ಗುರು ದೇಶಪಾಂಡೆ ನಿರ್ದೇಶನದ 'ಜಾನಿ ಜಾನ್‌ ಜನಾರ್ಧನ್‌' ಮತ್ತಷ್ಟು ಹಾಟ್‌ ಆಗಲಿದೆ. ಈ ಚಿತ್ರದ ವಿಶೇಷ ಹಾಡಿನಲ್ಲಿ ಐಂದ್ರಿತಾ ರೇ ಹೆಜ್ಜೆ ಹಾಕಲಿದ್ದಾರೆ! ಹೀರೋಗಳಾದ ಯೋಗೀಶ್‌, ಕೃಷ್ಣ ಅಜಯ್‌ ರಾವ್‌ ಮತ್ತು ಮದರಂಗಿ ಕೃಷ್ಣ ಅವರೊಂದಿಗೆ ಐಂದ್ರಿತಾ ಹೆಜ್ಜೆ ಹಾಕಲಿದ್ದಾರೆ. ಅರ್ಜುನ್‌ ಜನ್ಯ ಸಂಗೀತ ಸಂಯೋಜನೆಯ ಈ ಗೀತೆಯನ್ನು ಬೆಂಗಳೂರಿನ ಸುಂದರ ತಾಣಗಳಲ್ಲಿ ಚಿತ್ರಿಸಲಾಗಿದೆ. 'ಬಹಳ ಖುಷಿಯಿಂದ ಕೆಲಸ ಮಾಡಿದ್ದೇನೆ. ಮೂವರು ಹೀರೋಗಳೂ ಜಾಲಿ ವ್ಯಕ್ತಿತ್ವದವರೇ. ಅವರ ಜತೆ ಡಾನ್ಸ್‌ಗೆ ಹೆಜ್ಜೆ ಹಾಕಲು ತುಂಬಾ ಖುಷಿಯಾಗುತ್ತೆ. ಹಾಡು ತುಂಬ ಚೆನ್ನಾಗಿ ಮೂಡಿ ಬಂದಿದೆ' ಎಂದು ಶೂಟಿಂಗ್‌ ಸಂಭ್ರಮ ಹಂಚಿಕೊಳ್ಳುತ್ತಾರವರು.
'ಇದೊಂದು ಡ್ರೀಮ್‌ ಸೀಕ್ವೆನ್ಸ್‌. ಮೂರೂ ಜನ ಹುಡುಗರು ನನ್ನ ಹಿಂದೆ ಬಿದ್ದಿರುತ್ತಾರೆ. ಆ ದೃಶ್ಯವನ್ನು ಹಾಡುಗಳಲ್ಲಿ ಸೆರೆ ಹಿಡಿಯಲಾಗಿದೆ. ಈ ರೀತಿಯ ಹಾಡುಗಳಲ್ಲಿ ಕುಣಿಯಲು ನನಗೆ ಸಖತ್‌ ಖುಷಿಯಾಗುತ್ತದೆ. ಅಪ್ಪ ಲೂಸಾ ಅಮ್ಮ ಲೂಸಾ, ಕೊಂಕಣ ಸುತ್ತಿ ಮೈಲಾರಕ್ಕೆ ಬಂದೆ ನಾನು... ಇವು ನಾನು ಹೆಜ್ಜೆ ಹಾಕಿದ ನನ್ನ ಮೆಚ್ಚಿನ ಹಾಡುಗಳು. ಈ ಸಿನಿಮಾದಲ್ಲಿನ ನನ್ನ ಹಾಡನ್ನು ಅತ್ಯಂತ ವಿಶೇಷವಾಗಿ ಚಿತ್ರಿಸಲಾಗಿದೆ. ಹಿರೋಯಿನ್‌ ಆಗಿ ನಟಿಸುವುದರ ಜತೆಜತೆಗೆ ವಿಶೇಷ ಹಾಡುಗಳಿಗೆ ಹೆಜ್ಜೆ ಹಾಕುವುದು ಒಂಥರಾ ಮಜಾ ಕೊಡುತ್ತದೆ' ಎನ್ನುತ್ತಾರೆ ಆ್ಯಂಡಿ.