ಐಟಂ ಸಾಂಗ್‌ ಮಾಡೋದು ಅಂದ್ರೆ ತುಂಬಾ ಇಷ್ಟ: ರಾಯ್‌ ಲಕ್ಷ್ಮಿ

ಐಟಂ ಸಾಂಗ್‌ಗಳು ಅಥವಾ ಸ್ಪೆಷಲ್‌ ಸಾಂಗ್‌ಗಳನ್ನು ಮಾಡುವುದು ಎಂದರೆ ನನಗೆ ತುಂಬಾ ಇಷ್ಟ ಎಂದು ಹೇಳಿದ್ದಾರೆ ಬಹುಭಾಷಾ ನಟಿ ರಾಯ್‌ ಲಕ್ಷ್ಮಿ. ಹೈದರಾಬಾದ್‌ನಲ್ಲಿ ತಮ್ಮ ಹೊಸ ಚಿತ್ರದ ಪ್ರಚಾರ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ಸ್ಪೆಷಲ್‌ ಸಾಂಗ್‌ ಕೆಲವೊಮ್ಮೆ ದೊಡ್ಡ ಬ್ರೇಕ್‌ ನೀಡುತ್ತವೆ. ಏಕೆಂದರೆ ಹಿರೋಯಿನ್‌ ಡಾನ್ಸ್‌ ಮಾಡುವ ಹಾಡುಗಳಿಗಿಂತ ಇಂಥ ಸಾಂಗ್‌ಗಳೇ ಹೆಚ್ಚು ಜನಪ್ರಿಯವಾಗುತ್ತವೆ. ಹೀಗಾಗಿ ನಾನು ಹೆಚ್ಚಾಗಿ ಸ್ಪೆಷಲ್‌ ಸಾಂಗ್‌ಗಳನ್ನೇ ಮಾಡಲು ಇಷ್ಟಪಡುತ್ತೇನೆಂದು ಲಕ್ಷ್ಮಿ ಹೇಳಿದ್ದಾರೆ.

ಈಗಾಗಲೇ ತೆಲುಗಿನ ಹಲವು ಚಿತ್ರಗಳಲ್ಲಿ ಇಂಥ ಹಾಡುಗಳಿಗೆ ಡಾನ್ಸ್‌ ಮಾಡಿದ್ದೇನೆ. ಅವಕಾಶ ಸಿಕ್ಕರೆ ಕನ್ನಡ, ತಮಿಳು ಮತ್ತು ಮಲೆಯಾಳಂ ಚಿತ್ರಗಳಲ್ಲೂ ನಟಿಸುತ್ತೇನೆ. ಮಾಸ್‌ ಪ್ರೇಕ್ಷಕರಿಗೆ ಈ ಹಾಡುಗಳು ಬಹುಬೇಗ ಮುಟ್ಟುತ್ತವೆ ಎಂದು ರಾಯ್‌ ಲಕ್ಷ್ಮಿ ಅಭಿಪ್ರಾಯಪಟ್ಟಿದ್ದಾರೆ.

ದಕ್ಷಿಣದ ಎಲ್ಲ ಭಾಷೆಗಳಲ್ಲೂ ನಾನು ನಟಿಸಿದ್ದೇನೆ. ಆದರೆ ಈವರೆಗೆ ಬ್ಲಾಕ್‌ಬಸ್ಟರ್‌ ಎನ್ನುವಂಥ ಯಾವುದೇ ಸಿನಿಮಾ ಸಿಕ್ಕಿಲ್ಲ. ಕನ್ನಡದಲ್ಲೂ ಒಂದು ಆ್ಯಕ್ಷನ್‌ ಸಿನಿಮಾ ಮಾಡುತ್ತಿದ್ದೇನೆ. ನಾನು ನಿರೀಕ್ಷಿಸಿರುವ ಬ್ರೇಕ್‌ ಸಿಗಬಹುದು ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

* ಝಾನ್ಸಿ ಚಿತ್ರವನ್ನು ಒಪ್ಪಿಕೊಳ್ಳಲು ಕಾರಣ?
ಇಲ್ಲಿಯವರೆಗೆ ನನಗೆ ಈ ರೀತಿಯ ಪಾತ್ರ ಸಿಕ್ಕಿರಲಿಲ್ಲ. ಹೆಚ್ಚು ಕಡಿಮೆ ಒಂದೇ ರೀತಿಯ ಪಾತ್ರಗಳಲ್ಲಿ ನಟಿಸಿ ಬೋರ್‌ ಆಗಿತ್ತು. ಇದು ಮಹಿಳಾ ಪ್ರಧಾನ ಚಿತ್ರ. ಅಲ್ಲದೆ, ಆ್ಯಕ್ಷನ್‌ ಓರಿಯೆಂಟೆಡ್‌. ನಟನೆಗೆ ಬಹಳ ಸ್ಕೋಪ್‌ ಇದ್ದ ಚಿತ್ರ. ಹಾಗಾಗಿ ಕೇಳಿದ ತಕ್ಷಣ ಒಪ್ಪಿಕೊಂಡೆ.

* ಚಿತ್ರದ ಬಗ್ಗೆ ನಿಮ್ಮ ನಿರೀಕ್ಷೆ ಹೇಗಿದೆ?
ಬಹಳ ಎಕ್ಸೈಟ್‌ಮೆಂಟ್‌ ಇದೆ. ತುಂಬಾ ನಿರೀಕ್ಷೆ ಇಟ್ಟುಕೊಂಡಿದ್ದೇನೆ. ಟಫ್‌ ಆ್ಯಕ್ಷನ್‌ ದೃಶ್ಯಗಳು ಇವೆ. ಡಬಲ್‌ ಶೇಡ್‌ ಪಾತ್ರ. ಒಬ್ಬ ನಟಿಗೆ ಇಂಥ ಪಾತ್ರ ಸಿಗುವುದು ಅಪರೂಪ.

* ಯಾವ ರೀತಿಯ ಪಾತ್ರಗಳನ್ನು ನಿರೀಕ್ಷಿಸುತ್ತೀರಾ?
ವಿಭಿನ್ನವಾದ ಪಾತ್ರಗಳು. ಚಾಲೆಂಜಿಂಗ್‌ ಅಗಿರಬೇಕು. ಪ್ರಾಮುಖ್ಯತೆ ಇರಬೇಕು. ಝಾನ್ಸಿಯಲ್ಲಿ ನಾನು ಒಬ್ಬ ಹೀರೊ ಒಂದು ಚಿತ್ರದಲ್ಲಿ ಏನೇನು ಮಾಡುತ್ತಾನೋ ಅದನ್ನೆಲ್ಲಾ ಮಾಡಿದ್ದೇನೆ. ಹಾಗಾಗಿ ಈ ಚಿತ್ರ ಬಹಳ ಸ್ಪೆಷಲ್‌ ಎನ್ನಿಸಿದೆ.