ಗಿಡ ನೆಡುವ ಮೂಲಕ ಬರ್ತ್‌ಡೇ ಆಚರಿಸಿಕೊಂಡ ಐಂದ್ರಿತಾ ರೇ

ನಟಿ ಐಂದ್ರಿತಾ ರೇ ಈ ಬಾರಿ ವಿಭಿನ್ನವಾಗಿ ತಮ್ಮ ಹುಟ್ಟು ಹಬ್ಬ ಆಚರಿಸಿಕೊಂಡಿದ್ದಾರೆ. ಬೆಂಗಳೂರಿನ ಕಾಲೇಜ್‌ವೊಂದರ ಕ್ಯಾಂಪಸ್‌ನಲ್ಲಿ 40 ಸಸಿಗಳನ್ನು ನೆಡುವ ಮೂಲಕ ಅವರು ಸಂಭ್ರಮಿಸಿದ್ದಾರೆ.

ಮೊದಲಿನಿಂದಲೂ ಐಂದ್ರಿತಾ ರೇ ಮತ್ತು ದಿಗಂತ್‌ ದಂಪತಿಗೆ ಪರಿಸರ ಮೇಲೆ ಕಾಳಜಿ. ಅಲ್ಲದೇ, ಪ್ರಾಣಿಗಳ ಮೇಲೆಯೂ ಪ್ರೀತಿ. ಹಾಗಾಗಿ ತಮ್ಮ ಮುದ್ದಿನ ನಾಯಿ ಮರಿಯನ್ನು ಸಾಕ್ಷಿಯಾಗಿಟ್ಟುಕೊಂಡು ಪ್ರೀತಿ ನಿವೇದನೆ ಮಾಡಿದ್ದರು ದಿಗಂತ್‌. ಅಲ್ಲದೇ, ಬೇಸಿಗೆಯಲ್ಲಿ ಪ್ರಾಣಿ ಪಕ್ಷಿಗಳಿಗೆ ನೀರು ಹಾಕಿ, ಆಹಾರ ಕೊಡಿ ಎಂಬ ಅಭಿಯಾನ ಕೂಡ ಶುರು ಮಾಡಿದ್ದರು. ಈಗ ಹುಟ್ಟು ಹಬ್ಬಕ್ಕೆ 40 ಗಿಡಗಳನ್ನು ನೆಡುವ ಮೂಲಕ ಬರ್ತ್‌ಡೇ ದಿನವನ್ನು ಅರ್ಥಪೂರ್ಣವಾಗಿಸಿದ್ದಾರೆ.

'ದಿನದಿಂದ ದಿನಕ್ಕೆ ಮರಗಳ ಸಂಖ್ಯೆ ಕಡಿಮೆ ಆಗುತ್ತಿದೆ. ನಾನಾ ಯೋಜನೆಗಳ ಹೆಸರಿನಲ್ಲೂ ಮರಗಳನ್ನು ಕತ್ತರಿಸುತ್ತಿದ್ದಾರೆ. ಹಾಗಾಗಿ ತಾಪಮಾನ ಏರುತ್ತಲೇ ಇದೆ. ಮಕ್ಕಳು, ಇಳಿವಯಸ್ಸಿನವರ ಜತೆಗೆ ಯುವಕ ಯುವತಿಯರು ಕೂಡ ಬಿಸಿಲಿಗೆ ತತ್ತರಿಸುತ್ತಿದ್ದಾರೆ. ಹಾಗಾಗಿ ಹೆಚ್ಚೆಚ್ಚು ಮರ ಗಿಡಗಳನ್ನು ಬೆಳೆಸಿ, ತಾಪಮಾನ ತಗ್ಗಿಸಲು ನೆರವಾಗಿ' ಎಂದಿದ್ದಾರೆ ಐಂದ್ರಿತಾ.