ಸೈಕಿಯಾಟ್ರಿಸ್ಟ್‌ ಪಾತ್ರದಲ್ಲಿ ಕಾಣಿಸಿಕೊಂಡ ಸುಧಾರಾಣಿ!

ಈ ಶುಕ್ರವಾರ (ಜುಲೈ12) ಬಿಡುಗಡೆ ಆಗಲಿರುವ 'ಚಿತ್ರಕಥಾ' ಸಿನಿಮಾ ನಾನಾ ಪಾತ್ರಗಳಿಂದಾಗಿ ಕುತೂಹಲ ಮೂಡಿಸಿದೆ. ಹಿರಿಯ ನಟಿ ಬಿ.ಜಯಶ್ರೀ ಈ ಸಿನಿಮಾದಲ್ಲಿ ಕೊರವಂಜಿಯಾಗಿ ನಟಿಸಿದ್ದರೆ, ಸುಧಾರಾಣಿ ಕೂಡ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಸುಧಾರಾಣಿ ಅವರದ್ದು ಸೈಕಿಯಾಟ್ರಿಸ್ಟ್‌ ಪಾತ್ರವಾಗಿದ್ದು, ಎರಡು ಶೇಡ್‌ನಲ್ಲಿ ಮೂಡಿ ಬಂದಿರುವುದು ವಿಶೇಷ.

'ಸುಧಾರಾಣಿ ಅವರು ಕೇರಳ ಮೂಲದ ಡಾಕ್ಟರ್‌ ಪಾತ್ರ ಮಾಡಿದ್ದಾರೆ. ಹಾಗಾಗಿ ಮಲೆಯಾಳಿ ಭಾಷೆಯನ್ನೂ ಮಾತನಾಡಿದ್ದಾರೆ. ಎರಡು ವಿಭಿನ್ನ ಶೇಡ್‌ನಲ್ಲಿ ಈ ಪಾತ್ರ ಮೂಡಿ ಬಂದಿದ್ದು, ವಿಚಿತ್ರ ಕಾಯಿಲೆಯ ಹಿಂದೆ ಬೀಳುವಂಥ ಕ್ಯಾರೆಕ್ಟರ್‌ ಇದಾಗಿದೆ' ಎನ್ನುತ್ತಾರೆ ನಿರ್ದೇಶಕ ಯಶಸ್ವಿ ಬಾಲಾದಿತ್ಯ.

ಇವರ ಆಸ್ಪತ್ರೆಗೆ ವಿಚಿತ್ರವಾಗಿ ವರ್ತಿಸುವ ಪೇಷಂಟ್‌ವೊಂದು ಬರುತ್ತದೆ. ಆ ಪಾತ್ರವನ್ನು ದಿಲೀಪ್‌ ರಾಜ್‌ ಮಾಡಿದ್ದಾರೆ. ಅಂಥದ್ದೇ ಖಾಯಿಲೆ ಕಥಾ ನಾಯಕನಿಗೂ ಇರುತ್ತದೆ. ಈ ಎರಡು ಪಾತ್ರಗಳನ್ನು ವಿಶ್ಲೇಷಣೆ ಮಾಡುವಂಥ ಪಾತ್ರವನ್ನು ಸುಧಾರಾಣಿ ಮಾಡಿದ್ದಾರೆ.

'ಈ ಪಾತ್ರವು ವಿಶೇಷವಾಗಿ ಮೂಡಿ ಬರಲಿ ಎನ್ನುವ ಕಾರಣಕ್ಕಾಗಿ ಕಾಸ್ಟ್ಯೂಮ್‌ ಕೂಡ ವಿಶೇಷವಾಗಿ ಡಿಸೈನ್‌ ಮಾಡಲಾಗಿದೆ. ಇಡೀ ಪಾತ್ರವನ್ನು ಸೊಗಸಾಗಿ ಕಟ್ಟಿಕೊಟ್ಟಿದ್ದಾರೆ ನಿರ್ದೇಶಕರು. ಆ ಪಾತ್ರಕ್ಕೆ ಸುಧಾರಾಣಿ ಅವರು ಜೀವ ತುಂಬಿದ್ದಾರೆ' ಎನ್ನುವುದು ನಾಯಕ ಸುಜಿತ್‌ ರಾಥೋಡ್‌ ಮಾತು.

ಈ ಸಿನಿಮಾದ ಮೂಲಕ ಸುಜಿತ್‌ ನಾಯಕನಾಗಿ ಸಿನಿಮಾ ರಂಗಕ್ಕೆ ಎಂಟ್ರಿ ಕೊಡುತ್ತಿದ್ದಾರೆ. ಸಿನಿಮಾ ನಿರ್ದೇಶಕನಾಗುವ ಕನಸ್ಹೊತ್ತು ಚಿತ್ರೋದ್ಯಮಕ್ಕೆ ಬರುವ ಹುಡುಗನ ಪಾತ್ರ ಅದಾಗಿದೆ.