ಕಣ್ಣು ಮಿಟುಕಿಸುವುದು ಎಷ್ಟು ಮುಖ್ಯ ಅಂತ ಕಲಿತೆ: ಶಾನ್ವಿ ಶ್ರೀವಾಸ್ತವ್

ನಟಿ ಶಾನ್ವಿ ಶ್ರೀವಾಸ್ತವ್ 'ಚಂದ್ರಲೇಖಾ' ಚಿತ್ರದ ಮೂಲಕ ಸ್ಯಾಂಡಲ್ ವುಡ್‌ಗೆ ಪ್ರವೇಶ ಮಾಡಿದ ನಟಿ. ಈ ಚಿತ್ರದ ಬಳಿಕ ಚಂದನವನದಲ್ಲಿಯೇ ನೆಲೆ ನಿಂತು 'ಮಾಸ್ಟರ್ ಫೀಸ್', 'ಸಾಹೇಬ', 'ಮಫ್ತಿ' ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಸದ್ಯಕ್ಕೆ ಶಾನ್ವಿ 'ಅವನೇ ಶ್ರೀಮನ್ನಾರಾಯಣ' ಚಿತ್ರದಲ್ಲಿ ನಟಿಸುತ್ತಿದ್ದಾರೆ.

ಈ ಚಿತ್ರದ ಬಗ್ಗೆ ನಟಿ ಶಾನ್ವಿ ಮಾತನಾಡಿದ್ದಾರೆ. "ಇಲ್ಲಿವರೆಗೆ ನಾನು ಗ್ಲಾಮರಸ್ ಆಗಿ ಕಾಣಿಸಿಕೊಳ್ಳುತ್ತಿದ್ದೆ. ಈ ಚಿತ್ರದಲ್ಲಿ ಹಳ್ಳಿ ಹುಡುಗಿಯಾಗಿ ನಟಿಸಿದ್ದೇನೆ. ಈ ಪಾತ್ರಕ್ಕೆ ನೋ ಗ್ಲಾಮರಸ್. ನಂಗೆ ದೊಡ್ಡ ರಿಲೀಫ್ ಸಿಕ್ಕಿದೆ. ನಾನು ರಕ್ಷಿತ್ ಶೆಟ್ಟಿಯವರೊಂದಿಗೆ ನಟಿಸುತ್ತಿರುವ 'ಅವನೇ ಶ್ರೀಮನ್ನಾರಾಯಣ' ಸಿನಿಮಾ ಮೂಲಕ ನಾನು ಏನು ಎನ್ನುವುದನ್ನು ನಿರೂಪಿಸಲು ನನಗೆ ಸಾಧ್ಯವಾಗುತ್ತಿದೆ' ಎಂದಿದ್ದಾರೆ ನಟಿ ಶಾನ್ವಿ ಶ್ರೀವಾಸ್ತವ್.

'ಅವನೇ ಶ್ರೀಮನ್ನಾರಾಯಣ' ಚಿತ್ರದಲ್ಲಿ ಶಾನ್ವಿ ಹಳ್ಳಿ ಹುಡುಗಿಯಾಗಿ ನಟಿಸಿದ್ದು ಮಾನಸಿಕವಾಗಿ ಬಹಳ ಸ್ಟ್ರಾಂಗ್ ಮನಸ್ಥಿತಿ ಇರುವ ಹುಡುಗಿಯ ಪಾತ್ರ ಇದಾಗಿದೆ. "ನಾನಿಲ್ಲಿ ಮಾನಸಿಕವಾಗಿ ಬಹಳ ಸ್ಟ್ರಾಂಗ್ ಆಗಿರುವ ಹುಡುಗಿಯ ಪಾತ್ರ. ಜನರಿಗೋಸ್ಕರ ಗಟ್ಟಿಗಿತ್ತಿಯಾಗಿ ನಿಲ್ಲುವ ಹುಡುಗಿ ಪಾತ್ರ ಮಾಡುತ್ತಿದ್ದೇನೆ. ಇನ್ನು ಈ ಚಿತ್ರದಿಂದ ಮೇಕಿಂಗ್ ಅಂದರೆ ಏನು ಎನ್ನುವುದನ್ನು ಕಲಿತೆ. ನಟನೆಯಲ್ಲೂ ಸಣ್ಣ ಸಣ್ಣ ಎಕ್ಸ್ ಪ್ರೆಷನ್ ಕೊಡುವುದನ್ನು ಕಲಿತೆ. ಕಣ್ಣು ಮಿಟುಕಿಸುವುದು ಕೂಡ ಎಷ್ಟು ಮುಖ್ಯ ಎನ್ನುವುದನ್ನು ಕಲಿತಿದ್ದೇನೆ" ಎಂದಿದ್ದಾರೆ ನಟಿ ಶಾನ್ವಿ ಶ್ರೀವಾಸ್ತವ್.

'ಅವನೇ ಶ್ರೀಮನ್ನಾರಾಯಣ' ಚಿತ್ರದ ಬಳಿಕ 'ಗೀತಾ' ಹಾಗೂ 'ರವಿಚಂದ್ರ' ಚಿತ್ರದಲ್ಲೂ ನಟಿಸುತ್ತಿರುವ ಶಾನ್ವಿಗೆ ಶೂಟಿಂಗ್ ಇಲ್ಲದಿರುವಾಗ ಸುಮ್ಮನೆ ಮನೆಯಲ್ಲಿ ಇರಲಿ ಇಷ್ಟವಂತೆ. "ಈ ತಿಂಗಳಲ್ಲಿ 'ಅವನೇ ಶ್ರೀಮನ್ನಾರಾಯಣ' ಚಿತ್ರದ ಶೂಟಿಂಗ್ ಬಾದಾಮಿಯಲ್ಲಿದೆ. ಅಲ್ಲಿ 45 ಡಿಗ್ರಿ ಉಷ್ಣಾಂಶ ಇದೆಯಂತೆ. ನಾವು ಬಿಸಿಲಲ್ಲಿ ನಿಂತಿದ್ದರೂ ಕೂಡ ಕ್ಯಾಮರಾ ಮುಂದೆ ಕೂಲ್ ಆಗಿ ಕಾಣಿಸಿಕೊಳ್ಳಬೇಕು. ಮುಖದಲ್ಲಿ ಆಯಾಸ ಕಾಣಿಸಿಕೊಳ್ಳಬಾರದು. ಫ್ರೆಶ್‌ನೆಸ್ ಸದಾ ಇರಬೇಕು. ಅದು ನಮ್ಮಂತ ಕಲಾವಿದರ ಜೀವನದ ಅನಿವಾರ್ಯತೆ ಹಾಗೂ ಅಗತ್ಯತೆ' ಎಂದಿದ್ದಾರೆ ನಟಿ ಶಾನ್ವಿ ಶ್ರೀವಾಸ್ತವ್.