Ramya Krishna:ಕೆಜಿಎಫ್ ಚಾಪ್ಟರ್-2ಗೆ 'ಶಿವಗಾಮಿ' ರಮ್ಯಕೃಷ್ಣ ಎಂಟ್ರಿ?

ಕನ್ನಡ ಚಿತ್ರರಂಗದಲ್ಲಿ ಹೊಸ ಇತಿಹಾಸ ಸೃಷ್ಟಿಸಿ ಚಿತ್ರೋದ್ಯಮವನ್ನು ಒಂದು ಹಂತ ಮೇಲೇರಿಸಿದ ಖ್ಯಾತಿಗೆ ಒಳಗಾಗಿರುವ 'ಕೆಜಿಎಫ್' ಚಿತ್ರದ ಮುಂದಿನ ಭಾಗವಾಗಿರುವ ಕೆಜಿಎಫ್-2' ಚಿತ್ರದ 'ಪ್ರಿ-ಪ್ರೊಡಕ್ಷನ್' ಕೆಲಸ ಈಗಾಗಲೇ ಪ್ರಾರಂಭವಾಗಿದೆ. ನಿರ್ದೇಶಕ ಪ್ರಶಾಂತ್ ನೀಲ್ 'ಕೆಜಿಎಫ್-2' ಚಿತ್ರದ 'ಸ್ಕ್ರಿಪ್ಟ್' ಹಾಗೂ 'ಪ್ರಿ-ಪ್ರೊಡಕ್ಷನ್' ಕೆಲಸಗಳಲ್ಲಿ ನಿರತರಾಗಿದ್ದು ಅಂದುಕೊಂಡಂತೆ ನಡೆದರೆ ಚಿತ್ರವು ಬರುವ 'ಏಪ್ರಿಲ್ 2019'ರಲ್ಲಿ ಶೂಟಿಂಗ್ ಶುರುವಾಗಲಿದೆ. ಲೇಟೆಸ್ಟ್ ನ್ಯೂಸ್ ಪ್ರಕಾರ, ಮುಂಬರುವ 'ಕೆಜಿಎಫ್-2' ಚಿತ್ರದಲ್ಲಿ 'ಬಾಹುಬಲಿ' ಚಿತ್ರದ 'ಶಿವಗಾಮಿ' ಖ್ಯಾತಿಯ ನಟಿ ರಮ್ಯಕೃಷ್ಣ ನಟಿಸಲಿದ್ದಾರೆ.

ಬರಲಿರುವ 'ಕೆಜಿಎಫ್-2' ಚಿತ್ರದಲ್ಲಿ ನಟಿ ರಮ್ಯಕೃಷ್ಣ ಅವರು ರಾಷ್ಟ್ರಪತಿ ಪಾತ್ರವನ್ನು ನಿಭಾಯಿಸಲಿದ್ದಾರೆ ಎನ್ನಲಾಗಿದೆ. ಈಗಾಗಲೇ ಈ ಚಿತ್ರಕ್ಕೆ ಬಾಲಿವುಡ್ ನಟ ಸಂಜಯ್ ದತ್ ನಟಿಸಲಿರುವುದು ಪಕ್ಕಾ ಆಗಿದೆ. ರಮ್ಯಕೃಷ್ಣ, ಸಂಜಯ್ ದತ್, ಅನಂತ್ ನಾಗ್, ಅಚ್ಯುತ್ ಹಾಗೂ ಇನ್ನೂ ಅನೇಕ ಘಟಾನುಘಟಿಗಳು ಈ ಚಿತ್ರದಲ್ಲಿ ಕೆಲಸ ಮಾಡಲಿರುವುದು ಚಿತ್ರದ ನಿರೀಕ್ಷೆಯನ್ನೂ ಇನ್ನೂ ಹೆಚ್ಚು ಮಾಡಿದೆ. ರಾಕಿಂಗ್ ಸ್ಟಾರ್ ಯಶ್ ಹಾಗೂ ಶ್ರೀನಿಧಿ ಶೆಟ್ಟಿ ಜೋಡಿಯೇ ಈ ಚಿತ್ರಕ್ಕೂ ನಾಯಕ-ನಾಯಕಿ.

ಕೆಜಿಎಫ್ ಚಿತ್ರವು ಭಾರತವನ್ನೂ ಮೀರಿ ಕನ್ನಡ ಚಿತ್ರಗಳ ನೇಮ್, ಫೇಮ್ ಹಾಗೂ ಮಾರುಕಟ್ಟೆಯನ್ನು ಪ್ರಪಂಚದಾದ್ಯಂತ ವಿಸ್ತರಿಸಿ ಹೆಮ್ಮೆ ಮೂಡಿಸಿದ ಸಿನಿಮಾ. ಈ ಚಿತ್ರದ ಮೂಲಕ ರಾಕಿಂಗ್ ಸ್ಟಾರ್ ಯಶ್ ನ್ಯಾಷನಲ್ ಸ್ಟಾರ್ ಪಟ್ಟದಲ್ಲಿ ಮಿಂಚುತ್ತಿದ್ದಾರೆ. ನಿರ್ದೇಶಕ ಪ್ರಶಾಂತ್ ನೀಲ್ ಕೂಡ ಬಹಳಷ್ಟು ಹೆಸರು ಮಾಡಿ ಸೌತ್ ಇಂಡಿಯಾ ಮೀರಿ ಹೆಸರು ಸಂಪಾದಿಸಿದ್ದಾರೆ. ಹೀಗಾಗಿ, ಸಹಜವಾಗಿಯೇ ಯಶ್-ಪ್ರಶಾಂತ್ ನೀಲ್ ಜೋಡಿಯ 'ಕೆಜಿಎಫ್-2' ಚಿತ್ರದ ಬಗ್ಗೆ ಭಾರೀ ನಿರೀಕ್ಷೆ ಮೂಡಿದೆ. ಈಗಂತೂ ಕೆಜಿಎಫ್ ಚಿತ್ರತಂಡವೇ ಅಧಿಕೃತವಾಗಿ ಕೆಜಿಎಫ್-2' ಚಿತ್ರ ಸದ್ಯವೇ ಸೆಟ್ಟೇರಲಿದೆ ಎಂದು ಘೋಷಿಸಿದೆ.

ಈ ಎಲ್ಲ ಬೆಳವಣಿಗೆಗಳನ್ನು ಸ್ಯಾಂಡಲ್‌ವುಡ್ ಮಾತ್ರವಲ್ಲದೇ ಇಡೀ ಇಂಡಿಯಾ ಬಹಳ ಗಮನವಿಟ್ಟು ನೋಡುತ್ತಿದೆ. ಭಾರೀ ನಿರೀಕ್ಷೆ ಜತೆಜತೆಗೆಗೆ, ಮುಂಬರುವ 'ಕೆಜಿಎಫ್-2' ಚಿತ್ರದ ಬಗ್ಗೆ ತಂಡವು ಹೆಚ್ಚಿನ ಜವಾಬ್ದಾರಿ ಕೂಡ ಹೊರುವಂತಾಗಿದೆ. ರಾಕಿಂಗ್ ಸ್ಟಾರ್ ಯಶ್, ಪ್ರಶಾಂತ್ ನೀಲ್, ರವಿ ಬಸ್ರೂರ್, ಭವನ್ ಗೌಡ ಹೀಗೆ ಕೆಜಿಎಫ್ ಚಿತ್ರದಲ್ಲಿದ್ದ ಸ್ಟಾರ್ ಕಾಸ್ಟ್ ಹಾಗೂ ತಂತ್ರಜ್ಞರೇ ಹೆಚ್ಚು ಕಡಿಮೆ ಕೆಜಿಎಫ್ ಸೀಕ್ವೆಲ್‌ನಲ್ಲೂ ಮುಂದುವರಿಯಲಿದ್ದಾರೆ. ಚಿತ್ರವು ಯಾವಾಗ ತೆರೆಗೆ ಬರಬಹುದೆಂಬುದು ಮಾತ್ರ ಸದ್ಯಕ್ಕೆ ಹೇಳಲು ಸಾಧ್ಯವಿಲ್ಲ. ಅದ್ದೂರಿ ಮೇಕಿಂಗ್ ಹಾಗೂ ಭಾರೀ ಬಜೆಟ್ ಮೂಲಕ ಬರಲಿರುವ ಕೆಜಿಎಫ್-2 ಚಿತ್ರದ ಬಗ್ಗೆ ಸಿನಿ ಪ್ರಿಯರೆಲ್ಲರೂ ಕಣ್ಣಲ್ಲಿ ಎಣ್ಣೆ ಬಿಟ್ಟುಕೊಂಡು ಕಾಯುತ್ತಿರುವುದಂತೂ ಸುಳ್ಳಲ್ಲ.