಿತ್ರವೂ ಸೇರಿಕೊಂಡಿದೆ. ಅಂದಹಾಗೆ, ಯೋಗರಾಜ್ ಭಟ್ಟರ ಮುಂಬರುವ ಈ ಚಿತ್ರದಲ್ಲಿ ಚೈನಿಸ್ ಅಥವಾ ಕೋರಿಯನ್ ಬೆಡಗಿಯೊಬ್ಬರು ಸಹ ಕಾಣಿಸಿಕೊಳ್ಳಲಿದ್ದಾರೆ ಎನ್ನಲಾಗಿದೆ.