ಮದುವೆ ನಂತರವೂ ಸಿನಿಮಾ ರಂಗದಲ್ಲಿ ನೇಹಾ ಬ್ಯುಸಿ

ದರ್ಶನ್‌ ನಟನೆಯ ಒಡೆಯ ಸಿನಿಮಾದಲ್ಲಿ ನೇಹಾ ಪಾಟೀಲ್‌ ನಟಿಸುತ್ತಿದ್ದಾರೆ. ಈ ಮೂಲಕ ಮದುವೆ ನಂತರವೂ ತಾವು ಸಿನಿಮಾ ರಂಗದಲ್ಲೇ ಮುಂದುವರೆಯು ಸೂಚನೆ ಕೊಟ್ಟಿದ್ದಾರೆ.

ಸಾಮಾನ್ಯವಾಗಿ ಮದುವೆ ನಂತರ ಕೆಲ ನಾಯಕಿಯರು ಚಿತ್ರರಂಗದಿಂದ ದೂರವಾದ ಉದಾಹರಣೆಗಳಿವೆ. ಆದರೆ, ಮೇಘನಾ ರಾಜ್‌, ಐಂದ್ರಿತಾ ರೇ ಸೇರಿದಂತೆ ಹಲವು ಹೀರೋಯಿನ್ಸ್‌ ಮದುವೆಯ ನಂತರವೂ ಮತ್ತೆ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ನೇಹಾ ಪಾಟೀಲ್‌ ಕೂಡ ಮೂರು ಚಿತ್ರಗಳನ್ನು ಒಪ್ಪಿಕೊಂಡಿದ್ದಾರೆ.

'ಒಡೆಯ ಸಿನಿಮಾದಲ್ಲಿ ನಾನು ಪಂಕಜ್‌ ಜೋಡಿಯಾಗಿ ನಟಿಸುತ್ತೇನೆ. ತುಂಬಾ ಚೆನ್ನಾಗಿರುವ ಪಾತ್ರ ಸಿಕ್ಕಿದೆ. ದರ್ಶನ್‌ ಅವರ ಸಿನಿಮಾದಲ್ಲಿ ಮೊದಲ ಬಾರಿಗೆ ನಟಿಸುತ್ತಿದ್ದೇನೆ. ತುಂಬಾ ಖುಷಿ ಆಗುತ್ತಿದೆ. ಅಲ್ಲದೇ, ನ್ಯೂರಾನ್‌ ಎನ್ನುವ ಮತ್ತೊಂದು ಚಿತ್ರದಲ್ಲೂ ನಟಿಸಿದ್ದೇನೆ. ಮತ್ತೊಂದು ಚಿತ್ರಕ್ಕೆ ಸಹಿ ಮಾಡಿದ್ದೇನೆ' ಎನ್ನುತ್ತಾರೆ ನೇಹಾ.

ಕೇವಲ ಸಿನಿಮಾ ರಂಗದಲ್ಲಿ ಮಾತ್ರವಲ್ಲ, ಕಿರುತೆರೆಯಿಂದಲೂ ಕರೆಗಳು ಬರುತ್ತಿವೆಯಂತೆ. ಜನುಮದ ಜೋಡಿ ಧಾರಾವಾಹಿಯ ಮೂಲಕ ಟಿವಿ ಜಗತ್ತಿನಲ್ಲೂ ಫೇಮಸ್‌ ಆದ ಇವರಿಗೆ ಮತ್ತೆ ಧಾರಾವಾಹಿಯಲ್ಲಿ ನಟಿಸುವ ಅವಕಾಶಗಳು ಸಿಗುತ್ತಿವೆಯಂತೆ.

'ಹುಲಿದುರ್ಗ ಸಿನಿಮಾದಲ್ಲಿ ನಾಯಕಿಯಾಗಿ ನಟಿಸಿದ್ದೇನೆ. ಅದೊಂದು ವಿಭಿನ್ನ ರೀತಿಯ ಚಿತ್ರ. ನನ್ನ ಪಾತ್ರ ಕೂಡ ತುಂಬಾ ಚೆನ್ನಾಗಿ ಮೂಡಿ ಬಂದಿದೆ' ಎನ್ನುತ್ತಾರೆ ನೇಹಾ.

'ಮದುವೆಯ ನಂತರವೂ ಹಲವು ಸಿನಿಮಾಗಳ ಕಥೆ ಕೇಳಿದ್ದೇನೆ. ನನಗೆ ಇಷ್ಟವಾದ ಪಾತ್ರಗಳು ಸಿಗದೇ ಇರುವ ಕಾರಣಕ್ಕಾಗಿ ಬಿಟ್ಟಿದ್ದೇನೆ. ಒಳ್ಳೊಳ್ಳೆ ಪಾತ್ರಗಳು ಸಿಕ್ಕರೆ, ಯಾವುದೇ ಕಾರಣಕ್ಕೂ ಬಿಡಲಾರೆ' ಎನ್ನುವುದು ನೇಹಾ ಮಾತು.

ಒಡೆಯ ಸಿನಿಮಾದ ಬಗ್ಗೆ ತುಂಬಾ ನಿರೀಕ್ಷೆ ಇಟ್ಟುಕೊಂಡಿರುವ ಇವರು, ಈ ಸಿನಿಮಾ ರಿಲೀಸ್‌ ಆದ ಮೇಲೆ ಮತ್ತಷ್ಟು ಅವಕಾಶಗಳು ಸಿಗಲಿವೆ ಎನ್ನುವ ನಂಬಿಕೆ ಇವರದ್ದು.

ಸಿನಿಮಾ ರಂಗದಿಂದ ಮಾತ್ರವಲ್ಲ, ಕಿರುತೆರೆಯಿಂದಲೂ ಆಫರ್ಸ್‌ ಬರುತ್ತಿವೆ. ಒಳ್ಳೆಯ ಪಾತ್ರಗಳು ಸಿಗುತ್ತಿರುವುದರಿಂದ ಖುಷಿ ಆಗುತ್ತಿದೆ.

- ನೇಹಾ ಪಾಟೀಲ್‌, ನಟಿ