ನಟಿಗೆ ಲೈಂಗಿಕ ಕಿರುಕುಳ, ದೂರು ದಾಖಲು

ಲೈಂಗಿಕ ಕಿರುಕುಳಕ್ಕೆ ಸಂಬಂಧಪಟ್ಟಂತೆ ನಟಿ ಅಮಲಾ ಪೌಲ್‍ ಪೊಲೀಸರಿಗೆ ದೂರು ನೀಡಿದ್ದು, ಈ ಸಂಬಂಧ 32 ವರ್ಷದ ಅಜಗೇಶನ್ ಎಂಬುವವರನ್ನು ಪೊಲೀಸರು ಬುಧವಾರ ಬಂಧಿಸಿದ್ದಾರೆ. ಚೆನ್ನೈನ ಟಿ ನಗರ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ.

ಮಲೇಷ್ಯಾದಲ್ಲಿ ನಡೆಯಲಿರುವ ಕಾರ್ಯಕ್ರಮವೊಂದಕ್ಕೆ ಸಂಬಂಧಿಸಿದಂತೆ ಟಿ ನಗರದ ಸ್ಟುಡಿಯೋ ಒಂದರಲ್ಲಿ ಡಾನ್ಸ್ ಪ್ರಾಕ್ಟೀಸ್ ಸಂದರ್ಭದಲ್ಲಿ ತಮಗೆ ಈ ಕಹಿ ಘಟನೆ ಎದುರಾಯಿತು ಎಂದು ನಟಿ ಅಮಲಾ ಪೌಲ್ ಆರೋಪಿಸಿದ್ದಾರೆ. ಡಾನ್ಸ್ ಪ್ರಾಕ್ಟೀಸ್ ಮಾಡುವ ಸಂದರ್ಭದಲ್ಲಿ ಅಪರಿಚಿತ ವ್ಯಕ್ತಿಯೊಬ್ಬ ಬಂದು ತನ್ನೊಂದಿಗೆ ಅಸಭ್ಯವಾಗಿ ನಡೆದುಕೊಂಡ. ಇದಕ್ಕೆ ಒಳಗಿನವರ ಬೆಂಬಲ ಇರುವ ಸಾಧ್ಯತೆ ಇದೆ ಎಂದು ಅವರು ಅನುಮಾನ ವ್ಯಕ್ತಪಡಿಸಿದ್ದಾರೆ.

'ಈ ಘಟನೆಯಿಂದ ಶಾಕ್ ಆಯಿತು. ನನಗೆ ತುಂಬಾ ಅಪಮಾನವಾಗಿದೆ. ನಾನೊಬ್ಬ ಸ್ವತಂತ್ರ ಉದ್ಯೋಗಿ ಮಹಿಳೆಯಾಗಿದ್ದು ಯಾವುದೇ ಅಡೆತಡೆ ಇಲ್ಲದಂತೆ ಕೆಲಸ ಮಾಡಲು ಬಯಸುತ್ತೇನೆ. ಅಂತಹ ಸಂದರ್ಭದಲ್ಲಿ ನನಗೆ ಸುರಕ್ಷತೆ ಇರಲಿಲ್ಲ' ಎಂದಿದ್ದಾರೆ.

ಈ ಸಂಬಂಧ ಅಜಗೇಷನ್ ವಿರುದ್ಧ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ಭಾರತೀಯ ದಂಡ ಸಂಹಿತೆ ಸೆಕ್ಷನ್ 354ಎ (ಲೈಂಗಿಕ ಕಿರುಕುಳ), 509 (ಮಹಿಳೆಯ ಗೌರವಕ್ಕೆ ಧಕ್ಕೆ ತರುವುದು), ತಮಿಳುನಾಡು ಮಹಿಳಾ ಕಾಯಿದೆಯ ಕಿರುಕುಳ ನಿಷೇಧ ಸೆಕ್ಷನ್ 4ರಡಿ ಪ್ರಕರಣ ದಾಖಲಿಸಿಕೊಂಡು ಬಂಧಿಸಿದ್ದಾರೆ.

ತನ್ನ ಗೆಳೆಯ ಭಾಸ್ಕರ್ ಪರವಾಗಿ ನಾನು ನಟಿಯನ್ನು ಭೇಟಿಯಾಗಿದ್ದೆ ಎಂದು ಆರೋಪಿ ಪೊಲೀಸ್ ವಿಚಾರಣೆಯಲ್ಲಿ ತಿಳಿಸಿದ್ದು, ಮಲೇಷ್ಯಾದಲ್ಲಿ ಆಯೋಜಿಸಿರುವ ನೃತ್ಯ ಕಾರ್ಯಕ್ರಮದ ಹಾಜರಾತಿ ಬಗ್ಗೆ ವಿಚಾರಿಸುವಂತೆ ಉದ್ಯಮಿಯೊಬ್ಬರು ತಮಗೆ ತಿಳಿಸಿದ್ದರು. ಮಲೇಷ್ಯಾದ ಫೋನ್ ನಂಬರನ್ನೂ ಕೊಟ್ಟಿದ್ದು, ನಟಿಯ ಮ್ಯಾನೇಜರ್ ಮಾತನಾಡುವಂತೆ ತಿಳಿಸಿದ್ದರು ಎಂದಿದ್ದಾನೆ. ಆದರೆ ಇದನ್ನು ಮ್ಯಾನೇಜರ್ ನಿರಾಕರಿಸಿದ್ದಾರೆ.