ವಿಜಯ್ ಸೇತುಪತಿ ಸಿನಿಮಾದಿಂದ ಅಮಲಾ ಪೌಲ್ ಹೊರಬಂದಿದ್ದೇಕೆ?

ಮಕ್ಕಳ್ ಸೆಲ್ವನ್ ಎಂದೇ ಖ್ಯಾತರಾಗಿರುವ ನಟ ವಿಜಯ್ ಸೇತುಪತಿ ಇನ್ನೂ ಹೆಸರಿಡದ ಚಿತ್ರವೊಂದರಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರವನ್ನು ವೆಂಕಟಕೃಷ್ಣ ರೊಗ್ನಾಥ್ ನಿರ್ದೇಶಿಸುತ್ತಿದ್ದಾರೆ. ಇವರು ಈ ಮೊದಲು ಎಸ್‌ಪಿ ಜಗನ್ನಾಥ್ ಜೊತೆ ಸಹ ನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ. ವೆಂಕಟಕೃಷ್ಣ ನಿರ್ದೇಶನದ ಮುಂಬರುವ ಚಿತ್ರವನ್ನು ಚಂದಾರ ಆರ್ಟ್ಸ್ ನ ಎಸಕ್ಕಿ ದುರೈ ನಿರ್ಮಿಸುತ್ತಿದ್ದಾರೆ.

ಸದ್ಯ 'ವಿಎಸ್ಪಿ 33' ಎಂದು ಕರೆಯಲ್ಪಡುವ ಈ ಚಿತ್ರದಲ್ಲಿ ಅಮಲಾ ಪೌಲ್ ನಾಯಕಿ ಎಂದು ಘೋಷಿಸಲಾಗಿತ್ತು. ಕಳೆದ ವಾರ ಪಳನಿಯಲ್ಲಿ ಚಿತ್ರೀಕರಣ ಸಹ ಪ್ರಾರಂಭವಾಯಿತು. ಹಾಗೆಯೇ ನಿರ್ದೇಶಕ ಮಾಗಿಜ್ ತಿರುಮೇನಿ ಅವರನ್ನು ಖಳನಾಯಕನಾಗಿ ಆಯ್ಕೆ ಮಾಡಲಾಗಿತ್ತು. ಆದರೆ ಇದೀಗ ಈ ಚಿತ್ರದಿಂದ ನಟಿ ಅಮಲಾ ಪೌಲ್ ಹೊರಬಂದಿದ್ದಾರೆ ಎನ್ನಲಾಗುತ್ತಿದೆ.

ಸೇತುಪತಿ ನಾಯಕತ್ವದ ಚಿತ್ರತಂಡ ಹೇಳುವ ಪ್ರಕಾರ, ಇದೊಂದು ಪಕ್ಕಾ ಮ್ಯೂಸಿಕಲ್ ರೊಮ್ಯಾನ್ಸ್ ಸಿನಿಮಾವಾಗಿದೆ. ಶೂಟಿಂಗ್ ಪ್ರಾರಂಭವಾದ ಬಳಿಕ ನಟಿ ಅಮಲಾ ಪೌಲ್ ಚಿತ್ರದಿಂದ ಹರಬಂದಿರುವುದು ಹಲವರ ಕುತೂಹಲ ಕೆರಳಿಸಿದೆ. ಆದರೆ, ಚಿತ್ರತಂಡ 'ಕಾರಣಾಂತರಗಳಿಂದ ಹಾಗೂ ಡೇಟ್ಸ್ ಸಮಸ್ಯೆಯಿಂದಾಗಿ ಅಮಲಾ ಈ ಚಿತ್ರದಿಂದ ಹೊರಗುಳಿದಿದ್ದಾರೆ' ಎಂದಿದೆ. ಇದೀಗ ನಟಿ ಅಮಲಾ ಸ್ಥಾನಕ್ಕೆ ನಟಿ ಮೇಘಾ ಆಕಾಶ್ ಬಂದಿದ್ದಾರೆ ಎನ್ನಲಾಗಿದೆ.

ಸೇತುಪತಿ ಚಿತ್ರತಂಡವನ್ನು ಸೇರಿಕೊಂಡಿರುವ ಮೇಘಾ ಈಗಾಗಲೇ 'ಪೆಟ್ಟಾ' ಹಾಗೂ 'ವಂದ ರಾಜವಥಾನ್ ವರುವೆನ್' ಚಿತ್ರದಲ್ಲಿ ನಟಿಸಿದ್ದಾರೆ. ಸದ್ಯದಲ್ಲೇ ಮೇಘಾ ಊಟಿಯಲ್ಲಿ ನಡೆಯುತ್ತಿರುವ ಶೂಟಿಂಗ್‌ ಸಲುವಾಗಿ ಚಿತ್ರತಂಡವನ್ನು ಸೇರಿಕೊಳ್ಳಲಿದ್ದಾರೆ. ಒಟ್ಟಿನಲ್ಲಿ, ಅಮಲಾ ಪೌಲ್ ಅಭಿಮಾನಿಗಳು ನಿರಾಸೆಗೊಂಡು ಮೇಘಾ ಅಭಿಮಾನಿಗಳು ಖುಷಿಯಾಗಿದ್ದಾರೆ ಎನ್ನಬಹುದು.