ಅಂಬಿ ಮಗನ ಮೊದಲ ಚಿತ್ರದ ಹೆಸರು ’ಅಮರ್’

*ಹರೀಶ್‌ ಬಸವರಾಜ್‌

ಹಿರಿಯ ನಟ ಅಂಬರೀಷ್‌ 'ಅಂಬಿ ನಿಂಗೆ ವಯಸ್ಸಾಯ್ತೋ' ಚಿತ್ರದ ಶೂಟಿಂಗ್‌ನಲ್ಲಿ ಬಿಝಿಯಾಗಿದ್ದರೆ, ಇತ್ತ ಅವರ ಪುತ್ರ ಅಭಿಷೇಕ್‌ ಅವರ ಚೊಚ್ಚಲ ಸಿನಿಮಾದ ತಯಾರಿ ಭರದಿಂದ ನಡೆಯುತ್ತಿದೆ. ಮೈನಾ ಖ್ಯಾತಿಯ ನಾಗ್‌ಶೇಖರ್‌ ಈ ಚಿತ್ರವನ್ನು ನಿರ್ದೇಶನ ಮಾಡಲಿದ್ದು, ಅಮರ್‌ ಎಂಬ ಟೈಟಲ್‌ ಫೈನಲ್‌ ಆಗಿದೆ.

ಈ ಬಗ್ಗೆ ಲವಲವಿಕೆ ಜತೆ ಮಾತನಾಡಿದ ಅಭಿಷೇಕ್‌, 'ನಾಗಶೇಖರ್‌ ಅವರ ಕಥೆ ಬಹಳ ಚೆನ್ನಾಗಿದೆ. ಆ ಕಥೆ ಒಂದೇ ಕೆಟಗರಿಗೆ ಸೇರಿದೆ ಅನ್ನಲು ಸಾಧ್ಯವಿಲ್ಲ. ಲವ್‌, ಆ್ಯಕ್ಷನ್‌, ಫ್ಯಾಮಿಲಿ ಸೆಂಟಿಮೆಂಟ್‌ ಎಲ್ಲವೂ ಇದೆ. ತಂದೆಯವರ ಅಭಿಮಾನಿಗಳು ಮತ್ತು ಕನ್ನಡಿಗರು ಇಷ್ಟಪಡುವಂಥ ಕಥೆಯ ಮೂಲಕ ನಾನು ಎಂಟ್ರಿ ಕೊಡುತ್ತಿದ್ದೇನೆ. ಸದ್ಯಕ್ಕೆ ಇಷ್ಟೇ ಫೈನಲ್‌ ಆಗಿರೋದು. ಸದ್ಯದಲ್ಲೇ ಚಿತ್ರ ಆರಂಭವಾಗುತ್ತದೆ'ಎಂದಿದ್ದಾರೆ. ನಾಗಶೇಖರ್‌ ಕೂಡ ಇದನ್ನೇ ಖಚಿತಪಡಿಸಿದ್ದಾರೆ.

ಕಳೆದ ವರ್ಷ ಅಭಿಷೇಕ್‌ ಹುಟ್ಟುಹಬ್ಬದಂದು ಮಾತನಾಡಿದ್ದ ಅಂಬರೀಷ್‌ ಹಾಗೂ ಸುಮಲತಾ, ತಮ್ಮ ಪುತ್ರ ಅಭಿಷೇಕ್‌ ಚಿತ್ರರಂಗಕ್ಕೆ ಕಾಲಿಡುತ್ತಿದ್ದು, ಅದಕ್ಕೆ ಬೇಕಾದ ಎಲ್ಲಾ ತಯಾರಿ ಮಾಡಿಕೊಳ್ಳುತ್ತಿದ್ದಾನೆ ಎಂದು ಹೇಳಿದ್ದರು. ಈಗ ಸರಿಯಾದ ವೇದಿಕೆ ಮೂಲಕ ಎಂಟ್ರಿ ಕೊಡುತ್ತಿದ್ದಾರೆ. ನಾಗ್‌ಶೇಖರ್‌ ಪ್ರೇಮ ಕಥೆಗಳನ್ನು ಚೆನ್ನಾಗಿ ಮಾಡುತ್ತಾರೆ. ಹಾಗಾಗಿ ಅಂಬಿ ಅಭಿಮಾನಿಗಳಿಗೆ ಇಷ್ಟವಾಗುವಂತಹ ಸಿನಿಮಾ ಮಾಡುತ್ತಾರೆ ಕಾದು ನೋಡಬೇಕಿದೆ.