ತಮಿಳು ಚಿತ್ರವೊಂದರ ಕನ್ನಡ ರಿಮೇಕ್‌ನಲ್ಲಿ ಅಜಯ್‌ ರಾವ್ ನಾಯಕರಾಗಿ ನಟಿಸಲಿದ್ದಾರೆ.
ಕೃಷ್ಣ ಲೀಲಾ ಚಿತ್ರ ನಿರ್ಮಾಣ ಮಾಡಿ ಯಶಸ್ಸನ್ನು ಕಂಡ ಇವರೀಗ ರೀಮೇಕ್‌ನತ್ತ ಹೊರಳಿದ್ದಾರೆ. ತಮಿಳಿನಲ್ಲಿ ಸೂಪರ್‌ ಹಿಟ್‌ ಆದ ಚಿತ್ರ 'ಪಿಚ್ಚಕಾರನ್‌' (ಭಿಕ್ಷುಕ), ಕನ್ನಡಕ್ಕೆ ರಿಮೇಕ್‌ ಆಗುತ್ತಿದೆ. ಇಲ್ಲಿ ಯಾವ ಹೆಸರಿನಲ್ಲಿ ತೆರೆಕಾಣಲಿದೆ ಎನ್ನುವುದು ಇನ್ನೂ ಗೊತ್ತಾಗಿಲ್ಲ. ಯೋಗೀಶ್‌ ದ್ವಾರಕೀಶ್‌ ರೀಮೇಕ್‌ ಹಕ್ಕನ್ನು ಖರೀದಿಸಿದ್ದಾರೆ. ಮೊದಲು ಈ ಚಿತ್ರದಲ್ಲಿ ಸುದೀಪ್‌ ನಟಿಸುತ್ತಾರೆಂಬ ಸುದ್ದಿ ಹರಿದಾಡುತ್ತಿತ್ತು. ಈಗ ಅದು ಅಜಯ್‌ ರಾವ್ ಪಾಲಿಗೆ ಬಂದಿದೆ.
'ಈ ಚಿತ್ರವನ್ನು ನೋಡಿದ ತಕ್ಷಣ ಯಾರ ಬಳಿ ರೀಮೇಕ್‌ ರೈಟ್ಸ್‌ ಇದೆ ಎಂದು ವಿಚಾರಿಸಿದೆ. ಅಷ್ಟರಲ್ಲಾಗಲೇ ಯೋಗೀಶ್‌ ಹಕ್ಕನ್ನು ಖರೀದಿಸಿದ್ದಾರೆ ಎಂದು ತಿಳಿಯಿತು. ಅವರೊಂದಿಗೆ ಮಾತನಾಡಿದಾಗ ಸುದೀಪ್‌ ಈ ಚಿತ್ರದಲ್ಲಿ ನಟಿಸಲಿದ್ದಾರೆ ಎಂದು ಹೇಳಿದ್ದರು. ಕೊನೆಗೆ ಅದೇನಾಯಿತೋ ನನ್ನನ್ನೇ ಅಪ್ರೋಚ್‌ ಮಾಡಿದರು. ಸದ್ಯದಲ್ಲೇ ಚಿತ್ರ ಸೆಟ್ಟೇರಲಿದೆ' ಎನ್ನುತ್ತಾರೆ ಅಜಯ್‌.
ಸದ್ಯ ಶಿವ ತೇಜಸ್‌ ನಿರ್ದೇಶನದ ಹೊಸ ಚಿತ್ರದ ಶೂಟಿಂಗ್‌ನಲ್ಲಿ ಅಜಯ್‌ ಬಿಝಿ. ಇದು ಆ್ಯಕ್ಷನ್‌ ಥ್ರಿಲ್ಲರ್‌ ಚಿತ್ರ. ಇದರಲ್ಲಿ ಹೊಸ ರೀತಿಯ ಪಾತ್ರದಲ್ಲಿ ತಾವು ಕಾಣಿಸಿಕೊಂಡಿರುವುದಾಗಿ ಅವರು ಹೇಳಿದ್ದಾರೆ.