BIFFES 2019: ಬೆಂಗಳೂರು ಅಂತಾರಾಷ್ಟ್ರೀಯ ಚಿತ್ರೋತ್ಸವ: ಈ ಸಲ ಏನೆಲ್ಲಾ ಉಂಟು ಗೊತ್ತಾ?

11ನೇ ಬೆಂಗಳೂರು ಅಂತಾರಾಷ್ಟ್ರೀಯ ಚಿತ್ರೋತ್ಸವಕ್ಕೆ ಫೆ.21ರಂದು ಚಾಲನೆ ಸಿಗಲಿದೆ. ಎಂಟು ದಿನಗಳ ಕಾಲ ಅಂದರೆ, ಫೆ.28ರವರೆಗೆ ಕನ್ನಡ, ದೇಶದ ಇತರೆ ಭಾಷೆಗಳು ಹಾಗೂ ವಿದೇಶಿ ಸೇರಿ ಒಟ್ಟು 225 ಸಿನಿಮಾ ವೀಕ್ಷಿಸಲು ಅವಕಾಶ ಸಿಗಲಿದೆ.

ಫೆ.21ರಂದು ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿಯವರು ವಿಧಾನಸೌಧದ ಬ್ಯಾಂಕ್ವೆಟ್‌ ಹಾಲ್‌ನಲ್ಲಿ ಚಿತ್ರೋತ್ಸವಕ್ಕೆ ಚಾಲನೆ ನೀಡುವರು. ಬಳಿಕ ರಾಜಾಜಿನಗರದ ಮೊದಲ ಬ್ಲಾಕ್‌ನಲ್ಲಿ ರಾಜ್‌ಕುಮಾರ್‌ ರಸ್ತೆಯಲ್ಲಿರುವ ಓರಾಯನ್‌ ಮಾಲ್‌ನಲ್ಲಿರುವ ಮಲ್ಟಿಫ್ಲೆಕ್ಸ್‌ ಹಾಗೂ ಚಾಮರಾಜಪೇಟೆಯ ಕಲಾವಿದರ ಸಂಘದಲ್ಲಿ ಚಿತ್ರಪ್ರದರ್ಶನ ನಡೆಯಲಿದೆ. ಇದಕ್ಕಾಗಿ ಅದ್ಧೂರಿ ಸಿದ್ಧತೆ ನಡೆದಿದೆ. ಚಿತ್ರೋತ್ಸವಕ್ಕಾಗಿ 100ಕ್ಕೂ ಹೆಚ್ಚು ಸ್ವಯಂ ಸೇವಕರಿಗೆ ತರಬೇತಿ ನೀಡಲಾಗಿದೆ.

60 ರಾಷ್ಟ್ರಗಳ ಚಿತ್ರಗಳು ಪ್ರದರ್ಶನಗೊಳ್ಳಲಿವೆ. ಚಿತ್ರಗಳ ಪ್ರದರ್ಶನಕ್ಕೆ ನಗರದ ಒರಾಯನ್‌ ಮಾಲ್‌ನ ಪಿವಿಆರ್‌ ಸಿನಿಮಾಸ್‌ನಲ್ಲಿ ಹನ್ನೊಂದು ಪರದೆಗಳನ್ನು ನಿಗದಿಪಡಿಸಲಾಗಿದೆ. ಇಲ್ಲಿ ನಿತ್ಯವೂ 5 ಸಿನಿಮಾಗಳು ಪ್ರದರ್ಶನಗೊಳ್ಳಲಿವೆ ಎಂದು ಕರ್ನಾಟಕ ಚಲನಚಿತ್ರ ಅಕಾಡೆಮಿ ಅಧ್ಯಕ್ಷ ಡಾ. ನಾಗತಿಹಳ್ಳಿ ಚಂದ್ರಶೇಖರ್‌ ಪತ್ರಿಕಾಗೋಷ್ಠಿಯಲ್ಲಿ ಮಂಗಳವಾರ ತಿಳಿಸಿದರು.

ಚಿತ್ರೋತ್ಸವಕ್ಕಾಗಿ ರಾಜ್ಯ ಸರಕಾರ ಈ ಹಿಂದೆ 5 ಕೋಟಿ ಅನುದಾನ ನೀಡುತ್ತಿತ್ತು. ಈ ಬಾರಿ ಸರಳವಾಗಿ ನಡೆಸಬೇಕು ಎಂಬ ಉದ್ದೇಶದಿಂದ 2 ಕೋಟಿ ಅನುದಾನ ನೀಡಿದೆ. ಈ ಬಾರಿ ಪುಸ್ತಕಗಳ ಪ್ರದರ್ಶನ ಮತ್ತು ಮಾರಾಟವೂ ಇರಲಿದೆ. ನಿತ್ಯವೂ ತಜ್ಞರಿಂದ ಕಾರ್ಯಾಗಾರ, ಸಂವಾದ ಹಾಗೂ ಉಪನ್ಯಾಸವನ್ನು ಏರ್ಪಡಿಸಲಾಗಿದೆ ಎಂದು ತಿಳಿಸಿದರು.
ಗೋಷ್ಠಿಯಲ್ಲಿ ವಾರ್ತಾ ಇಲಾಖೆ ನಿರ್ದೇಶಕ ಪಂಕಜ್‌ಕುಮಾರ್‌ ಪಾಂಡೆ, ವಾರ್ತಾ ಇಲಾಖೆ ರಿಜಿಸ್ಟ್ರಾರ್‌ ಎಚ್‌.ಬಿ. ದಿನೇಶ್‌, ಜಂಟಿ ನಿರ್ದೇಶಕ ಎಚ್‌.ಎ. ಪ್ರಕಾಶ್‌ ಉಪಸ್ಥಿತರಿದ್ದರು.

ಸಿನಿಮಾ ಪ್ರದರ್ಶನ ಎಲ್ಲೆಲ್ಲಿ
ಒರಾಯನ್‌ ಮಾಲ್‌ನ ಪಿವಿಆರ್‌ ಸಿನಿಮಾಸ್‌ನಲ್ಲಿರುವ ಎಲ್ಲ 11 ಪರದೆಗಳು
ಚಾಮರಾಜಪೇಟೆಯಲ್ಲಿರುವ ಚಲನಚಿತ್ರ ಕಲಾವಿದರ ಸಂಘದಲ್ಲಿ ನಿತ್ಯ ಎರಡು ಚಿತ್ರ
ಸಮಯ: ಬೆಳಗ್ಗೆ 10 ರಿಂದ ರಾತ್ರಿಯವರೆಗೆ.

ಅಂತಾರಾಷ್ಟ್ರೀಯ ತೀರ್ಪುಗಾರರ ಮಂಡಳಿ
ಪ್ರತಿ ಬಾರಿಯ ಚಿತ್ರೋತ್ಸವದಲ್ಲಿ ಭಾರತೀಯ ಚಿತ್ರಗಳ ಸ್ಪರ್ಧೆಯಲ್ಲಿ ರಾಷ್ಟ್ರೀಯ ಮಟ್ಟದ ತೀರ್ಪುಗಾರರ ಮಂಡಳಿಯಿರುತ್ತಿತ್ತು. ಆದರೆ ಇದೇ ಮೊದಲ ಬಾರಿಗೆ ಅಂತಾರಾಷ್ಟ್ರೀಯ ತೀರ್ಪುಗಾರರ ಮಂಡಳಿಯನ್ನು ಪರಿಚಯಿಸಲಾಗಿದೆ. ಇದು ಅತ್ಯುತ್ತಮ ಬೆಳವಣಿಗೆ ಎಂದು ಚಿತ್ರೋತ್ಸವದ ಕಲಾತ್ಮಕ ನಿರ್ದೇಶಕ ಎನ್‌. ವಿದ್ಯಾಶಂಕರ್‌ ತಿಳಿಸಿದರು.

* ಕನ್ನಡ ಚಿತ್ರಗಳು-30
* ಭಾರತೀಯ ಚಿತ್ರಗಳು-20
* ವಿದೇಶಿ ಚಿತ್ರಗಳು- 175

ಅಂಬರೀಷ್‌ ಸ್ಮರಣಾರ್ಥ ಚಿತ್ರ ಪ್ರದರ್ಶನ:
ಇತ್ತೀಚಿಗೆ ನಿಧನರಾದ ನಟ ಅಂಬರೀಷ್‌ ಸ್ಮರಣೆಗಾಗಿ ನಾಗರಹಾವು, ಪಡುವಾರಹಳ್ಳಿ ಪಾಂಡವರು, ಅಂತ ಸೇರಿದಂತೆ ಅವರ 5 ಪ್ರಮುಖ ಸಿನೆಮಾಗಳು ಪ್ರದರ್ಶನಗೊಳ್ಳಲಿವೆ. ಜತೆಗೆ ಲೋಕನಾಥ್‌ ಅವರ ಸ್ಮರಣಾರ್ಥ ಒಂದು ಚಿತ್ರ, ಎಂ.ಎನ್‌. ವ್ಯಾಸರಾವ್‌ ಸ್ಮರಣಾರ್ಥ ಒಂದು ಚಿತ್ರ, ಬೆಂಗಾಲಿ ನಿರ್ದೇಶಕ ಮೃಣಾಲ್‌ ಸೇನ್‌ ಅವರ 5 ಚಿತ್ರಗಳು ಪ್ರದರ್ಶನಗೊಳ್ಳಲಿವೆ. ರಾಷ್ಟ್ರಪಿತ ಮಹಾತ್ಮ ಗಾಂಧಿಧೀಜಿಯವರ 150ನೇ ವರ್ಷಾಚರಣೆ ನೆನಪಿಗೆ ಗಾಂಧಿಧೀಜಿಯವರ ಕುರಿತಾದ ಒಟ್ಟು ನಾಲ್ಕು ಚಿತ್ರಗಳನ್ನು ಪ್ರದರ್ಶಿಸಲಾಗುವುದು.

ಪ್ರವೇಶ ಶುಲ್ಕ
ಚಿತ್ರೋತ್ಸವದಲ್ಲಿ ಪಾಲ್ಗೊಳ್ಳಲು ಸಾರ್ವಜನಿಕರಿಗೆ ದಿನವೊಂದಕ್ಕೆ 100 ರೂ. ಪ್ರವೇಶ ಶುಲ್ಕ ನಿಗದಿಪಡಿಸಲಾಗಿದೆ. 8 ದಿನಗಳಿಗೂ 800 ರೂ. ನೀಡಿ ಒಮ್ಮೆಯೇ ಪ್ರವೇಶ ಕೂಪನ್‌ ಪಡೆಯಬಹುದು. ಹಿರಿಯ ನಾಗರಿಕರಿಗೆ, ವಿದ್ಯಾರ್ಥಿಗಳಿಗೆ 400 ರೂ. ನಿಗದಿ ಮಾಡಲಾಗಿದೆ. ಚಿತ್ರೋದ್ಯಮದ ಸದಸ್ಯರಿಗೆ 400 ರೂ. ಪ್ರತಿನಿಧಿ ಶುಲ್ಕವಿದೆ. ಹೆಚ್ಚಿನ ಮಾಹಿತಿಗೆ ಚಿತ್ರೋತ್ಸವದ ವೆಬ್‌ಸೈಟ್‌ (www.biffes.in) ವೀಕ್ಷಿಸಬಹುದು.