ನಟಿ ಅಮೂಲ್ಯಾ ಮದುವೆಗೆ ತಿಂಗಳ ಸಂಭ್ರಮ!

ಈ ಫೋಟೋ ನೋಡುತ್ತಿದ್ದರೆ ಪ್ರೇಮಕವಿ ಕೆ.ಎಸ್.ನರಸಿಂಹಸ್ವಾಮಿ ಅವರ 'ಮದುವೆಯಾಗಿ ತಿಂಗಳಿಲ್ಲ ನೋಡಿರಣ್ಣ ಹೇಗಿದೆ? ನಾನು ಕೂಗಿದಾಗಲೆಲ್ಲ ಬರುವಳೆನ್ನ ಶಾರದೆ...' ಕವನ ನೆನಪಾಗುತ್ತದೆ. ನಟಿ ಅಮೂಲ್ಯಾ ಮತ್ತು ಜಗದೀಶ್ ತಾರಾ ಜೋಡಿಗೂ ಅಷ್ಟೇ ಮದುವೆಯಾಗಿ ತಿಂಗಳಾಗುತ್ತಿದೆ. ಈ ಸಂಭ್ರಮವನ್ನು ಅವರು ಗಿಡ ನೆಡುವ ಮೂಲಕ ಸಿಂಪಲ್ ಆಗಿ ಸೆಲಬ್ರೇಟ್ ಮಾಡಿಕೊಂಡಿದ್ದಾರೆ.

ಸಾಮಾನ್ಯವಾಗಿ ಸೆಲೆಬ್ರಿಟಿಗಳು ಎಂದರೆ ಎಲ್ಲೋ ವಿದೇಶದಲ್ಲಿ ತಮ್ಮ ಮದುವೆ ವಾರ್ಷಿಕೋತ್ಸವ ಆಚರಿಸಿಕೊಳ್ಳುವುದು ಸಾಮಾನ್ಯ. ಆದರೆ ಅಮೂಲ್ಯಾ ಮತ್ತು ಜಗದೀಶ್ ಮಾತ್ರ ತುಂಬ ಸರಳವಾಗಿ ಗಿಡವೊಂದನ್ನು ನೆಡುವ ಮೂಲಕ ತಮ್ಮ ತಿಂಗಳ ಮದುವೆ ಸಂಭ್ರಮವನ್ನು ಆಚರಿಸಿಕೊಂಡಿದ್ದಾರೆ.

ಸ್ಯಾಂಡಲ್‍ವುಡ್‌ಗೆ ಬಾಲ ಕಲಾವಿದೆಯಾಗಿ ಅಡಿಯಿಟ್ಟ ಅಮೂಲ್ಯಾ ಎರಡು ದಶಕಗಳ ಕಾಲ ಚಿತ್ರರಂಗದಲ್ಲಿ ಗುರುತಿಸಿಕೊಂಡವರು. ಬಳಿಕ ಬಿಬಿಎಂಪಿ ಕಾರ್ಪೊರೇಟರ್ ಜಿ.ಎಚ್.ರಾಮಚಂದ್ರ ಅವರ ಪುತ್ರ ಜಗದೀಶ್ ಚಂದ್ರ ಅವರನ್ನು ವರಿಸಿದ ಬಳಿಕ ಸದ್ಯಕ್ಕೆ ಸಿನಿಮಾಗಳಿಂದ ಸ್ವಲ್ಪ ಬಿಡುವು ತೆಗೆದುಕೊಂಡಿದ್ದಾರೆ. ಅವರು ಆದಷ್ಟು ಬೇಗ ಬಣ್ಣ ಹಚ್ಚಲಿ ಎಂಬುದು ಅಮೂಲ್ಯಾ ಅಭಿಮಾನಿಗಳ ಬಯಕೆ.