ನಾನು ಐರನ್ ಲೆಗ್ ಅಲ್ಲ ಗೋಲ್ಡನ್ ಲೆಗ್: ನಟಿ ರೋಜಾ

ತನ್ನನ್ನು ಐರನ್ ಲೆಗ್ ಎಂದವರ ಬಗ್ಗೆ ವೈಎಸ್‌ಆರ್‌ಸಿಪಿ ಶಾಸಕಿ ಆರ್ ಕೆ ರೋಜಾ ಕೆಂಡಕಾರಿದ್ದಾರೆ. ಆಂಧ್ರಪ್ರದೇಶ ವಿಧಾನಸಭೆ ಚುನಾವಣೆಯಲ್ಲಿ ಗೆದ್ದ ಬಳಿಕ ಮಾಧ್ಯಮಗಳೊಂದಿಗೆ ಅವರು ಮಾತನಾಡಿದ್ದಾರೆ.

ನಾನು ಐರನ್ ಲೆಗ್ ಎಂದು ತೆಲುಗು ದೇಶಂ ಪಕ್ಷದ ಕೆಲಸಕ್ಕೆ ಬಾರದ ಕೆಲವರು ಅಸೆಂಬ್ಲಿಯಲ್ಲಿ ಹಾಗೂ ಹೊರಗೆ ಕೂಗಾಡಿದರು. ಈಗ ಜನ ನೀಡಿರುವ ತೀರ್ಪು ಅವರ ಕೆನ್ನೆಗೆ ತಪರಾಕಿ ನೀಡಿದೆ. ತಾನು ಗೆದ್ದರೆ ವೈಎಸ್ ಜಗನ್‌ಮೋಹನ್ ರೆಡ್ಡಿ ಮುಖ್ಯಮಂತ್ರಿಯಾಗಲ್ಲ ಎಂದು ಅಬ್ಬರಿಸಿದ ಟಿಡಿಪಿ ಮುಖಂಡರು ಈಗೆಲ್ಲಿದ್ದಾರೆ ಎಂದು ಕೇಳಿದ್ದಾರೆ.

ನನ್ನದು ಐರನ್ ಲೆಗ್ ಅಲ್ಲ ಗೋಲ್ಡನ್ ಲೆಗ್. ನನ್ನ ಶಾಪ ಚಂದ್ರಬಾಬು ನಾಯ್ಡುಗೆ ತಟ್ಟಿದೆ. ನನ್ನನ್ನು ಸೋಲಿಸಲು ತುಂಬಾ ಕುತಂತ್ರಗಳನ್ನು ಹೆಣೆದರು. ಆದರೂ ನಗರಿ ಕ್ಷೇತ್ರದ ಜನ ನನ್ನನ್ನು ಕೈಹಿಡಿದಿದ್ದಾರೆ. ನಾನು ನಿತ್ಯ ಜನರಿಗಾಗಿ, ಅಭಿವೃದ್ಧಿಗಾಗಿ ಪರಿತಪಿಸುವ ವ್ಯಕ್ತಿ ಎಂದಿದ್ದಾರೆ ರೋಜಾ.

ವೈಎಸ್ ರಾಜಶೇಖರ ರೆಡ್ಡಿ ಆಡಳಿತಾವಧಿಯಲ್ಲಿ ಜನ ಎಷ್ಟು ಸಂತೋಷವಾಗಿದ್ದರೋ ಅದಕ್ಕಿಂತಲೂ ಹೆಚ್ಚು ಸಂತೋಷವಾಗಿ ಜಗನ್ ಆಡಳಿತಾವಧಿಯಲ್ಲಿ ಇರುತ್ತಾರೆ. ಚಂದ್ರಬಾಬು ನಾಯ್ಡು ನನ್ನ ಕ್ಷೇತ್ರದ ಅಭಿವೃದ್ಧಿಗೆ ನಿಧಿ ನೀಡಲು ಅಡ್ಡಗಾಲು ಹಾಕುತ್ತಿದ್ದರು. ಆದರೆ ಈಗ ಪರಿಸ್ಥಿತಿ ಭಿನ್ನವಾಗಿದೆ. ನನ್ನ ಕ್ಷೇತ್ರವನ್ನು ಅಭಿವೃದ್ಧಿ ಪಥದಲ್ಲಿ ಮುನ್ನಡೆಸುತ್ತೇನೆ ಎಂದಿದ್ದಾರೆ.